കാന്താരി ഇങ്ങനെ കൃഷി ചെയ്തു നോക്കൂ, വിളവ് ഇരട്ടിയാവും

കാന്താരിയെ മലയാളികള്‍ക്ക് അങ്ങനെ പ്രത്യേകിച്ച് പരിചയപ്പെടുത്തേണ്ട കാര്യമൊന്നുമില്ല. ഒട്ടുമിക്ക വീടുകളിലും അടുക്കളത്തോട്ടത്തിലെ സ്ഥിരം ഇനമാണ് ഈ കുഞ്ഞന്‍ മുളക്. എരിവു മാത്രമല്ല, ഔഷധ ഗുണങ്ങള്‍ കൂടിയാണ് കാന്താരിയെ പ്രിയപ്പെട്ടതാക്കുന്നത്. അല്‍പ്പം ശ്രദ്ധിച്ചു കൃഷി ചെയ്താല്‍ ചെടി നിറയെ കായ്ച് മികച്ച വിളവു തരും കാന്താരി.

രണ്ടാഴ്ച ഇടവിട്ട് വിളവെടുപ്പ്

നടീല്‍ കഴിഞ്ഞ് രണ്ടു മാസത്തിനകം കാന്താരി പൂവിടും. മൂന്നു മാസം മുതല്‍ വിളവെടുപ്പ് നടത്താം. ഒരു ചെടിയില്‍നിന്ന് ഇരുന്നൂറു ഗ്രാം വരെ മുളക് ഒരു വിളവെടുപ്പില്‍ ലഭിക്കും. രണ്ടാഴ്ച ഇടവിട്ട് വിളവെടുക്കാം. നാലോ അഞ്ചോ വര്‍ഷം വരെ ഒരു ചെടിയില്‍നിന്നു വിളവു ലഭിക്കും.

കൃഷിരീതി

നേരിട്ടു വെയില്‍ ലഭിക്കുന്ന പ്രദേശമാണ് കാന്താരി നടാന്‍ നല്ലത്. കൂടുതല്‍ തണലില്ലാത്ത സ്ഥലങ്ങളിലും മോശമല്ലാത്ത വിളവു ലഭിക്കും. നല്ല വളക്കൂറുള്ള പശിമരാശി മണ്ണാണ് കൃഷിക്ക് യോജ്യം. കാന്താരി ഒരു ഉഷ്ണകാല വിളയാണ്. 35-40 ദിവസം പ്രായമായ തൈകളാണ് നടീലിന് ഉപയോഗിക്കേണ്ടത്.

വളപ്രയോഗം

അടിവളമായി ചാണകമോ കമ്പോസ്‌റ്റോ ചേര്‍ക്കാം. യൂറിയ, മിശ്രവളങ്ങള്‍ എന്നിവയും അടിവളമായി ഉപയോഗിക്കാം. ചെടിയുടെ വളര്‍ച്ചും മികച്ച വിളവിനും ജലസേചനം അത്യാവശ്യമാണ്. ഓരോ മാസവും രാസവള മിശ്രിതമോ ജൈവ വളക്കൂട്ടുകളോ ചേര്‍ത്തു നല്‍കണം.

കീട നിയന്ത്രണം

മണ്ഡരി, മുഞ്ഞ, ഇലപ്പേന്‍, വെള്ളീച്ച തുടങ്ങിയ കീടങ്ങളാണ് പ്രധാനമായും കാന്താരിയെ ആക്രമിക്കുന്നത്. ഇവയ്‌ക്കെതിരെ കരുതല്‍ വേണം.

ഔധഷ മൂല്യം

വാതം, അജീര്‍ണം, പൊണ്ണത്തടി, വായുക്ഷോഭം എന്നിവയ്ക്കുള്ള ഔഷധമായി കാന്താരി ഇപ്പോള്‍ ഉപയോഗിക്കുന്നുണ്ട്. കൊളസ്‌ട്രോളിന്റെ അളവ് കുറയ്ക്കാനും ഇത് സഹായിക്കുമെന്ന് ചൂണ്ടിക്കാണിക്കപ്പെടുന്നുണ്ട്. രക്ത ശുദ്ധി, ഹൃദയാരോഗ്യം എന്നിവയ്ക്കും കാന്താരി ഗുണം ചെയ്യും. വിദേശ വിപണിയില്‍ ഉള്‍പ്പെടെ ഇപ്പോള്‍ കാന്താരിക്ക് ആവശ്യക്കാരുണ്ട്.