തണുപ്പുള്ള പ്രദേശങ്ങളില് മാത്രം വളരുന്ന ഒന്നാണ് ക്യാരറ്റ് എന്നാണ് പൊതുധാരണ. എന്നാല് ശരിയായ പരിചരണവും അനുയോജ്യമായ മണ്ണും നല്കിയാല് നമ്മുടെ നാട്ടിലെ കാലാവസ്ഥയില് വീട്ടിലെ ഗ്രോബാഗിലും സമൃദ്ധമായി ക്യാരറ്റ് വിളയിച്ചെടുക്കാം. കുറഞ്ഞ സ്ഥലസൗകര്യമുള്ളവര്ക്കും ടെറസ് ഗാര്ഡന് ചെയ്യുന്നവര്ക്കും അനുയോജ്യമായ രീതിയാണിത്.
ക്യാരറ്റ് മണ്ണിലേക്ക് ആഴത്തില് ഇറങ്ങി വളരുന്ന വിളയായതിനാല് ഗ്രോബാഗിന്റെ വലിപ്പം പ്രധാനമാണ്. കുറഞ്ഞത് 12 മുതല് 15 ഇഞ്ച് വരെ ആഴമുള്ള ഗ്രോബാഗുകള് വേണം ഉപയോഗിക്കാന്. വേരുകള് അഴുകിപ്പോകാതിരിക്കാന് അധികജലം വാര്ന്നുപോകാനുള്ള ദ്വാരങ്ങള് ബാഗിന്റെ അടിയില് ഉണ്ടെന്ന് ഉറപ്പാക്കുക.
മണ്ണ് ഒരുക്കുന്ന രീതി
കട്ടിയുള്ള മണ്ണോ കല്ലുകളോ തടസ്സമായാല് ക്യാരറ്റ് വളഞ്ഞുപോകാന് സാധ്യതയുണ്ട്. അതിനാല് ഇളക്കമുള്ള മണ്ണു മിശ്രിതം തയ്യാറാക്കണം.
40% ചകിരിച്ചോര്
30% ചാണകപ്പൊടി അല്ലെങ്കില് കമ്പോസ്റ്റ്
30% മേല്മണ്ണ് അല്ലെങ്കില് മണല്
മണ്ണിലെ ചെറിയ കല്ലുകളും കട്ടകളും പൂര്ണമായും നീക്കം ചെയ്ത ശേഷം വേണം മിശ്രിതം ഗ്രോബാഗിലേക്ക് നിറയ്ക്കാന്.
ക്യാരറ്റ് വിത്തുകള് വളരെ ചെറുതായതിനാല് വിതറാന് ബുദ്ധിമുട്ടാണ്. ഇതിനായി വിത്തുകള് അല്പം ഉണങ്ങിയ മണലുമായി ചേര്ത്ത് ഗ്രോബാഗിലേക്ക് വിതറാം. അതിനുശേഷം കാല് ഇഞ്ച് കനത്തില് മാത്രം മുകളില് മണ്ണ് വിതറി മൂടുക.
നനയും പരിചരണവും
വിത്ത് ഒഴുകിപ്പോകാതിരിക്കാന് തുടക്കത്തില് സ്പ്രെയര് ഉപയോഗിച്ച് മാത്രം വെള്ളം തളിക്കുക. മണ്ണില് എപ്പോഴും നേരിയ ഈര്പ്പം നിലനിര്ത്തണം. 10 മുതല് 14 ദിവസത്തിനകം വിത്തുകള് മുളച്ചുവരും. തൈകള് രണ്ടിഞ്ച് ഉയരമെത്തുമ്പോള്, ആരോഗ്യം കുറഞ്ഞവ പിഴുതുമാറ്റി തൈകള് തമ്മില് 2-3 ഇഞ്ച് അകലം ഉറപ്പാക്കണം. എങ്കില് മാത്രമേ ക്യാരറ്റിന് നല്ല വണ്ണം വെയ്ക്കൂ. ദിവസവും കുറഞ്ഞത് 5-6 മണിക്കൂര് നേരിട്ട് സൂര്യപ്രകാശം ലഭിക്കുന്ന സ്ഥലത്ത് ഗ്രോബാഗ് വെക്കുക. വെള്ളം കെട്ടിക്കിടക്കാന് അനുവദിക്കരുത്.
വിത്ത് പാകി 70 മുതല് 90 ദിവസത്തിനുള്ളില് ക്യാരറ്റ് വിളവെടുക്കാം. ക്യാരറ്റിന്റെ മുകള്ഭാഗം മണ്ണില് നിന്ന് നേരിയതോതില് ഉയര്ന്നു കാണുമ്പോള് ചെടിയുടെ ചുവട്ടില് പിടിച്ച് പതുക്കെ വലിച്ച് വിളവെടുക്കാവുന്നതാണ്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
