ചരിത്രത്തിന്റെ പാതകളിലൂടെ പെഡൽ ചവിട്ടി കളക്ടറും സംഘവും; 'കാസർഗോഡ് ഫോർട്ട് റൈഡ് 2026' പൈതൃക യാത്ര ശ്രദ്ധേയമായി

കാസർഗോഡ്: ലോക സൈക്കിൾ ദിനാചരണത്തിന്റെ ഭാഗമായി കാസർഗോഡിന്റെ സമ്പന്നമായ ചരിത്ര പൈതൃകവും കായിക-വിനോദസഞ്ചാര സാധ്യതകളും ഒരുമിച്ച് ഉയർത്തിക്കാട്ടി സംഘടിപ്പിച്ച “കാസർഗോഡ് ഫോർട്ട് റൈഡ് 2026” പൈതൃക സൈക്കിൾ യാത്ര വിജയകരമായി പൂർത്തിയായി. ജില്ലാ ടൂറിസം പ്രമോഷൻ കൗൺസിൽ (DTPC), ജില്ലാ ഭരണകൂടം, കാസർഗോഡ് പെഡലേഴ്സ് സൈക്ലിംഗ് ക്ലബ് എന്നിവയുടെ സംയുക്താഭിമുഖ്യത്തിലാണ് ഈ വേറിട്ട സൈക്കിൾ യാത്ര സംഘടിപ്പിച്ചത്. ഞായറാഴ്ച രാവിലെ 6.15-ന് ചരിത്രപ്രസിദ്ധമായ പുതിയകോട്ടയിൽ വെച്ച് കാഞ്ഞങ്ങാട് മുനിസിപ്പൽ ചെയർപേഴ്സൺ വിവി രമേശൻ യാത്ര ഔദ്യോഗികമായി ഫ്ലാഗ് ഓഫ് ചെയ്തു. ജില്ലാ കളക്ടർ അർജുൻ പാണ്ഡ്യന്റെ നേരിട്ടുള്ള നേതൃത്വത്തിലാണ് സൈക്കിൾ പ്രേമികൾ യാത്ര നടത്തിയത്.

കാസർഗോഡ് പെഡലേഴ്സ് സൈക്ലിംഗ് ക്ലബ്ബിന്റെ നേതൃത്വത്തിൽ 26 സൈക്കിൾ പ്രേമികളാണ് ഈ പൈതൃക യാത്രയിൽ പങ്കെടുത്തത്. സൈക്ലിംഗ് ക്ലബ് സെക്രട്ടറി രതീഷ് അമ്പലത്തറ, ഭാരവാഹികളായ ശ്രീജിത്ത്, ശ്രീകാന്ത് തുടങ്ങിയവർ കളക്ടർക്കൊപ്പം സൈക്കിൾ യാത്രയിൽ അണിനിരന്നു. പുതിയകോട്ടയിൽ നടന്ന ഉദ്ഘാടന ചടങ്ങിൽ ടൂറിസം ഡെപ്യൂട്ടി ഡയറക്ടർ എ. നസീബ് അധ്യക്ഷത വഹിച്ചു. ജില്ലാ ടൂറിസം പ്രമോഷൻ കൗൺസിൽ സെക്രട്ടറി ജികെ.ജിജേഷ് ചടങ്ങിൽ സ്വാഗതം ആശംസിച്ചു. ജില്ലാ ഇൻഫർമേഷൻ ഓഫീസർ എം മധുസൂദനൻ, ജില്ലാ ശുചിത്വ മിഷൻ കോ-ഓർഡിനേറ്റർ പി. ജയൻ, വിവിധ ഡി.ടി.പി.സി. ഉദ്യോഗസ്ഥർ തുടങ്ങിയ പ്രമുഖരും ചടങ്ങിൽ പങ്കെടുത്തു.