നിങ്ങളുടെ സ്നേഹം എന്നെ കീഴടക്കി; നന്ദി പറഞ്ഞ് മമ്മൂട്ടി

സിനിമയിൽ 50 വർഷം പൂർത്തിയാക്കിയ മമ്മൂട്ടിക്ക് ആശംസകൾ അറിയിച്ചുകൊണ്ട് സിനിമാ പ്രവർത്തകരും ആരാധകരും ഉൾപ്പടെ നിരവധി പേരാണ് രം​ഗത്തെത്തിയത്. ഇപ്പോൾ ആശംസകൾ അറിയിച്ചവർക്കെല്ലാം നന്ദി പറയുകയാണ് പ്രിയതാരം. ഫേയ്സ്ബുക്ക് കുറിപ്പിലൂടെയായിരുന്നു മമ്മൂട്ടി നന്ദി അറിയിച്ചത്. 

'നിങ്ങൾ എല്ലാവരിൽ നിന്നുമുള്ള ഈ സ്നേഹം എന്നെ കീഴടക്കിയിരിക്കുന്നു. എന്‍റെ സഹപ്രവര്‍ത്തകരും എല്ലായിടത്തുനിന്നുമുള്ള ആരാധകരും. നിങ്ങള്‍ ഓരോരുത്തരോടും നന്ദി"- മമ്മൂട്ടി കുറിച്ചു. തന്റെ ചിത്രത്തിനൊപ്പമായിരുന്നു താരത്തിന്റെ പോസ്റ്റ്. 

ഇന്നലെയാണ് മമ്മൂട്ടി സിനിമയിൽ 50 വർഷം പൂർത്തിയാക്കിയത്. 1971 ആ​ഗസ്റ്റ് 6 ൽ റിലീസ് ചെയ്ത അനുഭവങ്ങള്‍ പാളിച്ചകള്‍ എന്ന ചിത്രത്തിലൂടെയാണ് അദ്ദേഹം കാമറയ്ക്ക് മുന്നിലെത്തുന്നത്. ഡയലോ​ഗു പോലുമില്ലാത്ത ചെറിയ വേഷത്തിലായിരുന്നു അരങ്ങേറ്റം. അതു കഴിഞ്ഞ് ഒൻപതു വർഷങ്ങളാണ് നായകനാവാൻ മമ്മൂട്ടി കാത്തിരുന്നത്. 'ബിഗ് ബി'ക്കു ശേഷം അമല്‍ നീരദിനൊപ്പം ഒന്നിക്കുന്ന 'ഭീഷ്‍മ പര്‍വ്വത്തിന്റെ തിരക്കിലാണ് താരമിപ്പോൾ.