തിയറ്ററിൽ മിന്നിച്ചു! 'ബെത്‌ലഹേം കുടുംബ യൂണിറ്റ്' ഒടിടിയിൽ ഹിറ്റടിക്കുമോ ? ഈ ആഴ്ചയിലെ പുത്തൻ റിലീസുകളിതാ

എല്ലാ ആഴ്ചയും തിയറ്ററിൽ പോയി ചിലപ്പോൾ നമുക്ക് സിനിമ കാണാൻ പറ്റിയെന്ന് വരില്ല. അതിന് കാരണങ്ങൾ പലതാകാം. അങ്ങനെ പല സാഹചര്യങ്ങൾ കൊണ്ട് തിയറ്ററിൽ മിസ് ആക്കിയ സിനിമകളുണ്ടാകും. അങ്ങനെ കാണണമെന്ന് വിചാരിച്ചിട്ടും കാണാൻ പറ്റാതെ പോയ ആ സിനിമകൾ ഇപ്പോൾ ഒടിടിയിലെത്തുകയാണ്. ഈ വാരാന്ത്യം വിവിധ ഒടിടി പ്ലാറ്റ്ഫോമുകളിലൂടെയായി നിങ്ങളിലേക്ക് എത്തുന്ന ചിത്രങ്ങൾ ഏതൊക്കെയാണെന്ന് നോക്കിയാലോ.

ഈ വാരാന്ത്യത്തിലെ ഏറ്റവും ഹൈലൈറ്റ് ചിത്രം ബെത്‌ലഹേം കുടുംബ യൂണിറ്റ് തന്നെയാണ്. 300 കോടിയലധികം നേടിയാണ് ചിത്രം ബോക്‌സ് ഓഫീസ് റെക്കോർഡുകൾ പൊളിച്ചെഴുതിയത്. നിവിൻ പോളിയും മമിത ബൈജുവും പ്രധാന വേഷങ്ങളിലെത്തിയ ചിത്രം സംവിധാനം ചെയ്തത് ഗിരീഷ് എഡി ആണ്. ഒക്ടോബർ 2 മുതൽ ജിയോ ഹോട്ട്സ്റ്റാറിലൂടെ പ്രേക്ഷകർക്ക് ചിത്രം കാണാനാകും.

നടൻ മമ്മൂട്ടിയുടെ വോയ്‌സ് ഓവറിൽ എത്തുന്ന മലയാളത്തിലെ ആദ്യത്തെ സ്പോർട്സ് ഡോക്യുമെന്ററി സീരീസ് 'പന്തടിക്കാം' ഒടിടിയിലേക്ക് എത്തുകയാണ്. 20 മിനിറ്റോളം ദൈർഘ്യമുള്ള അഞ്ച് എപ്പിസോഡുകളിലൂടെ ആദ്യകാല ക്ലബ് ഫുട്ബോളിൽ നിന്ന് സന്തോഷ് ട്രോഫിയുടെ സുവർണ്ണകാലഘട്ടങ്ങളിലേക്കും പിന്നീട് ഇന്നത്തെ പ്രൊഫഷണൽ ഫുട്ബോളിലേക്കുമുള്ള കേരളത്തിന്റെ വളർച്ചയാണ് സീരീസ് പറയുന്നത്.അഞ്ച് എപ്പിസോഡുകളുള്ള സിനിമാറ്റിക് സീരീസ് ഒക്ടോബർ 1 മുതൽ സീ5 ൽ എക്സ്ക്ലൂസീവായി സ്ട്രീമിങ് ആരംഭിക്കും.

കാർത്തി നായകനായെത്തിയ സ്പൈ ആക്ഷൻ ത്രില്ലർ ചിത്രമാണ് സർദാർ 2. സെപ്റ്റംബർ 10 ന് തിയറ്ററുകളിലെത്തിയ ചിത്രത്തിന് സമ്മിശ്ര പ്രതികരണമാണ് ലഭിച്ചത്. മാളവിക മോഹനൻ ആണ് ചിത്രത്തിൽ നായികയായെത്തുന്നത്. ഒക്ടോബർ ഒന്ന് മുതൽ ആമസോൺ പ്രൈം വിഡിയോയിലൂടെ ചിത്രം സ്ട്രീമിങ് ആരംഭിക്കും. തമിഴ്, തെലുങ്ക്, മലയാളം, കന്നഡ, ഹിന്ദി ഭാഷകളിൽ ചിത്രം കാണാനാകും.

ഐശ്വര്യ ലക്ഷ്മി, അർജുൻ ദാസ് എന്നിവർ ഒന്നിക്കുന്ന റൊമാന്റിക് കോമഡി സീരിസാണ് ലവ്. ബാലാജി മോഹൻ ആണ് സീരിസ് സംവിധാനം ചെയ്തിരിക്കുന്നത്. ഒക്ടോബർ രണ്ടിന് നെറ്റ്ഫ്ലിക്സിലൂടെയാണ് സീരീസ് സ്ട്രീം ചെയ്യുന്നത്. തമിഴിന് പുറമേ ഹിന്ദി, മലയാളം, കന്നഡ, തെലുങ്ക് ഭാഷകളിലും കാണാനാകും. സൗന്ദര്യ രജനികാന്താണ് ഷോ റണ്ണർ.

സുമന്ത് പ്രഭാസും അനന്തിക സനിൽകുമാറും പ്രധാന വേഷത്തിലെത്തുന്ന ചിത്രമാണ് രോമാഞ്ചകം. സെപ്റ്റംബർ മൂന്നിനാണ് ചിത്രം തിയറ്ററുകളിലെത്തിയത്. നെറ്റ്ഫ്ലിക്സിലൂടെ ഒക്ടോബർ ഒന്ന് മുതൽ ചിത്രം കാണാനാകും. തമിഴ്, ഹിന്ദി, മലയാളം, കന്നഡ, തെലുങ്ക് ഭാഷകളിലും ചിത്രം ലഭ്യമാകും.

പങ്കജ് ത്രിപാഠി പ്രധാന വേഷത്തിലെത്തിയ ചിത്രമാണ് ഓ മൈ ഡോ​ഗ്. ഓഗസ്റ്റ് 7 നാണ് ചിത്രം തിയറ്ററുകളിലെത്തിയത്. മനുഷ്യരും നായകളും തമ്മിലുള്ള ബന്ധത്തെക്കുറിച്ചാണ് ചിത്രം പറയുന്നത്. മാഹി റായ്, രാജേഷ് കുമാർ, ഗീത അഗർവാൾ ശർമ്മ, പവൻ മൽഹോത്ര, സുലക്ഷ്യന ബറുവ, വിജയ് മിശ്ര എന്നിവരും ചിത്രത്തിൽ പ്രധാന വേഷങ്ങളിലെത്തുന്നു. ഒസ്കാർ, ബ്രൂണോ എന്നീ നായ്ക്കളും ചിത്രത്തിൽ സുപ്രധാന വേഷങ്ങൾ കൈകാര്യം ചെയ്യുന്നുണ്ട്. നെറ്റ്ഫ്ലിക്സിലൂടെ ഒക്ടോബർ ഒന്ന് മുതൽ ചിത്രം കാണാനാകും.