സാരിയുടുത്ത് പരമ്പരാ​ഗത ആഭരണങ്ങളിൽ പേളി, വളക്കാപ്പ് ചടങ്ങ് ചിത്രങ്ങൾ 

ജീവിതത്തിലേക്ക് പുതിയൊരു അതിഥിയെ വരവേൽക്കാനുള്ള ഒരുക്കത്തിലാണ് താരദമ്പതികളായ പേളി മാണിയും ശ്രീനിഷ് അരവിന്ദും. ഗർഭകാലവിശേഷങ്ങളും ചിത്രങ്ങളുമെല്ലാം തങ്ങളുടെ സോഷ്യൽ മീഡിയ പേജുകളിൽ ഇരുവരു പങ്കുവയ്ക്കാറുണ്ട്. ഇപ്പോഴിതാ, പേളിയുടെ വളക്കാപ്പ് ചടങ്ങിന്റെ വിശേഷങ്ങളാണ് ആരാധകരുടെ ശ്രദ്ധകവരുന്നത്. 

ട്രാൻസ്ജെൻഡർ ആക്ടിവിസ്റ്റും മേക്കപ്പ് ആർട്ടിസ്റ്റുമായ രഞ്ജു രഞ്ജിമാരാണ് ചിത്രം പങ്കുവച്ചത്. ചടങ്ങിൽ പേളിയുടെ മേക്കപ്പ് ചെയ്തത് രഞ്ജു ആണ്. സാരിയിൽ നിറയെ ആഭരണങ്ങൾ അണിഞ്ഞാണ് പേളിയെ ചിത്രത്തിൽ കാണുന്നത്. മാമ്പഴ മഞ്ഞ നിറത്തിലുള്ള സാരിയാണ് ചടങ്ങിനായി അണിഞ്ഞത്. 

പ്രമുഖ റിയാലിറ്റി ഷോയായ ബി​ഗ് ബോസിലൂടെ പരിചയപ്പെട്ട് പ്രണയത്തിലാകുകയായിരുന്നു ശ്രീനിഷും പേളിയും. പേർളിഷ് എന്ന ഹാഷ്ടാ​ഗിൽ കൊണ്ടാടിയ ഇവരുടെ പ്രണയവും വിവാഹവും ആരാധകർ ആവേശത്തോടെ ആഘോഷമാക്കുകയായിരുന്നു. 2019 മെയ് 5,8 തിയ്യതികളിലായി ഹിന്ദു-ക്രിസ്ത്യൻ ആചാരപ്രകാരമായിരുന്നു വിവാഹം.