കെ.ആർ. ടോണി എഴുതിയ കവിത - കത്തി

കത്തി പഴയതുതന്നെയാ,ണിക്കത്തി

പുത്തനാണെന്നു പറവതനുചിതം.

കുത്തി നോവേല്പിച്ചിതെത്രയോപേരെ,യി-

ക്കത്തിയാൽ ജീവൻ പൊലിഞ്ഞവരെത്രപേർ!

ഉത്തരം കൃത്യമറികയില്ലെങ്കിലും

കൃത്യംനടത്തുവാനിക്കത്തിയുത്തമം!

സ്വാതന്ത്ര്യപൂർവകാലത്തുതൊട്ടീക്കത്തി-

യാതങ്കജാതകത്തിന്നാദികന്ദമാം!

ഒന്നോർത്തുനോക്കിയാൽ വേദകാലംതൊട്ടു-

തന്നെയിക്കത്തിഹാ!തത്ത്വത്തിലില്ലയോ?

സ്വർണക്കലംകൊണ്ടുമൂടിവെച്ചുള്ളൊരാ

സത്യം-‘തിളങ്ങുന്നവായ്ത്തല’യല്ലയോ?

ഇക്കത്തിതൻ പിടിമാറി പലവുരു

തർക്കമി,ല്ലോരോ ചരിത്രഘട്ടങ്ങളിൽ,

ജാതിമതങ്ങളും ഭക്തിയും ദൈവവും

പ്രീതിവളർത്തി വാണോരോരിടങ്ങളിൽ.

കന്മഷമില്ലാത്ത ചോരവാലുന്നൊരീ

കത്തിമാഹാത്മ്യമറിയുന്നപൂരുഷർ

സന്മയൻ ചിന്മയൻ കുന്മയനെങ്കിലും

പാര,മീഭൂമിക്കു മാരകശാപമാം!