ട്യൂഷൻ സെന്ററിൽ വിദ്യാർഥിനികൾക്ക് നേരെ ലൈംഗികാതിക്രമം: 52-കാരനായ അധ്യാപകൻ അറസ്റ്റിൽ

കുന്നംകുളം (തൃശ്ശൂർ): ട്യൂഷൻ സെന്ററിൽ പ്രായപൂർത്തിയാകാത്ത വിദ്യാർഥിനികളെ ലൈംഗികമായി ഉപദ്രവിച്ച സംഭവത്തിൽ 52-കാരനായ അധ്യാപകൻ അറസ്റ്റിൽ. തൃശ്ശൂർ ചൂണ്ടൽ സ്വദേശിയായ നൗഷാദിനെയാണ് വിദ്യാർഥിനികളുടെയും രക്ഷിതാക്കളുടെയും പരാതിയെ തുടർന്ന് കുന്നംകുളം പൊലീസ് അറസ്റ്റ് ചെയ്തത്. ചൂണ്ടലിൽ ഇയാളുടെ സ്വന്തം വസതിയിൽ വെച്ച് നടത്തിയിരുന്ന ട്യൂഷൻ സെന്ററിൽ വെച്ചാണ് സംഭവം നടക്കുന്നത്. മൂന്ന് പെൺകുട്ടികളാണ് അധ്യാപകനെതിരെ പൊലീസിൽ പരാതി നൽകിയത്.

കഴിഞ്ഞ കുറച്ചു ദിവസങ്ങളായി ട്യൂഷന് പോയിരുന്ന കുട്ടികളുടെ പെരുമാറ്റത്തിൽ അസ്വഭാവികത തോന്നിയതിനെ തുടർന്ന് രക്ഷിതാക്കൾ കാര്യം തിരക്കിയപ്പോഴാണ് പീഡന വിവരം പുറത്തറിയുന്നത്. ക്ലാസ് എടുക്കുന്നതിനിടെ അധ്യാപകനായ നൗഷാദ് തങ്ങളുടെ ശരീരഭാഗങ്ങളിൽ കടന്നുപിടിച്ചെന്നും ലൈംഗികാതിക്രമം നടത്തിയെന്നും കുട്ടികൾ വീട്ടുകാരോട് തുറന്നുപറയുകയായിരുന്നു. തുടർന്ന് രക്ഷിതാക്കൾ കുട്ടികളുമായി കുന്നംകുളം പൊലീസ് സ്റ്റേഷനിലെത്തി നേരിട്ട് പരാതി നൽകുകയായിരുന്നു.

കേസ് രജിസ്റ്റർ ചെയ്തതിന് പിന്നാലെ പ്രതിയായ നൗഷാദിനെ കസ്റ്റഡിയിലെടുത്ത് അറസ്റ്റ് രേഖപ്പെടുത്തി.അറസ്റ്റിലായ നൗഷാദിൽ നിന്ന് ട്യൂഷൻ സെന്ററിലെ മറ്റ് പെൺകുട്ടികൾക്കും സമാനമായ രീതിയിൽ ഉപദ്രവം നേരിട്ടിട്ടുണ്ടോ എന്നത് ഉൾപ്പെടെയുള്ള കാര്യങ്ങൾ അന്വേഷണത്തിലാണെന്ന് പൊലീസ് അറിയിച്ചു.