കൊച്ചി: നടി അന്സിബ ഹസന്റെ പരാതിയില് നടി ലക്ഷ്മി പ്രിയക്കെതിരെയും ഭര്ത്താവ് ജയേഷിനെതിരെയും കേസ്. തൃപ്പൂണിത്തുറ വനിത സെല് എസ് ഐ രേഷ്മയ്ക്കെതിരെയും എഫ്ഐആര് രജിസ്റ്റര് ചെയ്തു. കോടതി നിര്ദേശ പ്രകാരമാണ് കേസ് എടുത്തത്.
തന്നെ നിയമവിരുദ്ധമായി തടഞ്ഞുവെക്കുകയും ഔദ്യോഗിക രേഖകളില് തിരുത്തല് വരുത്തുകയും ചെയ്തു എന്ന് ചൂണ്ടിക്കാട്ടിയാണ് അന്സിബ കോടതിയെ സമീപിച്ചത്. തൃപ്പൂണിത്തുറ വനിതാ സെല്ലില് വച്ച് തന്നോട് നിയമവിരുദ്ധമായി പെരുമാറുകയും തടഞ്ഞുവെക്കുകയും ചെയ്തു എന്നാണ് അന്സിബയുടെ പരാതിയില് വ്യക്തമാക്കുന്നത്. കൂടാതെ, പൊലീസ് സ്റ്റേഷനിലെ ഔദ്യോഗിക രേഖകളില് നിര്ബന്ധപൂര്വ്വം തന്നെക്കൊണ്ട് മാപ്പ് എഴുതി ഒപ്പിടുവിച്ചു. പിന്നീട് ഈ ഒപ്പിട്ട രേഖകളില് താന് അറിയാതെ പ്രതികള്ക്ക് അനുകൂലമായ രീതിയില് വന് തിരുത്തലുകള് വരുത്തിയതായും അന്സിബ ആരോപിക്കുന്നു.
അന്സിബ നേരത്തെ മുഖ്യമന്ത്രിക്കും ആഭ്യന്തരമന്ത്രിക്കും നേരിട്ട് പരാതി നല്കിയിരുന്നു. എന്നാല് ഈ പരാതിയെക്കുറിച്ച് അന്വേഷിച്ച തൃക്കാക്കര എസിപി, ആരോപണങ്ങളില് കഴമ്പില്ലെന്ന് കാണിച്ച് പരാതി തള്ളിക്കളയുകയായിരുന്നു. ഭരണകൂടത്തില് നിന്നും പൊലീസില് നിന്നും നീതി ലഭിക്കാതെ വന്നതോടെയാണ് അന്സിബ കോടതിയെ അഭയം പ്രാപിച്ചത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
