വെള്ള കടലാമയെ കണ്ടെത്തി, അപൂര്‍വ്വം; വൈറലായി ചിത്രങ്ങള്‍ 

അപൂര്‍വ്വമായി മാത്രം കാണുന്ന വെള്ള കടലാമയുടെ ചിത്രങ്ങളാണ് സോഷ്യല്‍ മീഡിയയില്‍ വൈറലാകുന്നത്. സൗത്ത് കരോളിന ബീച്ചിലാണ് ആമയെ കണ്ടത്. കടല്‍തീരത്ത് വച്ച് പകര്‍ത്തിയ ചിത്രങ്ങളാണ് ഫേസ്ബുക്കില്‍ ശ്രദ്ധനേടുന്നത്.  

ടൗണ്‍ ഓഫ് കിയാവ ഐലന്റ് എസ് സി എന്ന പേജാണ് ചിത്രങ്ങള്‍ പുറത്തുവിട്ടത്. ലിയൂസിസം ഇന്ന ജനിതക വൈകല്യമുള്ള ആമയാണ് ഇതെന്നാണ് കരുതുന്നത്. ഈ പ്രതിഭാസമാണ് ആമയുടെ വെള്ള നിറത്തിന് കാരണം. എന്നാല്‍ ഇത് ആല്‍ബനിസം എന്ന അവസ്ഥയില്‍ നിന്ന് വ്യത്യസ്തമാണെന്ന് ഫേസ്ബുക്ക് പോസ്റ്റില്‍ പറയുന്നു. ആമയെ കടലില്‍ തന്നെ ഉപേക്ഷിച്ചെന്നും ഇവര്‍ പറഞ്ഞു. 

ആല്‍ബനിസം, ലിയൂസിസം തുടങ്ങിയ അവസ്ഥകള്‍ മൂലമുണ്ടാകുന്ന നിറവ്യത്യാസം മൃഗങ്ങള്‍ക്ക് ഇരപിടിയന്മാരില്‍ നിന്നുള്ള അതിജീവനം ദുഷ്‌കരമാക്കും. ആമ വളരെ ക്യൂട്ട് ആണെന്നും ചിത്രങ്ങള്‍ മികച്ചതാണെന്നും കുറിച്ച് നിരവധിപ്പേരാണ് ഫോട്ടോകള്‍ ഷെയര്‍ ചെയ്യുന്നത്.