ആഷിഖി താരം രാഹുൽറോയിക്ക് ഷൂട്ടിങ്ങിനിടെ മസ്തിഷ്‌കാഘാതം; ഐസിയുവിൽ പ്രവേശിപ്പിച്ചു 

മുംബൈ: മസ്തിഷ്‌കാഘാതത്തെത്തുടർന്ന് ബോളിവുഡ് നടൻ രാഹുൽറോയിയെ ആശുപത്രിയിൽ പ്രവേശിപ്പിച്ചു. രാഹുൽ അഭിനയിക്കുന്ന പുതിയ സിനിമയായ ലാക്ക് (ലിവ് ദി ബാറ്റിൽ)ന്റെ കാർഗിലിൽ നടക്കുന്ന ചിത്രീകരണത്തിനിടയിലാണ് നടന് മസ്തിഷ്‌കാഘാതമുണ്ടായത്. ഉടൻതന്നെ അദ്ദേഹത്തെ  നാനാവതി ആശുപത്രിയിൽ പ്രവേശിപ്പിച്ചു.

തീവ്രപരിചരണ വിഭാ​ഗത്തിൽ ചികിത്സയിലുള്ള നടന്റെ നില മെച്ചപ്പെടുന്നതായി സഹോദരൻ റുമീർ സെൻ പറഞ്ഞു. കാലാവസ്ഥാ പ്രശ്നങ്ങളാണ് ആരോ​ഗ്യനില വഷളാക്കിയതെന്നാണ് റിപ്പോർട്ടുകൾ. 

1990-ൽ പുറത്തിറങ്ങിയ മഹേഷ് ഭട്ടിന്റെ ആഷിഖി എന്ന ചിത്രത്തിൽ മുഖ്യവേഷത്തിൽ അഭിനയിച്ചാണ് രാഹുൽ ശ്രദ്ധനേടിയത്. 2006-ൽ പ്രമുഖ റിയാലിറ്റി ഷോയായ ബിഗ്ബോസിന്റെ ഒന്നാംസീസണിലും രാഹുൽ റോയിയുണ്ടായിരുന്നു.