എന്റെ പൊന്നേ ഒരു രക്ഷയുമില്ല! ഫാ‌രൽ വില്യംസിനൊപ്പം എആർ റഹ്മാൻ; ഹിറ്റായി 'യാരാ' ട്രാക്ക്

പ്രശസ്ത അമേരിക്കൻ സം​ഗീതജ്ഞനും ​ഗായകനുമായ ഫാ‌രൽ വില്യംസുമായി കൈ കോർത്ത് സം​ഗീത സംവിധായകൻ എ ആർ റഹ്മാൻ. പാരീസ് ഫാഷൻ വീക്കിലെ ലൂയി വിറ്റൺസ് സ്പ്രിങ്/സമ്മർ 2025 ലാണ് ഇരുവരും ഒന്നിച്ചത്. പഞ്ചാബി ട്രാക്ക് ആയ യാരായ്ക്ക് വേണ്ടിയാണ് ലെജൻഡ്സിന്റെ ഒത്തുകൂടൽ. ഗായിക റോമിയാണ് ഈ ​ഗാനം ആലപിച്ചിരിക്കുന്നത്. ട്രെഡീഷണൽ പഞ്ചാബി ബീറ്റ്സും മോഡേൺ മ്യൂസിക്കും ചേർത്താണ് ​ഗാനമൊരുക്കിയിരിക്കുന്നത്.

ഇതിനോടകം തന്നെ ഈ പഞ്ചാബി ​ഗാനം സോഷ്യൽ മീഡിയയിൽ ഹിറ്റായി കഴിഞ്ഞു. ​'ഇരുവരും സിനിമയിലും ഒന്നിച്ചെത്തുന്നതിനായി കാത്തിരിക്കുന്നു'- എന്നാണ് ആരാധകർ ഒന്നടങ്കം പറയുന്നത്. "കലയുടെ യൂണിവേഴ്സൽ ലാം​ഗ്വേജും അതുപോല ഇത്തരത്തിൽ അർത്ഥവത്തായ എന്തെങ്കിലും സൃഷ്ടിക്കാനായി ഒത്തുചേരുന്നതിന്റെ സന്തോഷവുമൊക്കെ ഇതുപോലുള്ള നിമിഷങ്ങൾ എന്നെ ഓർമിപ്പിക്കുന്നു."- എന്ന് എ ആർ റഹ്മാൻ പറഞ്ഞു.

ഫാരൽ വില്യംസുമായി സഹകരിക്കാൻ കഴിഞ്ഞത് രസകരമായ ഒരനുഭവമായിരുന്നുവെന്നും റഹ്മാൻ കുറിച്ചു. ബിടിഎസ് അംഗം ജെ-ഹോപ്പ്, അമേരിക്കൻ ​ഗായിക ബിയോൺസി എന്നിവരുൾപ്പെടെ ലോകമെമ്പാടുമുള്ള നിരവധി സെലിബ്രിറ്റികളാണ് പാരീസ് ഫാഷൻ വീക്കിലെത്തിയത്.

അതേസമയം ഇന്ത്യൻ സം​ഗീതം ആസ്വദിക്കുന്ന ജെ- ഹോപ്പിന്റെ വിഡിയോയും സോഷ്യൽ മീഡിയയിൽ വൈറലാണ്. 'റഹ്മാനും ജെ- ഹോപ്പും തമ്മിൽ ഒരു ​ഗാനം വന്നാൽ കൊള്ളാമെന്നും' ചിലർ എക്സിൽ കുറിച്ചിട്ടുണ്ട്. മകൻ എ ആർ അമീനൊപ്പമാണ് റഹ്മാൻ പാരീസ് ഫാഷൻ വീക്കിലെത്തിയത്.

ഇരുവരും ഫാരൽ വില്യംസിനൊപ്പം ഏറെ നേരം ചെലവഴിക്കുകയും ചെയ്തു. കഴിഞ്ഞ ദിവസം അമേരിക്കൻ സിനിമ സംവിധായകനും തിരക്കഥാകൃത്തും നടനുമായ സ്പൈക്ക് ലീക്കൊപ്പമുള്ള ചിത്രം എ ആർ റഹ്മാൻ ഇൻസ്റ്റ​ഗ്രാമിൽ പങ്കുവച്ചിരുന്നു.