നഗരത്തിലെ ഫ്ളാറ്റില് നിന്നോ ചെറിയ വീട്ടില് നിന്നോ പുറത്തേക്ക് നോക്കിയാല് വലിയ കോണ്ക്രീറ്റ് കാടുകള് മാത്രം. ഒരുതരി മണ്ണോ പച്ചപ്പോ കാണാന് കിട്ടാത്ത വിഷമം. അപ്പോഴാണ് തൊണ്ട നനയ്ക്കാന് ഒരു ഗ്ലാസ് തണുത്ത നാരങ്ങാവെള്ളം കുടിക്കാന് തോന്നുന്നത്. പെട്ടെന്ന് ബാല്ക്കണിയിലേക്ക് ചെന്ന്, സ്വന്തം കൈകൊണ്ട് നട്ടുവളര്ത്തിയ മരത്തില് നിന്ന് ഒരു പഴുത്ത നാരങ്ങ പറിച്ചെടുത്ത് ജ്യൂസ് ഉണ്ടാക്കാന് കഴിഞ്ഞാലോ? ആ അനുഭൂതി ഒന്ന് വേറെ തന്നെയാണ്.
നഗരവാസികളുടെയും ഫ്ളാറ്റില് താമസിക്കുന്നവരുടെയും ഈ കൊതി മാറ്റാന് എവിടെയും കൃഷി ചെയ്യാവുന്ന ഒന്നാണ് കുള്ളന് നാരങ്ങാമരം അഥവാ ഡ്വാര്ഫ് ലെമണ് ട്രീ. വലിയ പറമ്പോ വിശാലമായ തോട്ടമോ ഇല്ലാത്തവര്ക്ക് കുറഞ്ഞ സ്ഥലത്തുനിന്ന് മികച്ച വിളവെടുപ്പ് സാധ്യമാക്കുന്ന ഫലവൃക്ഷമാണിത്.
എല്ലാ നാരക ഇനങ്ങളും ചട്ടിയിലെ കൃഷിക്ക് അനുയോജ്യമാകണമെന്നില്ല. എന്നാല് നമ്മുടെ നാട്ടിലെ കാലാവസ്ഥയിലും ടെറസിലും ബാല്ക്കണിയിലും ചട്ടികളില് വളരെ എളുപ്പത്തില് വളര്ത്തി മികച്ച വിളവ് എടുക്കാവുന്ന മികച്ച ഡ്വാര്ഫ് ഇനങ്ങള് ഇന്ന് ലഭ്യമാണ്. തൈ വാങ്ങുമ്പോള് ഇതേക്കുറിച്ച് കൃത്യമായി മനസ്സിലാക്കേണ്ടതുണ്ട്.
ശ്രദ്ധിക്കേണ്ട കാര്യങ്ങള്
നാരകച്ചെടികള്ക്ക് ദിവസം കുറഞ്ഞത് 6 മുതല് 8 മണിക്കൂര് വരെ നേരിട്ടുള്ള വെയില് അത്യാവശ്യമാണ്. ഇതിനായി തെക്ക് വശത്തുള്ള ബാല്ക്കണിയോ വെളിച്ചം നന്നായി ലഭിക്കുന്ന ഇടങ്ങളോ തെരഞ്ഞെടുക്കാം. എങ്കിലും കടുത്ത വേനല്ക്കാലത്ത് ഉച്ചയ്ക്കുള്ള കടുത്ത വെയിലില് നിന്ന് ചെറിയൊരു തണല് നല്കുന്നത് നല്ലതാണ്.
വേരുകള് നന്നായി പടരുന്നതിനായി കുറഞ്ഞത് 12 മുതല് 16 ഇഞ്ച് വരെ വ്യാസമുള്ള വലിയ ചട്ടികള് വേണം തെരഞ്ഞെടുക്കാന്. വെള്ളം കെട്ടിക്കിടക്കാത്ത, ചെറുതായി അമ്ലഗുണമുള്ള മണ്ണാണ് നാരക കൃഷിക്ക് ഏറ്റവും അനുയോജ്യം. നാരകച്ചെടികള് നനയ്ക്കുമ്പോള് മണ്ണ് പൂര്ണമായും കുതിര്ന്നിട്ടുണ്ടെന്ന് ഉറപ്പാക്കുക. എന്നാല് വെള്ളം കെട്ടിക്കിടന്ന് വേരുകള് ചീഞ്ഞുപോകാതിരിക്കാന് ചട്ടിയുടെ അടിയിലെ ഡ്രെയിനേജ് ഹോള് തുറന്നിരിക്കാന് പ്രത്യേകം ശ്രദ്ധിക്കണം. ചാണകപ്പൊടിയോ കമ്പോസ്റ്റോ ഒപ്പം പെര്ലൈറ്റ്, പീറ്റ് മോസ് എന്നിവ ചേര്ത്ത മിശ്രിതം വേരുകള് ചീയുന്നത് തടയാന് സഹായിക്കും.
ക്ഷമയോടെയുള്ള കാത്തിരിപ്പും വിളവെടുപ്പും
ഒരു ചെറിയ നാരകച്ചെടി ആദ്യമായി പൂക്കാന് ഒരു വര്ഷമോ അതില് കൂടുതലോ എടുത്തേക്കാം. ഒരിക്കല് നന്നായി വേരുപിടിച്ചു വളര്ന്നു കഴിഞ്ഞാല്, വര്ഷങ്ങളോളം തുടര്ച്ചയായി പുതിയ നാരങ്ങകള് നല്കാന് ഈ കുള്ളന് മരങ്ങള്ക്ക് സാധിക്കും.
തുടക്കത്തില് ചെടിയില് നിന്ന് ചെറിയ കായ്കള് കൊഴിയുന്നത് കണ്ട് വിഷമിക്കേണ്ടതില്ല. ചെടിക്ക് താങ്ങാന് കഴിയുന്നത്ര കായ്കള് മാത്രം നിര്ത്തി ബാക്കി സ്വയം കൊഴിച്ചു കളയുന്നത് അതിന്റെ സ്വാഭാവിക വളര്ച്ചാ രീതിയാണ്. ഇനി എന്തിന് മടിക്കണം? അടുത്ത അവധിക്ക് ഒരു കുള്ളന് നാരങ്ങാമരം വാങ്ങി നിങ്ങളുടെ ബാല്ക്കണിയും പച്ചപ്പിലാക്കൂ..
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
