'എവിടെ ആണോ എന്തോ... തലയിൽ മുല്ലപ്പൂ ഇല്ലാത്തതുകൊണ്ട് ഓസ്ട്രേലിയ പോകുവല്ല'; സ്വയം ട്രോളി നവ്യ നായർ

വീണ്ടും സെൽഫ് ട്രോൾ പോസ്റ്റ് പങ്കുവച്ച് നടി നവ്യ നായർ. ഇത്തവണ തന്റെ ഫോൺ ​ഗ്യാലറിയിലെ പഴയ ചിത്രം പങ്കുവച്ചു കൊണ്ടാണ് നവ്യ എത്തിയിരിക്കുന്നത്. വിമാന യാത്രയുടെ ചിത്രമാണ് നവ്യ പങ്കുവച്ചിരിക്കുന്നത്. 'എവിടെ ആണോ എന്തോ..തലയിൽ മുല്ലപ്പൂ ഇല്ലാത്തതുകൊണ്ട് ഓസ്ട്രേലിയ പോകുവല്ല…ഹാപ്പി മടി പിടിച്ച ഡേ'- എന്നാണ് നടി ചിത്രങ്ങൾക്ക് ക്യാപ്ഷനായി കുറിച്ചിരിക്കുന്നത്.

ചിത്രം എപ്പോഴെടുത്തതാണെന്ന് ഓര്‍മയില്ലെന്നും നവ്യ കുറിച്ചു. മുല്ലപ്പൂ കൈവശം വച്ചതിന് ഓസ്‌ട്രേലിയയിലെ മെല്‍ബണ്‍ അന്താരാഷ്ട്ര വിമാനത്താവളത്തില്‍ നടിക്ക് ഒരുലക്ഷം രൂപയിലേറെ പിഴയിട്ടിരുന്നു. 15 സെന്റിമീറ്റര്‍ മുല്ലപ്പൂ കൈവശം വച്ചതിന് പിഴ ചുമത്തിയെന്ന് നടി തന്നെയാണ് കഴിഞ്ഞ സെപ്റ്റംബറില്‍ തുറന്നു പറഞ്ഞത്.

വിക്ടോറിയയിലെ മലയാളി അസോസിയേഷന്റെ ഓണപ്പരിപാടിയില്‍ പങ്കെടുക്കാനായാണ് നവ്യ നായര്‍ ഓസ്ട്രേലിയയിലേക്ക് പോയത്. ഈ പരിപാടിയില്‍ സംസാരിക്കവെയാണ് നവ്യ തനിക്ക് വിമാനത്താവളത്തിലുണ്ടായ അനുഭവം സദസുമായി പങ്കുവെച്ചത്. മുല്ലപ്പൂ കൊണ്ടുപോകാന്‍ പാടില്ല എന്ന നിയമം തനിക്ക് അറിയില്ലായിരുന്നുവെന്ന് പറഞ്ഞ താരം പക്ഷേ, അറിവില്ലായ്മ ഒഴിവുകഴിവല്ലെന്നും സമ്മതിച്ചു.

നവ്യ നായരിൽ നിന്ന് 1980 ഓസ്ട്രേലിയന്‍ ഡോളര്‍ (ഏകദേശം ഒന്നേകാല്‍ ലക്ഷം ഇന്ത്യന്‍ രൂപ) ആണ് ഓസ്ട്രേലിയന്‍ കൃഷിവകുപ്പ് ഈടാക്കിയത്. അതേസമയം പാതിരാത്രി ആണ് നവ്യയുടേതായി ഒടുവിൽ തിയറ്ററുകളിലെത്തിയ ചിത്രം.

റത്തീന സംവിധാനം ചെയ്ത ചിത്രത്തിൽ സൗബിൻ ഷാഹിർ, ഹരിശ്രീ അശോകൻ, ഇന്ദ്രൻസ്, സണ്ണി വെയ്ൻ, ആൻ അ​ഗസ്റ്റിൻ എന്നിവർ പ്രധാന വേഷങ്ങളിലെത്തി. ചിത്രത്തിൽ ഒരു പൊലീസ് ഉദ്യോ​ഗസ്ഥയുടെ വേഷത്തിലാണ് നവ്യ എത്തിയത്. എന്നാൽ തിയറ്ററുകളിൽ സമ്മിശ്ര പ്രതികരണമാണ് ചിത്രം നേടിയത്.