പയ്യന്നൂരിൽ കാറും സ്കൂട്ടറും കൂട്ടിയിടിച്ച് യുവതി മരിച്ചു

കണ്ണൂർ: പയ്യന്നൂർ ആലപ്പടമ്പിൽ കാറും സ്കൂട്ടറും കൂട്ടിയിടിച്ച് സ്കൂട്ടർ യാത്രക്കാരിയായ യുവതി മരിച്ചു. മാത്തിൽ വടശ്ശേരി മുക്കിലെ ടി.വി ഷീന (37) ആണ് മരിച്ചത്. കഴിഞ്ഞദിവസം രാത്രി 7.10-ഓടെ ആലപ്പടമ്പ് കിണർ മുക്ക് ട്രാൻസ്ഫോർമറിന് സമീപത്തായിരുന്നു അപകടം. ചീമേനി ഭാഗത്തുനിന്ന് മാത്തിൽ ഭാഗത്തേക്ക് പോകുകയായിരുന്ന ഷീന സഞ്ചരിച്ച സ്കൂട്ടറിൽ എതിരെ വന്ന കാർ ഇടിക്കുകയായിരുന്നു. ഇടിയുടെ ആഘാതത്തിൽ റോഡിലേക്ക് തെറിച്ചുവീണ് ഗുരുതരമായി പരിക്കേറ്റ ഷീനയെ ഉടൻ തന്നെ സമീപത്തെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

കേരള സ്റ്റേറ്റ് റോഡ് ട്രാൻസ്പോർട്ട് കോർപ്പറേഷൻ (കെ.എസ്.ആർ.ടി.സി) പയ്യന്നൂർ ഡിപ്പോയിലെ ജീവനക്കാരനായ കെ.എ ബിജുവാണ് ഭർത്താവ്. മക്കൾ: ടി.വി ആർദ്ര, ലക്ഷ്മി. അച്ഛൻ: എ.വി രവീന്ദ്രൻ, അമ്മ: ലളിത. സഹോദരങ്ങൾ: വിനീത്, പ്രസൂന, ദേവാഞ്ജന.