വൈറസ് എന്നെ കൂടുതൽ ശക്തയാക്കിയോ? കോവിഡ് മാറി തിരിച്ചെത്തി തമന്ന; സ്റ്റാമിന തിരിച്ചുപിടിക്കാൻ വർക്കൗട്ട് 

കോവിഡ് ഭേദമായി തിരിച്ചെത്തിയതിന് പിന്നാലെ വർക്കൗട്ടിലൂടെ സ്റ്റാമിന വീണ്ടെടുക്കാനുള്ള പരിശ്രമത്തിലാണ് നടി തമന്ന ഭാട്ടിയ. ഫിറ്റ്‌നസ് ട്രെയിനർ യോഗേഷിനൊപ്പം വീണ്ടും വ്യായാമത്തിലേർപ്പെടുന്ന വിഡിയോ താരം പങ്കുവച്ചു. ഫിറ്റ്‌നെസ് യാത്ര തുടങ്ങി ആദ്യ ദിവസത്തെ അനുഭവമാണ് ഇൻസ്റ്റഗ്രാം വിഡിയോയിൽ നടി പങ്കുവച്ചത്. 

കൊറോണവൈറസ് ഭേദമായിക്കഴിഞ്ഞാൽ ഫിറ്റ്‌നെസ്സ് തിരിച്ചുപിടിക്കാനാണ് ഏറ്റവും പ്രധാനമായും ശ്രദ്ധിക്കേണ്ടതെന്നാണ് തമന്നയുടെ അഭിപ്രായം. തീർച്ചയായും മുന്നോട്ടുപോകണം, അതോടൊപ്പം ശരീരം പറയുന്നത് അനുസരിക്കുകയും വേണമെന്ന് കുറിച്ചുകൊണ്ടാണ് വ്യായാമം ചെയ്യുന്നതിന്റെ വിഡിയോ തമന്ന ഷെയർ ചെയ്തിരിക്കുന്നത്.   

ഹൈദരാബാദിൽ വെബ് സീരീസിന്റെ ചിത്രീകരണത്തിനിടെ ലക്ഷണങ്ങൾ കണ്ടതിനെത്തുടർന്ന് നടത്തിയ പരിശോധനയിലാണ് തമന്നയ്ക്ക് കോവിഡ് സ്ഥിരീകരിച്ചത്. തുടർന്ന് ഹൈദരാബാദിലെ കോണ്ടിനന്റൽ ഹോസ്പിറ്റിലിൽ ചികിത്സയിലായിരുന്നു താരം.