'തട്ടവുമിട്ട് പറ്റുന്ന അമ്പലങ്ങളിലെല്ലാം സന്തോഷത്തോടെ ഞങ്ങളുടെ കൂടെ വന്നു; ഒരിക്കല്‍ കൂടെ ആ കവിളില്‍ ഉമ്മ നല്‍കണം'

ഉമ്മൂമ്മയുടെ വിയോഗത്തില്‍ വിങ്ങി അനു സിത്താര. ഇനിയുമൊരു ജന്മമുണ്ടെങ്കില്‍ തന്റെ ഉമ്മയുടെ പേരക്കുട്ടിയായി തന്നെ വീണ്ടും ജനിക്കണമെന്നാണ് താരം പറയുന്നത്. കണ്ണ് നനയിക്കുന്ന വിഡിയോയും താരം പങ്കുവച്ചിട്ടുണ്ട്. കുട്ടിക്കാലം മുതലെ തന്റെ പ്രിയപ്പെട്ട ഒരാളായിരുന്നു ഉമ്മൂമ്മയെന്നും താരം പറയുന്നു. ആ വാക്കുകളിലേക്ക്:

എന്റെ ഉമ്മ (ഉമ്മൂമ്മ) ഇനി ഇല്ല... കുട്ടിക്കാലം മുതല്‍ ഉമ്മ എനിക്ക് ഏറ്റവും പ്രിയപ്പെട്ട ഒരാളായിരുന്നു. ഉമ്മ പറഞ്ഞുതന്ന കഥകളും പാടിത്തന്ന പാട്ടുകളും എല്ലാം എനിക്ക് ഇപ്പോഴും കേള്‍ക്കാന്‍ കഴിയുന്നുണ്ട്... എന്റെ അടുത്തുതന്നെ ഇരുന്ന് 'മോളേ' എന്ന് വിളിക്കുന്നത് പോലെ.

എന്നും സന്തോഷവതിയായി ഇരിക്കുന്ന ഉമ്മയെയാണ് ഞാന്‍ കൂടുതലായും കണ്ടിട്ടുള്ളത്. പരാതികളില്ലാതെ, പരിഭവങ്ങളില്ലാതെ ഞങ്ങളെയൊക്കെ ഒരുപാട് സ്‌നേഹിച്ച്, ഒരുപാട് നല്ല ഓര്‍മ്മകള്‍ ബാക്കിവെച്ച് എന്റെ ഉമ്മ പോയി.

ഇടയ്ക്ക് ഉമ്മ സുധീര്‍ ആപ്പയുടെ അടുത്തും സുല്‍ഫി ആപ്പയുടെ അടുത്തും ഒക്കെ പോകുമ്പോള്‍, 'പോകല്ലേ ഉമ്മ' എന്ന് പറഞ്ഞ് ഞാനും അനിയത്തിയും വാശി പിടിക്കുമായിരുന്നു. ഇപ്പോഴും അതുപോലെ വാശി പിടിക്കാന്‍ തോന്നുകയാണ്... 'ഉമ്മ പോകല്ലേ' എന്ന് പറഞ്ഞ്...

അമ്പലങ്ങളില്‍ ഉത്സവ സമയത്ത് ഞങ്ങള്‍ പരിപാടികള്‍ അവതരിപ്പിക്കുമ്പോള്‍, ഒരു തട്ടവുമിട്ട് ഉമ്മയ്ക്ക് വരാന്‍ പറ്റുന്ന അമ്പലങ്ങളിലെല്ലാം സന്തോഷത്തോടെ ഞങ്ങളുടെ കൂടെ വന്ന്, പരിപാടി കാണാന്‍ മുന്‍നിരയില്‍ തന്നെ സീറ്റ് പിടിച്ചിരിക്കുന്ന ഉമ്മയെ ഓര്‍ക്കുമ്പോള്‍ എനിക്ക് അഭിമാനമാണ്. ആ ഉമ്മയുടെ പേരക്കുട്ടിയായി ജനിച്ചതിനേക്കാള്‍ വലിയൊരു ഭാഗ്യം ഇനി എനിക്ക് കിട്ടാനില്ല.

ഒരിക്കല്‍ കൂടി ഉമ്മയുടെ അടുത്ത് ഇരിക്കണം... ഉമ്മയുടെ കഥകള്‍ കേള്‍ക്കണം, ഉമ്മയുടെ കവിളില്‍ ഒരുപാട് ഉമ്മകള്‍ നല്‍കണം... തമാശകള്‍ പറഞ്ഞ് ഉമ്മയെ ചിരിപ്പിക്കണം... എനിക്ക് വേണ്ടി ഉമ്മ പ്രത്യേകം ഉണ്ടാക്കിത്തരുന്ന ആ ചായ കുടിക്കണം... ഉമ്മയെ കെട്ടിപ്പിടിച്ചു കിടക്കണം. ഇനിയുമൊരു ജന്മമുണ്ടെങ്കില്‍ എന്റെ ഉമ്മയുടെ പേരക്കുട്ടിയായി തന്നെ എനിക്ക് വീണ്ടും ജനിക്കണം.