വെട്രിയുടെ പുകവലി കാരണം എന്റെ കണ്ണ് ചുവന്നു; കഥ മുഴുവന്‍ കേള്‍ക്കാതെ ഞാന്‍ ഇറങ്ങിപ്പോയി: ആന്‍ഡ്രിയ

തമിഴ് സിനിമയിലെ ഐക്കോണിക് കൂട്ടുകെട്ടാണ് ധനുഷും വെട്രിമാരനും. ഇരുവരും ഒരുമിച്ചപ്പോഴൊക്കെ ലഭിച്ചത് മികച്ചാ സിനിമാക്കാഴ്ചകളാണ്. ധനുഷിനെ നായകനാക്കി വെട്രിമാരന്‍ ചെയ്യാനിരുന്ന സിനിമയായിരുന്നു ദേശീയ നെടുഞ്ചാലെ. എന്നാല്‍ ഈ സിനിമ പാതിവഴിയില്‍ നിന്നു പോയി. ചിത്രത്തില്‍ നായികയായി പരിഗണിച്ചിരുന്നത് ആന്‍ഡ്രിയ ജെറമിയയെയായിരുന്നു.

ആന്‍ഡ്രിയ സിനിമയുടെ കഥ കേട്ടിരുന്നു. എന്നാല്‍ കഥ പറയുന്ന സമയത്തെ വെട്രിമാരന്റെ പുകവലി കാരണം താന്‍ കഥ കേള്‍ക്കുന്നതിന്റെ പകുതിയ്ക്ക് ഇറങ്ങിപ്പോവുകയായിരുന്നുവെന്നാണ് ആന്‍ഡ്രിയ പറയുന്നത്. പുതിയ ചിത്രം മാസ്‌കിന്റെ പ്രൊമോഷന്റെ ഭാഗമായി നല്‍കിയ അഭിമുഖത്തിലാണ് ആന്‍ഡ്രിയ ഇക്കാര്യം ഓര്‍ത്തെടുത്തത്.

''ആ സമയം എനിക്ക് അഭിനയിക്കാന്‍ യാതൊരു താല്‍പര്യവും ഉണ്ടായിരുന്നില്ല. കഥ കേള്‍ക്കാന്‍ ചെന്നപ്പോള്‍ ഒരാളിരുന്ന് ഒന്നിന് പുറകെ ഒന്നായി സിഗരറ്റ് വലിച്ചു കൊണ്ടിരിക്കുകയാണ്. വെട്രിയുടെ പുകവലി കാരണം എന്റെ കണ്ണ് ഒക്കെ ചുവന്നു. അദ്ദേഹം കഥ പറഞ്ഞ് തീര്‍ന്നില്ല. അതിന് മുമ്പേ ഞാന്‍ പോകുന്നുവെന്ന് പറഞ്ഞ് ഇറങ്ങി. എനിക്ക് ആ പുക പറ്റുന്നില്ലായിരുന്നു'' എന്നാണ് ആന്‍ഡ്രിയ പറയുന്നത്.

ആ സിനിമ നടന്നില്ലെങ്കിലും ആന്‍ഡ്രിയ പിന്നീട് നടിയാവുകയും കയ്യടി നേടുകയും ചെയ്തു. ആന്‍ഡ്രിയയുടെ കരിയറിലെ ഏറ്റവും ആഘോഷിക്കപ്പെട്ട കഥാപാത്രങ്ങളില്‍ ഒന്ന് വട ചെന്നൈയിലൂടെ വെട്രിമാരന്‍ തന്നെ നല്‍കുകയും ചെയ്തു. അതേസമയം വട ചെന്നൈയ്ക്കും ചന്ദ്രയ്ക്കും കയ്യടി ലഭിച്ചുവെങ്കിലും അതിന് ശേഷം തനിക്ക് സിനിമകളൊന്നും ലഭിച്ചില്ലെന്നാണ് ആന്‍ഡ്രിയ പറയുന്നത്.

''ചന്ദ്രയ്ക്ക് ശേഷം എനിക്ക് സിനിമകളൊന്നും ലഭിച്ചില്ല. ഒരുപാട് പ്രശംസ ലഭിച്ചു. പക്ഷെ ജോലി മാത്രം കിട്ടിയില്ല. എന്നെ വച്ച് എന്ത് ചെയ്യണമെന്ന് ആര്‍ക്കും അറിയില്ലായിരുന്നു. നിര്‍ഭാഗ്യവശാല്‍ മിക്ക നടന്മാര്‍ക്കും കരുത്തായ സ്ത്രീകള്‍ തങ്ങളുടെ സിനിമയില്‍ വരാന്‍ ആഗ്രഹിക്കാത്തവരുമാണ്'' എന്നാണ് ആന്‍ഡ്രിയ പറഞ്ഞത്.