ജെയിംസ് ബോണ്ടും ഇളയരാജയും തമ്മിൽ എന്താ ബന്ധം?; '007 രാഗാസ്- ബോണ്ട് വിത്ത് ഭാവം' ജൂലൈ ആറിന്

ജെയിംസ് ബോണ്ട് തീം സിനിമാ പ്രേക്ഷകർക്ക് ഏറെ സുപരിചിതമാണ്. ഒരിക്കൽ കേട്ടവരാരും ഇത് മറക്കാനും ഇടയില്ല. കർണാടക സം​ഗീതവും ജെയിംസ് ബോണ്ട് തീമും ചേർന്നാൽ എങ്ങനെയുണ്ടാകും. ഇപ്പോഴിതാ സം​ഗീത പ്രേമികൾക്ക് ഒരു പുതിയ അനുഭവം ഒരുക്കുകയാണ് സം​ഗീതജ്ഞൻ സാകേതരാമൻ. ജൂലൈ ആറിന് ചെന്നൈയിലെ തേനാംപേട്ടിലെ നാരദ ​ഗാന സഭയിൽ വച്ച് ഒരുക്കിയിരിക്കുന്ന 'കർണാടിഫൈ' എന്ന പരിപാടിയിലാണ് '007 രാഗാസ്- ബോണ്ട് വിത്ത് ഭാവം' അരങ്ങേറുക.

കർണാടക സംഗീതം എല്ലാവർക്കും പ്രാപ്യമാക്കുക എന്ന ലക്ഷ്യത്തോടെയാണ് സാകേതരാമൻ കർണാടിഫൈ എന്ന സം​ഗീത പരിപാടി സംഘടിപ്പിച്ചിരിക്കുന്നത്. സാകേതരാമനൊപ്പം കലാശിക്ഷ മ്യൂസിക് അക്കാദമിയിലെ വിദ്യാർഥികളും ചേർന്നാണ് നാര​ദ ​ഗാന സഭയിൽ ഈ പുതുമയേറിയ അനുഭവം സമ്മാനിക്കുക.

"ഈ യൂണിവേഴ്സൽ തീമിന് ഒരു ക്ലാസിക്കൽ ടച്ച് കൂടി കൊണ്ടുവരുകയാണ് ഇതിലൂടെ. ജെയിംസ് ബോണ്ട് തീം എല്ലാവർക്കും അറിയാം, അതുകൊണ്ട് തന്നെ ഇത് എല്ലാവർക്കും മനസിലാകും. കർണാടക സംഗീതത്തിലെ സങ്കീർണമായ പല കാര്യങ്ങളും ഈ തീമുമായി ബന്ധിപ്പിക്കുന്നതിലൂടെ എളുപ്പത്തിൽ മനസിലാക്കാൻ കഴിയുമെന്ന്" സാകേതരാമൻ ദ് ന്യൂ ഇന്ത്യൻ എക്സ്പ്രസിനോട് പറഞ്ഞു.

ജെയിംസ് ബോണ്ട് തീമിനൊപ്പം, മുത്തുസ്വാമി ദീക്ഷിതർ രചിച്ച നോട്ടുസ്വരങ്ങളുടെ തമിഴ് പതിപ്പും അവതരിപ്പിക്കും. മുത്തുസ്വാമി ദീക്ഷിതരുടെ 250-ാം ജന്മവാർഷികത്തോടനുബന്ധിച്ചാണ് പരിപാടി ഒരുക്കിയിരിക്കുന്നത്.

"ഇന്ത്യൻ ഭാഷകളിൽ രചിക്കപ്പെട്ട നഴ്സറി പാട്ടുകൾ മുതൽ ഇളയരാജയുടെ രാജ പാർവൈയിലെ സൗണ്ട് ട്രാക്കുകൾ വരെ പ്രേക്ഷകരിലേക്ക് ആഴത്തിൽ എത്തിക്കാനുള്ള ശ്രമം കൂടിയാണിത്. ഭൂതകാലത്തിൽ മാത്രം ഒതുങ്ങി നിൽക്കുന്നതല്ല കർണാടക സം​ഗീതം. അത് ജീവിക്കുന്നു, പരിണമിക്കുന്നു, അത് എല്ലാവരുടേതുമാണ്".- സാകേതരാമൻ കൂട്ടിച്ചേർത്തു.