ഏറ്റവും മികച്ച കാമുകൻ; ​ഗം​ഗുഭായിയുടെ നമസ്തേ പോസ് അനുകരിച്ച് രൺബീർ കപൂർ; പ്രശംസിച്ച് ആലിയ

ബോളിവുഡിലെ ഏറ്റവും ആരാധകരുള്ള താര ജോഡികളാണ് രൺബീർ കപൂറും ആലിയ ഭട്ടും. തങ്ങളുടെ ബന്ധത്തെക്കുറിച്ച് ഇരുവരും നേരത്തെ തന്നെ തുറന്നു സംസാരിക്കാറുണ്ട്. കഴിഞ്ഞ ദിവസം ആലിയ ഭട്ടിന്റെ പുതിയ ചിത്രം ​ഗം​ഗുഭായ് കത്തിയാവാഡിയുടെ ട്രെയിലർ പുറത്തുവന്നിരുന്നു. മികച്ച അഭിപ്രായമാണ് ട്രെയിലറിന് ലഭിച്ചത്. അതിന് പിന്നാലെ ട്രെയിലറിനെ പ്രശംസിച്ചുകൊണ്ടുള്ള രൺബീറിന്റെ നമസ്തേ പോസും വൈറലായി. ഇപ്പോൾ അതിന് പ്രതികരണവുമായി എത്തിയിരിക്കുകയാണ് ആലിയ ഭട്ട്. 

വൈറലായി വിഡിയോകൾ

​ഗം​ഗുഭായി പ്രമോഷന്റെ ഭാ​ഗമായി ആലിയ ഭട്ട് പുറംതിരിഞ്ഞുനിന്ന് നമസ്തേ പറയുന്നതിന്റെ വിഡിയോ വന്നിരുന്നു. അതിനു പിന്നാലെയാണ് രൺബീറിനോട് പാപ്പരാസികൾ ട്രെയിലറിനെക്കുറിച്ച് അഭിപ്രായം ചോദിച്ചത്. അതോടെ ​ഗം​ഗുഭായ് സ്റ്റൈലിൽ താരം നമസ്തേ പോസ് ചെയ്യുകയായിരുന്നു. ഈ രണ്ടു ചിത്രങ്ങള്‌‌‍ ചേർത്തുവച്ചുകൊണ്ടായിരുന്നു ആലിയയുടെ പ്രതികരണം. ഏറ്റവും മികച്ച കാമുകൻ എന്നാണ് ഇൻസ്റ്റ​ഗ്രാം സ്റ്റോറിയായി താരം കുറിച്ചത്. 

രൺബീർ കപൂറിന്റെ അമ്മ നീതു കപൂറും സഹോദരി റിദ്ദിമയും ആലിയയുടെ ​ഗം​ഗുഭായിയെ പ്രശംസിച്ചുകൊണ്ട് രം​ഗത്തെത്തിയിരുന്നു. കഴിഞ്ഞ ദിവസമാണ് സഞ്ജയ് ലീല ബൻസാലി സംവിധാനം ചെയ്ത ചിത്രത്തിന്റെ ട്രെയിലർ പുറത്തുവന്നത്. കമാത്തിപുര അടക്കിവാണിരുന്ന ​ഗം​ഗുഭായ് എന്ന കഥാപാത്രമായാണ് ചിത്രത്തിൽ ആലിയ എത്തുന്നത്. ഈ മാസം 25നാണ് ചിത്രം തിയറ്ററിൽ എത്തുന്നത്.