'ദിവസവും രാവിലെ ഭക്ഷണം ചോദിച്ച് എന്നെ ഉണർത്തുന്നയാൾ'; ഹൃദ്യമായ വിഡിയോ പങ്കുവച്ച് രശ്മിക

തെന്നിന്ത്യയിൽ മാത്രമല്ല ബോളിവുഡിലും തിളങ്ങി നിൽക്കുന്ന നടിമാരിലൊരാളാണ് രശ്മിക മന്ദാന. തന്റെ വിശേഷങ്ങളൊക്കെ രശ്മിക ആരാധകരുമായി പങ്കുവയ്ക്കാറുണ്ട്. മാത്രമല്ല, പൊതുവേദികളിലെ ചില പരാമർശങ്ങൾ രശ്മികയെ അബദ്ധത്തിൽ ചാടിക്കാറുമുണ്ട്. ഇപ്പോഴിതാ ഹൃദയസ്പർശിയായ ഒരു വിഡിയോ പങ്കുവച്ചിരിക്കുകയാണ് രശ്മിക. മയിലിന് തീറ്റ കൊടുക്കുന്ന വിഡിയോ ആണ് രശ്മിക പങ്കുവച്ചിരിക്കുന്നത്.

ഭക്ഷണം ചോദിച്ച് പലതവണ ആ പക്ഷി തന്നെ വിളിച്ചുണർത്തുമായിരുന്നെന്ന് രശ്മിക ഇൻസ്റ്റ​ഗ്രാമിൽ കുറിച്ചു. "ചിലപ്പോഴൊക്കെ പ്രകൃതിയോട് ഇത്രയടുത്ത് ഇടപഴകുന്നത് വളരെ ആശ്വാസകരമാണ്... ഞാൻ ഇത് ഉറപ്പായും ശുപാർശ ചെയ്യുന്നു! അവധിക്കാലത്ത് രാവിലെ അ‍ഞ്ച് മണിക്ക് അല്ലെങ്കിൽ ആറ് മണിക്ക് ഭക്ഷണം ചോദിച്ച് അവൻ എന്നെ ഉണർത്താറുണ്ടായിരുന്നു.. അവൻ അതിനായി നന്നായി ശബ്ദമുണ്ടാക്കുമായിരുന്നു..." വിഡിയോ പങ്കുവെച്ചുകൊണ്ട് രശ്മിക കുറിച്ചു.

നിരവധി പേരാണ് രശ്മികയുടെ വിഡിയോയ്ക്ക് കമന്റുമായെത്തിയിരിക്കുന്നത്. "പ്രകൃതി ശരിക്കും ഒരു സാന്ത്വനമാണ്.. ഞാനിപ്പോൾ അതിനായി കൊതിക്കുന്നു", "നന്നായിരിക്കുന്നു... എല്ലാ ജീവജാലങ്ങളോടും ദയയും സ്നേഹവും കരുതലും കാണിക്കുക", 'രശ്മികയ്ക്ക് പുതിയ കൂട്ടിനെ കിട്ടിയല്ലോ'. - എന്നൊക്കെയാണ് വിഡിയോയ്ക്ക് താഴെ നിറയുന്ന കമന്റുകൾ.

ആയുഷ്മാൻ ഖുറാനയ്‌ക്കൊപ്പം ആദ്യമായി ഒന്നിക്കുന്ന തമ എന്ന ചിത്രത്തിലാണ് രശ്മിക അടുത്തതായി അഭിനയിക്കുന്നത്. ചിത്രത്തിന്റെ ടീസർ അടുത്തിടെ പുറത്തിറങ്ങിയിരുന്നു. ഒരു സാങ്കൽപ്പിക ലോകത്ത് കഥ പറയുന്ന ഈ ചിത്രത്തിൽ പരേഷ് റാവൽ, നവാസുദ്ദീൻ സിദ്ദിഖി എന്നിവരും പ്രധാന വേഷങ്ങളിൽ എത്തുന്നു.

ആദിത്യ സർപോത്ദാർ സംവിധാനം ചെയ്യുന്ന 'തമ' ഈ ദീപാവലിക്ക് ലോകമെമ്പാടും റിലീസ് ചെയ്യും. രവീന്ദ്ര പുല്ലെ സംവിധാനം ചെയ്യുന്ന മൈസ എന്ന ആക്ഷൻ ത്രില്ലർ ചിത്രത്തിലും രശ്മിക വേഷമിടുന്നുണ്ട്.