മലപ്പുറത്തെ ഭൂരിഭാഗം സ്ത്രീകൾക്കും 'പ്രിയദർശിനി' അകലെ; 132 കെഎസ്ആർടിസി ബസുകളിൽ 27 എണ്ണം മാത്രം സൗജന്യ യാത്രയ്ക്ക്

മലപ്പുറം: സ്ത്രീകൾക്കായുള്ള യുഡിഎഫ് സർക്കാരിന്റെ സൗജന്യ ബസ് യാത്രാ പദ്ധതിയായ 'പ്രിയദർശിനി' മലപ്പുറം ജില്ലയിലെ ഭൂരിഭാഗം വനിതാ യാത്രക്കാർക്കും പ്രയോജനപ്പെടില്ല. ജില്ലയിലെ നാല് കെഎസ്ആർടിസി ഡിപ്പോകളിൽ നിന്ന് സർവീസ് നടത്തുന്ന 132 ബസുകളിൽ വെറും 27 ഓർഡിനറി ബസുകൾക്ക് മാത്രമാണ് പദ്ധതിയുടെ ആനുകൂല്യം ബാധകമാകുന്നത്. യാത്രക്കാർ കൂടുതലായി ആശ്രയിക്കുന്ന ടൗൺ ടു ടൗൺ (ടിടി) സർവീസുകൾ പദ്ധതിയുടെ പരിധിക്ക് പുറത്തായതിനാൽ സ്ത്രീകൾക്ക് വാഗ്ദാനം ചെയ്യുന്ന സൗജന്യ യാത്ര പ്രായോഗികമായി പരിമിതപ്പെടുകയാണ്.

കെഎസ്ആർടിസിയുടെ കണക്കുകൾ പ്രകാരം മലപ്പുറം, നിലമ്പൂർ, പൊന്നാനി, പെരിന്തൽമണ്ണ ഡിപ്പോകളിലായി ആകെ 132 ബസുകളാണ് സർവീസ് നടത്തുന്നത്. ഇതിൽ 27 എണ്ണം മാത്രമാണ് ഓർഡിനറി സർവീസുകൾ. ശേഷിക്കുന്നവയിൽ ഭൂരിഭാഗവും ടി.ടി. സർവീസുകളാണ്. ജില്ലയിൽ ഏറ്റവും കൂടുതൽ യാത്രക്കാർ ഉപയോഗിക്കുന്ന പ്രധാന റൂട്ടുകളിലാണ് ഈ സർവീസുകൾ ഓടുന്നതെങ്കിലും സൗജന്യ യാത്രാ പദ്ധതിയിൽ ഇവ ഉൾപ്പെടുത്തിയിട്ടില്ല.

പൊന്നാനി ഡിപ്പോയിൽ നിന്നുള്ള 11 ബസുകളും മലപ്പുറത്ത് നിന്നുള്ള എട്ട് ബസുകളും നിലമ്പൂരിൽ നിന്നുള്ള അഞ്ച് ബസുകളും പെരിന്തൽമണ്ണയിൽ നിന്നുള്ള മൂന്ന് ബസുകളുമാണ് പദ്ധതിക്ക് അർഹതയുള്ളത്. ഇതോടെ ജില്ലയിലെ കെഎസ്ആർടിസി സർവീസുകളുടെ അഞ്ചിലൊന്നിൽ താഴെ മാത്രമാണ് സ്ത്രീകൾക്ക് സൗജന്യ യാത്ര ലഭിക്കുക.

കോഴിക്കോട്, തൃശൂർ ഉൾപ്പെടെയുള്ള പ്രധാന കേന്ദ്രങ്ങളിലേക്ക് ദിവസേന യാത്ര ചെയ്യുന്ന ആയിരക്കണക്കിന് സ്ത്രീകൾ ഇപ്പോഴും ടി.ടി. ബസുകളെ ആശ്രയിക്കേണ്ടി വരും. ഈ സർവീസുകളിൽ സൗജന്യ യാത്ര അനുവദിക്കാത്തതിനാൽ പദ്ധതിയുടെ ഗുണഫലം വലിയൊരു വിഭാഗം യാത്രക്കാരിലേക്ക് എത്തില്ലെന്നാണ് വിലയിരുത്തൽ

പൊന്നാനി–തിരൂർ, മഞ്ചേരി–തിരൂർ റൂട്ടുകളിലാണ് പദ്ധതിക്ക് അർഹമായ ഓർഡിനറി സർവീസുകളിൽ പലതും ഓടുന്നത്. അതേസമയം കോഴിക്കോട്–ഗുരുവായൂർ, വഴിക്കടവ്–കോഴിക്കോട്, പാലക്കാട്–കോഴിക്കോട് തുടങ്ങിയ പ്രധാന റൂട്ടുകളിൽ കൂടുതലും ടി.ടി. സർവീസുകളാണ്. ഉയർന്ന നിരക്കും പരിമിത സ്റ്റോപ്പുകളുമുള്ള ഈ ബസുകളെ ആശ്രയിക്കുന്ന സ്ത്രീകൾക്ക് പദ്ധതിയുടെ പ്രയോജനം ലഭിക്കില്ല.

പദ്ധതിയുടെ പരിമിതമായ വ്യാപ്തി രാഷ്ട്രീയ വിമർശനങ്ങൾക്കും ഇടയാക്കിയിട്ടുണ്ട്. ജില്ലയിലെ സ്ത്രീകൾക്ക് യഥാർഥത്തിൽ എവിടെയാണ് ഈ പദ്ധതി പ്രയോജനപ്പെടുത്താൻ കഴിയുകയെന്ന് വ്യക്തമാക്കണമെന്ന് സിപിഎ. നേതാവ് വി.പി. സാനു സാമൂഹിക മാധ്യമങ്ങളിലൂടെ ആവശ്യപ്പെട്ടു.

സ്ത്രീ ക്ഷേമത്തിന്റെ പേരിൽ പ്രഖ്യാപിച്ച പദ്ധതിയിൽ നിന്ന് മലപ്പുറത്തിന് കാര്യമായ നേട്ടമുണ്ടാകില്ലെന്ന് മുസ്‌ലിം ലീഗ് ജില്ലാ ജനറൽ സെക്രട്ടറി അബ്ദുൽ ഹമീദ് പറഞ്ഞു. നിലമ്പൂർ, തിരൂർ, കോട്ടക്കൽ, മഞ്ചേരി, പരപ്പനങ്ങാടി, വളാഞ്ചേരി തുടങ്ങിയ മേഖലകളിലേക്കുള്ള നിരവധി ലോക്കൽ സർവീസുകൾ ജീവനക്കാരുടെ ക്ഷാമവും പ്രവർത്തനപ്രശ്നങ്ങളും കാരണം മാസങ്ങൾക്ക് മുമ്പ് തന്നെ നിർത്തലാക്കിയിരുന്നുവെന്നും അദ്ദേഹം ചൂണ്ടിക്കാട്ടി.

“വിഷയത്തിൽ വിശദമായ നിവേദനം തയ്യാറാക്കിയിട്ടുണ്ട്. അടിയന്തര ഇടപെടൽ ആവശ്യപ്പെട്ട് ശനിയാഴ്ച ഗതാഗത മന്ത്രി സി.പി. ജോണിനെ കാണും,” ഹമീദ് പറഞ്ഞു.

ജീവനക്കാരുടെ രൂക്ഷമായ ക്ഷാമമാണ് പ്രതിസന്ധിയുടെ പ്രധാന കാരണമെന്ന് കെ.എസ്.ആർ.ടി.സി. അധികൃതർ പറയുന്നു. പൊന്നാനി ഡിപ്പോയിൽ മാത്രം 21 ഡ്രൈവർമാരുടെയും ആറ് കണ്ടക്ടർമാരുടെയും ഒഴിവുകളുണ്ട്. ഇതുമൂലം നിരവധി സർവീസുകൾ വെട്ടിക്കുറയ്ക്കേണ്ടി വന്നതായും, അതിന്റെ പ്രത്യാഘാതമാണ് സൗജന്യ യാത്രാ പദ്ധതിയുടെ ജില്ലയിലേക്കുള്ള പരിമിത വ്യാപ്തിയെന്നും അധികൃതർ വ്യക്തമാക്കി