വന്യജീവികളെ കൊല്ലണോ നിയന്ത്രിക്കണോ? മുഖ്യമന്ത്രിയുടെ അഭിപ്രായത്തോട് അനുകൂലിച്ചും പ്രതികൂലിച്ചും സംഘടനകൾ

അഞ്ച് മാസത്തിനുള്ളിൽ 26 പേരുടെ ജീവൻ അപഹരിച്ച വന്യമൃഗ ആക്രമണങ്ങൾ സംസ്ഥാനത്ത് വർദ്ധിച്ചുവരുന്ന സാഹചര്യത്തിൽ, കാട്ടുപന്നികളെ നിയന്ത്രിതമായി കൊല്ലുന്നതിനെ അനുകൂലിച്ചുകൊണ്ടുള്ള മുഖ്യമന്ത്രി പിണറായി വിജയന്റെ പ്രസ്താവന, മനുഷ്യവികസനവും വന്യജീവി സംരക്ഷണവും സന്തുലിതമാക്കുന്നതിനെക്കുറിച്ചുള്ള ചർച്ചകൾക്ക് തിരികൊളുത്തിയിരിക്കുന്നു. നിയന്ത്രിത വേട്ടയാടൽ സംബന്ധിച്ച മുഖ്യമന്ത്രിയുടെ നിർദ്ദേശത്തെ സഭയും കർഷകരും സ്വാഗതം ചെയ്യുമ്പോൾ, കർശനമായ ശാസ്ത്രീയ ന്യായീകരണവും പൂർണ്ണമായ നിയമപരമായ പരിശോധനയും നടത്താത്ത പക്ഷം വന്യജീവി വേട്ടയോ ജനസംഖ്യാ നിയന്ത്രണമോ ഉൾപ്പെടുന്ന ഏതൊരു നയ നിർദ്ദേശത്തിനും മൊറട്ടോറിയം ഏർപ്പെടുത്തണമെന്ന് സംരക്ഷണ പ്രവർത്തകർ ആവശ്യപ്പെട്ടു.

മൃഗങ്ങളെ കൊന്നൊടുക്കുന്നത് സംബന്ധിച്ച് മുഖ്യമന്ത്രിയുടെ അഭിപ്രായം വലിയ ചർച്ചകൾക്ക് വഴിയൊരുക്കിയിരിക്കെ, വനത്തോട്ടങ്ങളെ സ്വാഭാവിക വനങ്ങളാക്കി മാറ്റി വന്യജീവികളുടെ ആവാസവ്യവസ്ഥ പുനഃസ്ഥാപിക്കുന്നതിനുള്ള നടപടികൾ മൃഗാവകാശ പ്രവർത്തകർ ആവശ്യപ്പെടുന്നു. വന്യമൃഗങ്ങൾ മനുഷ്യവാസ കേന്ദ്രങ്ങളിൽ പ്രവേശിക്കുന്നത് തടയാൻ തടസ്സങ്ങൾ സൃഷ്ടിക്കണമെന്നും അവർ ആവശ്യപ്പെടുന്നു.

മുഖ്യമന്ത്രിയുടെ പ്രസ്താവന, സഭയുടെ നിലപാട് ശറിവെക്കുന്നതാണെന്ന് ആ അഭിപ്രായത്തെ സ്വാഗതം ചെയ്തുകൊണ്ട് തലശ്ശേരി ആർച്ച് ബിഷപ്പ് മാർ ജോസഫ് പാംപ്ലാനി പറഞ്ഞു, “കാട്ടുപന്നികൾ, മയിലുകൾ, കുരങ്ങുകൾ എന്നിവ അപകടകരമായ തോതിൽ പെരുകുന്നു, അവ വനത്തിന്റെ അരികുകളിൽ നിന്ന് ഇടനാടുകളിലേക്ക് വ്യാപിച്ചിരിക്കുന്നു. ഈ മൃഗങ്ങൾ വിളകൾ നശിപ്പിക്കുകയും കർഷകരുടെ ഉപജീവനമാർഗ്ഗം ഇല്ലാതാക്കുകയും ചെയ്യുന്നു. അതിനാൽ അവയുടെ എണ്ണം നിയന്ത്രിക്കാൻ സർക്കാർ നിയന്ത്രിതമായി കൊല്ലാൻ ഉത്തരവിടണമെന്ന് ഞങ്ങൾ ആവശ്യപ്പെട്ടു. ആനകളുടെയും കടുവകളുടെയും എണ്ണം മൂന്നിരട്ടിയായി വർദ്ധിച്ചു. വിവേചനരഹിതമായ കൊലപാതകം ഞങ്ങൾ ആവശ്യപ്പെടുന്നില്ല. എന്നാൽ വനങ്ങളുടെ വാഹകശേഷിയെ അടിസ്ഥാനമാക്കി സർക്കാർ മൃഗങ്ങളുടെ എണ്ണം നിയന്ത്രിക്കണം.

കടുവകളെയും ആനകളെയും മയക്കി, മറ്റ് സംരക്ഷിത വനങ്ങളിലേക്ക് മാറ്റുകയും വേണം. വന്യമൃഗങ്ങൾ മനുഷ്യവാസ കേന്ദ്രങ്ങളിൽ പ്രവേശിക്കുന്നത് തടയാൻ ആന മതിലുകളും കിടങ്ങുകളും നിർമ്മിക്കണം, ”അദ്ദേഹം പറഞ്ഞു.

"വന്യമൃഗങ്ങളുടെ സംരക്ഷണത്തിൽ വനം വകുപ്പ് ശ്രദ്ധ കേന്ദ്രീകരിക്കുന്നുണ്ട്, ഇത് അവയുടെ വ്യാപനത്തിന് കാരണമായി. എന്നാൽ വന്യമൃഗങ്ങളുടെ എണ്ണത്തിലെ വർദ്ധനവ് കർഷകരുടെ ജീവിതത്തെയും ഉപജീവനമാർഗ്ഗത്തെയും ബാധിച്ചു. വന്യജീവികളുടെ എണ്ണം നിയന്ത്രിക്കുന്നതിന് ഒരു സന്തുലിതാവസ്ഥ ഉണ്ടായിരിക്കണം. അവയുടെ വർദ്ധന നിയന്ത്രിക്കുന്നതിന് അവയെ കൊല്ലുന്നതിനെ ഞങ്ങൾ അനുകൂലിക്കുന്നു," കേരള കാത്തലിക് ബിഷപ്പ്സ് കൗൺസിൽ (കെസിബിസി) ഡെപ്യൂട്ടി സെക്രട്ടറി ജനറൽ ഫാദർ തോമസ് തറയിൽ പറഞ്ഞു.

വന്യമൃഗങ്ങളുടെ എണ്ണം നിയന്ത്രിക്കാൻ വേട്ടയാടൽ അനുവദിക്കണമെന്ന് ഞങ്ങൾ ആവശ്യപ്പെട്ടുവരികയാണ്. കേന്ദ്ര സർക്കാരിനെ കുറ്റപ്പെടുത്താതെ, കർഷകരെ സംരക്ഷിക്കാൻ സംസ്ഥാന സർക്കാർ മുൻകൈയെടുക്കണം.വന്യജീവി സംരക്ഷണ നിയമത്തിലെ സെക്ഷൻ 11 (2) പ്രകാരം സ്വയം പ്രതിരോധത്തിനായി വന്യമൃഗങ്ങളെ കൊല്ലുന്നത് കുറ്റകരമല്ല. ഈ വ്യവസ്ഥ പരിഗണിച്ച്, സ്വയം പ്രതിരോധത്തിനായി വന്യമൃഗങ്ങളെ കൊല്ലുന്ന കർഷകരെ ഉപദ്രവിക്കരുതെന്ന് വനം വകുപ്പ് ഉദ്യോഗസ്ഥർക്ക് സർക്കാർ നിർദ്ദേശം നൽകണമെന്ന് കേരള ഇൻഡിപെൻഡന്റ് ഫാർമേഴ്‌സ് അസോസിയേഷൻ (കിഫ) ചെയർമാൻ അലക്സ് ഒഴുകയിൽ പറഞ്ഞു.

വേട്ടയാടലിനെ പ്രോത്സാഹിപ്പിക്കുന്ന മുഖ്യമന്ത്രിയുടെ പ്രസ്താവന വന്യമൃഗങ്ങളെ വിവേചനരഹിതമായി കൊല്ലുന്നതിലേക്ക് നയിക്കുമെന്ന് പരിസ്ഥിതി പ്രവർത്തകരുടെ സംഘടനയായ കോഎക്സിസ്റ്റൻസ് കളക്ടീവ് മുന്നറിയിപ്പ് നൽകി. വന്യജീവി പരിപാലനത്തിന് ശാസ്ത്രീയമായി നയിക്കപ്പെടുന്നതും പരിസ്ഥിതി സൗഹൃദപരവും നിയമപരമായി ശക്തവുമായ ഒരു സമീപനം കേരളത്തിന് ആവശ്യമാണെന്ന് അവർ പറഞ്ഞു.

"വേട്ടയാടൽ പോലുള്ള പ്രതിലോമകരമായ നടപടികൾ ഒഴിവാക്കാനും, പകരം മനുഷ്യരെയും വന്യജീവികളെയും സംരക്ഷിക്കുകയും വരും തലമുറകൾക്കായി സംസ്ഥാനത്തിന്റെ അമൂല്യമായ പ്രകൃതി പൈതൃകം സംരക്ഷിക്കുകയും ചെയ്യുന്ന ശാസ്ത്രീയവും, കാരുണ്യപരവും, നിയമപരമായി നല്ലതുമായ പരിഹാരങ്ങൾ പരിഗണിക്കണമെന്ന് ഞങ്ങൾ സംസ്ഥാന സർക്കാരിനോട് അഭ്യർത്ഥിക്കുന്നു. വന്യജീവി നിയന്ത്രണ നടപടികൾ പ്രഖ്യാപിക്കുന്നതിനോ നടപ്പിലാക്കുന്നതിനോ മുമ്പ് പരിസ്ഥിതി ശാസ്ത്രജ്ഞർ, നിയമ വിദഗ്ധർ, ഗോത്ര പ്രതിനിധികൾ, പരിസ്ഥിതി സിവിൽ സൊസൈറ്റി ഗ്രൂപ്പുകൾ എന്നിവരെ ഉൾപ്പെടുത്തി സുതാര്യവും പങ്കാളിത്തപരവുമായ നയ അവലോകനം നടത്തണം, ”എന്ന് സംസ്ഥാന സർക്കാരിന് അയച്ച കത്തിൽ ഈ കൂട്ടായ്മ ആവശ്യപ്പെട്ടു.

"വയനാടിലെ കടുവകളുടെ എണ്ണം 2018-ൽ 120 ആയിരുന്നത് 2023-ൽ വെറും 84 ആയി കുറഞ്ഞു, ഏകദേശം 30% കുറവ്. സംസ്ഥാനമൊട്ടാകെ, 2018 നും 2023 നും ഇടയിൽ കടുവകളുമായി ബന്ധപ്പെട്ട സംഭവങ്ങളിൽ മനുഷ്യ മരണങ്ങളെ (6) അപേക്ഷിച്ച് കടുവകളുടെ മരണനിരക്ക് (45) ഗണ്യമായി കൂടുതലാണ്.ഏറ്റവും പുതിയ ശാസ്ത്രീയ വിലയിരുത്തൽ കാണിക്കുന്നത് വയനാട്ടിലെ കടുവ സാന്ദ്രത 2018 ൽ 100 ​​ചതുരശ്ര കിലോമീറ്ററിന് 9.33 ൽ നിന്ന് 2023 ൽ 100 ​​ചതുരശ്ര കിലോമീറ്ററിന് 7.7 ആയി കുറഞ്ഞു എന്നാണ്.ആവാസവ്യവസ്ഥയുടെ കൈയേറ്റം, ഇവയുടെ സഞ്ചാരപഥങ്ങളുടെ തുണ്ടുവൽക്കരണം , വിഷം കൊടുത്തും കെണി വച്ചുമുള്ള മനഃപൂർവമായ കൊലപാതകങ്ങൾ എന്നിവയാണ് ഈ വലിയ കുറവിന് കാരണമെന്ന്," വയനാട് പ്രകൃതി സംരക്ഷണ സമിതി പ്രസിഡന്റ് എൻ ബാദുഷ പറഞ്ഞു.

"കഴിഞ്ഞ അഞ്ച് വർഷത്തിനിടെ കേരളത്തിലെ കാട്ടാനകളുടെ എണ്ണം 58% കുറഞ്ഞു - 2017-ൽ 5,706 ആയിരുന്നത് 2023-ൽ വെറും 2,386 ആയി. 2024-ലെ സമന്വയിപ്പിച്ച സെൻസസ് പ്രകാരം കേരളത്തിൽ 1,793 കാട്ടാനകൾ മാത്രമേ ഉള്ളൂ എന്നാണ് കണക്കാക്കുന്നത്, ആവാസവ്യവസ്ഥയുടെ നഷ്ടം, വൈദ്യുതാഘാതം, വിഷബാധ, മറ്റ് മനുഷ്യനിർമിത ഘടകങ്ങൾ എന്നിവ മൂലമുള്ള മരണങ്ങൾ ആനകളുടെ ആക്രമണങ്ങളിൽ കൊല്ലപ്പെടുന്ന മനുഷ്യരുടെ എണ്ണത്തേക്കൾവളരെ കൂടുതലാണ്.2016 മുതൽ 2024 വരെ കേരളത്തിൽ മനുഷ്യ-ആന സംഘർഷത്തിൽ 139 മനുഷ്യ മരണങ്ങളും 763 ആന മരണങ്ങളും രേഖപ്പെടുത്തിയിട്ടുണ്ടെന്ന്" വന്യജീവി സംരക്ഷണ, സംരക്ഷണ ഗ്രൂപ്പ് കോർഡിനേറ്റർ എസ് ഗുരുവായൂരപ്പൻ പറഞ്ഞു.

"കേരളത്തിലെ മനുഷ്യ വന്യജീവി സംഘർഷത്തിന്റെയും ജന്തുജന്യ പകർച്ചവ്യാധികളുടെയും മൂലകാരണങ്ങളെക്കുറിച്ച് സർക്കാർ സ്വതന്ത്രവും ബഹുമുഖവുമായ ഒരു പഠനം നടത്തണം, ആവാസവ്യവസ്ഥയുടെ തകർച്ച, ഭൂവിനിയോഗ മാറ്റം, അധിനിവേശ ജീവിവർഗങ്ങൾ, കാലാവസ്ഥാ ആഘാതങ്ങൾ എന്നിവയിൽ ശ്രദ്ധ കേന്ദ്രീകരിക്കണം.വന്യജീവി വേട്ടയോ ജനസംഖ്യാ നിയന്ത്രണമോ ഉൾപ്പെടുന്ന ഏതൊരു നയ നിർദ്ദേശത്തിനും കർശനമായ ശാസ്ത്രീയ ന്യായീകരണവും പൂർണ്ണമായ നിയമപരമായ പരിശോധനയും നടത്താത്ത പക്ഷം ഒരു മൊറട്ടോറിയം ഏർപ്പെടുത്തണം, ”എന്ന് സൊസൈറ്റി ഫോർ ദ് പ്രിവൻഷൻ ഓഫ് ക്രുവൽറ്റി ടു ആനിമൽസ് (SPCA) അംഗം എം എൻ ജയചന്ദ്രൻ പറഞ്ഞു.

കേരളത്തിലെ കടുവകളുടെ എണ്ണം

2018: 190

2022: 213

2018 മുതൽ 2022 വരെ കേരളത്തിൽ കടുവകളുടെ മരണം - 45

2018-22 കാലയളവിൽ കടുവകളുടെ ആക്രമണത്തിൽ മനുഷ്യർക്ക് പരിക്കേറ്റത്: ആറ്

വയനാട്ടിലെ കടുവകളുടെ എണ്ണം

2018: 120

2022: 84

2016 മുതൽ 2024 വരെയുള്ള കാലയളവിൽ കാട്ടാനകളുടെ മരണസംഖ്യ: 763

2016 മുതൽ 2024 വരെയുള്ള കാലയളവിൽ ആനകളുടെ ആക്രമണത്തിൽ മരിച്ച മനുഷ്യരുടെ എണ്ണം: 139

2017-ൽ കാട്ടാനകളുടെ എണ്ണം: 5,706

2024-ൽ കാട്ടാനകളുടെ എണ്ണം: 1,793