തീരദേശപാതയിൽ കുന്നിടിഞ്ഞുവീണ് കാറും ബൈക്കും തകർന്നു; മൂന്ന് പേർക്ക് പരിക്ക്

ഉദുമ: കാസർകോട് - കാഞ്ഞങ്ങാട് തീരദേശ സംസ്ഥാന പാതയിൽ കനത്ത മഴയെത്തുടർന്ന് റോഡരികിലെ കുന്നിടിഞ്ഞുവീണ് വൻ അപകടം. മേൽപറമ്പ് ചളിയംകോട് കോട്ടരുവത്ത് ബുധനാഴ്ച രാവിലെ ഒൻപത് മണിയോടെയാണ് സംഭവം. പാതയിലൂടെ കടന്നുപോവുകയായിരുന്ന ഒരു കാറിനും ബൈക്കിനും മുകളിലേക്ക് മണ്ണും കല്ലും ഇടിഞ്ഞുവീഴുകയായിരുന്നു. അപകടത്തിൽ വാഹനങ്ങളിലുണ്ടായിരുന്ന മൂന്ന് പേർക്ക് പരിക്കേറ്റു. ഇവരുടെ പരിക്ക് ഗുരുതരമല്ലെന്നാണ് പ്രാഥമിക വിവരം.

കനത്ത മഴ തുടരുന്നതിനിടയിലാണ് കോട്ടരുവത്ത് റോഡരികിലെ വലിയ കുന്ന് പെട്ടെന്ന് റോഡിലേക്ക് ഇടിഞ്ഞു പതിച്ചത്. ഈ സമയം റോഡിലൂടെ വരികയായിരുന്ന കാറും ബൈക്കും പൂർണ്ണമായും മണ്ണിനടിയിലാവുകയായിരുന്നു. യാത്രക്കാർ അതിവേഗം വാഹനങ്ങളിൽ നിന്നും പുറത്തേക്ക് മാറിയതിനാലും മൺതിട്ടയുടെ വലിയൊരു ഭാഗം വീഴാതിരുന്നതിനാലും മാത്രമാണ് വൻ ദുരന്തം തലനാരിഴയ്ക്ക് ഒഴിവായത്.