കീര്‍ത്തി സുരേഷും രാധിക ആപ്തെയും പ്രധാന വേഷങ്ങളിലെത്തുന്ന നെറ്റ്ഫ്‌ലിക്‌സ് സീരീസ് 'അക്ക'യുടെ ട്രെയ്ലര്‍ പുറത്തിറങ്ങി. ധര്‍മരാജ് ഷെട്ടിയാണ് സീരീസ് രചിച്ച് സംവിധാനം ചെയ്തത്. യഷ് രാജ് ഫിലിംസിന്റെ ബാനറായ വൈആര്‍എഫ് എന്റര്‍ടെയ്ന്‍മെന്റ് നിര്‍മ്മിക്കുന്ന സീരീസ് ഒക്ടോബര്‍ 30ന് നെറ്റ്ഫ്‌ലിക്‌സിലൂടെ ആഗോളതലത്തില്‍ സ്ട്രീമിങ് ആരംഭിക്കും.
അധികാരവും പാരമ്പര്യവും പ്രതികാരവും നിറഞ്ഞ ഒരു ഗ്യാങ്സ്റ്റര്‍ ലോകത്തിന്റെ പശ്ചാത്തലത്തില്‍, വ്യത്യസ്തമായ ലക്ഷ്യങ്ങളും വിശ്വാസങ്ങളുമുള്ള രണ്ട് കരുത്തുറ്റ സ്ത്രീകള്‍ തമ്മിലുള്ള ഏറ്റുമുട്ടലാണ് ട്രെയ്ലര്‍ മുന്നോട്ടുവയ്ക്കുന്നത്.
1980കളുടെ പശ്ചാത്തലത്തിലുള്ള പെര്‍ണുരു എന്ന സാങ്കല്‍പ്പിക രാജ്യമാണ് 'അക്ക'യുടെ കഥാപരിസരം. തലമുറകളായി സ്ത്രീകള്‍ അധികാരം കൈയാളുകയും തങ്ങളുടെ പാരമ്പര്യം സംരക്ഷിക്കുകയും ചെയ്യുന്ന ഈ രാജ്യത്ത്, പുറത്തുനിന്നെത്തുന്ന ഒരാളുടെ ഇടപെടല്‍ നിലവിലുള്ള അധികാരക്രമത്തെ വെല്ലുവിളിക്കുന്നതോടെ സംഘര്‍ഷങ്ങള്‍ രൂക്ഷമാകുന്നു. വിശ്വാസങ്ങളും കൂറും കുടുംബബന്ധങ്ങളും പഴയ വൈരങ്ങളും പരീക്ഷിക്കപ്പെടുന്ന സാഹചര്യത്തില്‍, പെര്‍ണുരുവിന്റെ ഭാവി തന്നെ നിര്‍ണയിക്കുന്ന ഏറ്റുമുട്ടലുകളിലേക്കാണ് കഥ നീങ്ങുന്നത്.
കീര്‍ത്തി സുരേഷ് ഭവാനിയായും രാധിക ആപ്തെ രുദ്രയായും എത്തുന്നു. സ്വന്തം അധികാരവും പാരമ്പര്യവും സംരക്ഷിക്കാന്‍ ഏതറ്റം വരെയും പോകാന്‍ തയ്യാറുള്ള സ്ത്രീയാണ് ഭവാനി. നിലവിലുള്ള വ്യവസ്ഥയെ ചോദ്യം ചെയ്യുകയും സ്വന്തം ലക്ഷ്യങ്ങള്‍ക്കായി നിലകൊള്ളുകയും ചെയ്യുന്ന രുദ്രയാകട്ടെ, പെര്‍ണുരുവിലെ അധികാരസമവാക്യങ്ങള്‍ക്ക് വെല്ലുവിളിയാകുന്നു. ഇരുവരുടെയും വ്യത്യസ്തമായ കാഴ്ചപ്പാടുകളും വ്യക്തിപരമായ താല്‍പര്യങ്ങളും തമ്മിലുള്ള സംഘര്‍ഷമാണ് സീരീസിന്റെ പ്രധാന ആകര്‍ഷണം. തന്‍വി ആസ്മി, പൂജ മോഹന്‍രാജ്, മഹേഷ് മഞ്ജരേക്കര്‍, അന്‍ഷുമാന്‍ പുഷ്‌കര്‍, മോണിക്ക പന്‍വാര്‍ എന്നിവരും പ്രധാന താരനിരയിലുണ്ട്.
സീരീസിനെക്കുറിച്ച് നെറ്റ്ഫ്‌ലിക്‌സ് ഇന്ത്യ സീരീസ് ഹെഡ് താന്യ ബാമി, ധര്‍മരാജ് ഷെട്ടി, കീര്‍ത്തി സുരേഷ്, രാധിക ആപ്തെ എന്നിവരും തങ്ങളുടെ അഭിപ്രായങ്ങള്‍ പങ്കുവെച്ചു. സ്ത്രീകള്‍ കഥയിലെ കഥാപാത്രങ്ങള്‍ മാത്രമല്ല, അധികാരത്തിന്റെ കേന്ദ്രമായി നിലകൊള്ളുന്ന വ്യത്യസ്തമായ ലോകമാണ് പെര്‍ണുരുവിലൂടെ അവതരിപ്പിക്കുന്നതെന്ന് താന്യ ബാമി പറഞ്ഞു. ഗ്യാങ്സ്റ്റര്‍ വിഭാഗത്തിന് തനതായ നിയമങ്ങളും പശ്ചാത്തലവുമുള്ള ഒരു ലോകം സൃഷ്ടിക്കാനും, സാധാരണയായി ഇത്തരം കഥകളുടെ കേന്ദ്രത്തില്‍ വരാത്ത കഥാപാത്രങ്ങളിലൂടെയും ബന്ധങ്ങളിലൂടെയും വലിയൊരു കഥ പറയാനുമുള്ള അവസരമാണ് 'അക്ക'യെന്ന് സംവിധായകന്‍ ധര്‍മരാജ് ഷെട്ടി വ്യക്തമാക്കി.
തന്റെ പാരമ്പര്യം സംരക്ഷിക്കാന്‍ ഏതറ്റം വരെയും പോകുന്ന സ്ത്രീയാണ് ഭവാനിയെന്നും, അധികാരത്തിനും ശക്തിക്കും പിന്നില്‍ എളുപ്പമല്ലാത്ത തീരുമാനങ്ങള്‍ അവളെ കാത്തിരിക്കുന്നുണ്ടെന്നും കീര്‍ത്തി സുരേഷ് പ്രതികരിച്ചു. സാഹചര്യങ്ങള്‍ക്കനുസരിച്ച് സ്വയം നിര്‍വചിക്കപ്പെടാന്‍ തയ്യാറാകാത്ത, സ്വന്തം ലക്ഷ്യങ്ങള്‍ക്കായി നിലവിലുള്ള വ്യവസ്ഥയെ ചോദ്യം ചെയ്യുന്ന കഥാപാത്രമാണ് രുദ്രയെന്ന് രാധിക ആപ്തെ പറഞ്ഞു. ഭവാനിയും രുദ്രയും തമ്മിലുള്ള ഏറ്റുമുട്ടല്‍ അധികാരത്തിനായുള്ള പോരാട്ടം മാത്രമല്ലെന്നും, കഥാപാത്രങ്ങളുടെ വിശ്വാസങ്ങളും കൂറും വ്യക്തിപരമായ താല്‍പര്യങ്ങളും കൂടിച്ചേരുന്ന സംഘര്‍ഷമാണെന്നും താരങ്ങള്‍ അഭിപ്രായപ്പെട്ടു.
ഗ്യാങ്സ്റ്റര്‍ കഥകളെ വ്യത്യസ്തമായൊരു ലോകത്തിലൂടെ അവതരിപ്പിക്കാനാണ് 'അക്ക'യിലൂടെ ശ്രമിക്കുന്നതെന്ന് സംവിധായകനും തിരക്കഥാകൃത്തുമായ ധര്‍മരാജ് ഷെട്ടി വ്യക്തമാക്കുന്നു. സ്ത്രീകള്‍ അധികാരകേന്ദ്രങ്ങളായി നിലകൊള്ളുന്ന പെര്‍ണുരുവിന്റെ പശ്ചാത്തലത്തില്‍, അധികാരം, പാരമ്പര്യം, വൈരാഗ്യം എന്നിവയ്‌ക്കൊപ്പം കഥാപാത്രങ്ങള്‍ തമ്മിലുള്ള ബന്ധങ്ങള്‍ക്കും പ്രാധാന്യം നല്‍കിയാണ് സീരീസ് ഒരുക്കിയിരിക്കുന്നത്. ഭവാനിയുടെയും രുദ്രയുടെയും ഏറ്റുമുട്ടലിന് പിന്നിലെ വ്യക്തിപരമായ കാരണങ്ങളും അവരുടെ വിശ്വാസങ്ങളും തീരുമാനങ്ങളും കഥയില്‍ നിര്‍ണായകമാകും. നെറ്റ്ഫ്‌ലിക്‌സും വൈആര്‍എഫ് എന്റര്‍ടെയ്ന്‍മെന്റും ഒന്നിക്കുന്ന പുതിയ സീരീസ് എന്ന നിലയിലും 'അക്ക' ശ്രദ്ധ നേടുന്നു.
സംവിധാനം, തിരക്കഥ: ധര്‍മരാജ് ഷെട്ടി. നിര്‍മ്മാണം: വൈആര്‍എഫ് എന്റര്‍ടെയ്ന്‍മെന്റ്. എക്‌സിക്യൂട്ടീവ് പ്രൊഡ്യൂസര്‍മാര്‍: ആദിത്യ ചോപ്ര, യോഗേന്ദ്ര മൊഗ്രെ, അക്ഷയ് വിധാനി, പിആര്‍ഒ : ശബരി
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
