'ഇന്ത്യയിൽ ഇന്ന് ലോക നിലവാരത്തിലുള്ള സിനിമകൾ വരുന്നത് മലയാളത്തിൽ; അതിന് കാരണം പ്രേക്ഷകർ കൂടിയാണ്'

ഹിന്ദി, കന്നഡ, മറാത്തി, തെലുങ്ക്, മലയാളം, തമിഴ് തുടങ്ങി വിവിധ ഭാഷകളിൽ സജീവമായ നടനും സംവിധായകനുമാണ് മകരന്ദ് ദേശ്പാണ്ഡെ. ആമേൻ, ടു കൺട്രീസ്, പുലിമുരുകൻ എന്നീ ചിത്രങ്ങളിലൂടെ മകരന്ദ് മലയാളികൾക്ക് സുപരിചിതനാണ്. മലയാള സിനിമയെക്കുറിച്ച് മകരന്ദ് പറഞ്ഞ വാക്കുകളാണിപ്പോൾ സോഷ്യൽ മീഡിയയിൽ ശ്രദ്ധേയമാകുന്നത്.

ഇന്ത്യയില്‍ ഇന്ന് ലോക നിലവാരത്തിലുള്ള സിനിമകള്‍ ചെയ്യുന്നത് മലയാളം ഇന്‍ഡസ്ട്രിയില്‍ നിന്നാണെന്ന് മകരന്ദ് പറഞ്ഞു. മലയാള സിനിമ ഒരേ സമയം മനുഷ്യരോട് ചേര്‍ന്ന് നില്‍ക്കുന്നതാണെന്നും മലയാളി പ്രേക്ഷകര്‍ക്ക് സിനിമയിലുള്ള അറിവാണ് താരങ്ങള്‍ക്ക് പരീക്ഷണ ചിത്രങ്ങള്‍ ചെയ്യാനുള്ള ധൈര്യം നല്‍കുന്നതെന്നും അദ്ദേഹം വ്യക്തമാക്കി.

തന്റെ പുതിയ ചിത്രമായ വവ്വാലിന്റെ പൂജ ചടങ്ങുകൾക്കായി കൊച്ചിയിലെത്തിയപ്പോഴാണ് മകരന്ദ് ഇക്കാര്യം പറഞ്ഞത്. "മലയാള സിനിമകള്‍ ഒരേ സമയം പുതുമ നിറഞ്ഞതും മനുഷ്യരോട് ചേര്‍ന്ന് നില്‍ക്കുന്നതുമാണ്. എന്തുകൊണ്ട് മലയാളത്തില്‍ നല്ല സിനിമകളുണ്ടാകുന്നു എന്ന് ഞങ്ങള്‍ പലപ്പോഴും ചര്‍ച്ച ചെയ്യാറുണ്ട്.

സുഹൃത്തുക്കളെ കാണുമ്പോള്‍ അടുത്തിടെ ഏത് മലയാള സിനിമയാണ് കണ്ടത് എന്ന് ചോദിക്കാറുണ്ട്. നല്ല സിനിമകളുണ്ടാകുന്നതിന് കാരണം ഇവിടുത്തെ പ്രേക്ഷകര്‍ കൂടി കൊണ്ടാണ്. മലയാളികള്‍ സിനിമാ പരിജ്ഞാനമുള്ളവരാണ്." -മകരന്ദ് പറഞ്ഞു.

ഇതാണ് പരീക്ഷണ സിനിമകൾ ചെയ്യാനുള്ള ധൈര്യം സൂപ്പർ താരങ്ങൾക്ക് നൽകുന്നതെന്നും ബോളിവുഡിൽ അത് സംഭവിക്കില്ലെന്നും അദ്ദേഹം കൂട്ടിച്ചേർത്തു. ഷഹ്‌മോന്‍ ബി പറേലില്‍ തിരക്കഥ എഴുതി സംവിധാനം ചെയ്യുന്ന ചിത്രമാണ് വവ്വാല്‍. ലെവിന്‍, സൈമണ്‍, ലക്ഷ്മി ചപോര്‍ക്കര്‍, പ്രവീണ്‍ തുടങ്ങിയവരും ചിത്രത്തിൽ പ്രധാന വേഷങ്ങളിലെത്തുന്നുണ്ട്.