രതീഷ് കൃഷ്ണ എഴുതിയ കവിത 'അവസാനിക്കാത്ത കവിത'

(The water met It’s master And Blushed. -Lord Byron)

ഒന്ന്

നാണത്താലന്നു

ചുവന്ന ജലംപോലെ

നിൽപ്പൂ പ്രഭാതം കു-

ളിരിൽപ്പടവിലായ്.

ക്ഷീരപഥത്തിലേ-

ക്കെത്തിനോക്കീടിന

നക്ഷത്രക്കൂട്ടങ്ങളീ-

ച്ചെറു മീനുകൾ.

തുള്ളിക്കളിക്കുമ-

തിന്നുതാഴെ മണ്ണിൽ

മണ്ണിര നെയ്ത കു-

ടിലുകൾ; ചാരത്തു

ചേർന്നുകിടക്കുന്നു

ഭൂതകാലത്തിന്റെ

നേർത്ത ചെതുമ്പലും

ചേറ്റു പാട്ടുമ്മുരി.

എങ്ങോനിന്നെത്തിയോ-

രീയിളം രശ്മികൾ

തട്ടിത്തിളങ്ങും

ചെതുമ്പലിലാമാത്ര-

യെങ്ങും വെളിച്ചം

വെളിച്ചം പ്രപഞ്ചത്തി-

ലേതോ മിഴിയിൽത്തെ-

ളിയും കാരുണ്യമായ് !

രണ്ട്

പൂക്കളിൽ നിൽക്കു-

മുപദേവതകളായ്

മാറുന്നു നാഗങ്ങൾ

കൊത്തുമിടങ്ങളിൽ.

നീലിച്ച പുണ്ണും നി-

ണവും കണ്ണീരുമാ-

യങ്ങനെ നിൽപ്പൂ യി-

ലപൊഴിച്ചീടുവാൻ

ആരിത്! സ്നേഹമേ

വാരിപ്പുണരുന്നു

ആർക്കായുരുവിട്ട

മുജ്ജന്മ പ്രാർത്ഥന.

മൂന്ന്

ഓടക്കുഴലൂതി

പൂക്കൾ വിരിയിക്കും

മാന്ത്രികൻ; കാർമുകിൽ

രാഗമുണർത്തവെ

കൊയ്ത്തരിവാളുമായ്

പോകുന്നു പാടത്തേ-

ക്കന്നത്തിൻ ദേവത;

ക്കൂട്ടരുമാവഴി...

മിണ്ടാതെ, നോക്കാതെ

നോക്കുന്നൊളിഞ്ഞെന്നെ

പുഞ്ചിരിതൂകുന്നൂ-

മാസ്‌കിന്മറയത്തും.

ചന്ദ്രിക ‘മുട്ടി’നി-

റച്ചുനിൽക്കുന്നീ ക-

രിമ്പനക്കാവിലു-

ണർന്നു തുള്ളുമ്പോഴും

ആ പുഞ്ചിരിമാത്ര-

മേതേതിരുളിലും

നാം തുറന്നീടും വി-

ഷാദ കാണ്ഡത്തിലും.

അന്നേരം കാണ്മൂ പാ-

ദങ്ങൾ നനച്ചുകൊ-

ണ്ടോരത്തൊഴുകും

മഹാപ്രളയത്തെയും.

* മുട്ടി അല്ലെങ്കിൽ മുട്ടിപ്പാനി - കള്ള് ഒഴിച്ചുവെക്കുന്ന മൺപാത്രം.

* പനങ്കാവ് - കള്ള് കുടിക്കുന്ന സ്ഥലം.