വിക്രമിന്റെ പുതിയ ചിത്രം '96' സംവിധായകനൊപ്പം; സ്ക്രീനിൽ ഒരു മാജിക് തന്നെ പ്രതീക്ഷിക്കാമെന്ന് നിർമാതാക്കൾ

'96', 'മെയ്യഴകൻ' എന്നീ ചിത്രങ്ങളിലൂടെ തെന്നിന്ത്യയൊട്ടാകെ ശ്രദ്ധ നേടിയ സംവിധായകനാണ് സി പ്രേംകുമാർ. ഇപ്പോഴിതാ പ്രേംകുമാറിന്റെ പുതിയ ചിത്രം വരാൻ പോവുകയാണ്. ചിയാൻ വിക്രമിനൊപ്പമാണ് പ്രേംകുമാറിന്റെ പുതിയ ചിത്രം. ആക്ഷന്‍- ത്രില്ലര്‍ വിഭാഗത്തിലുള്ള സിനിമ ആയിരിക്കും ഇതെന്നാണ് സൂചന. വിക്രമിന്റെ കരിയറിലെ 64-ാമത്തെ സിനിമയാണിത്.

വേൽസ് ഫിലിംസ് ഇന്റർനാഷ്ണലിന്റെ ബാനറിൽ ഇഷാരി ​ഗണേഷ് ആണ് ചിത്രം നിർമിക്കുന്നത്. സ്ക്രീനിൽ ഒരു മാജിക് തന്നെ ഉറപ്പ് തരുന്നു എന്നാണ് നിർമാതാക്കൾ കുറിച്ചിരിക്കുന്നത്. ‘മാവീരൻ’ സംവിധായകൻ മഡോണ്‍ അശ്വിനുമായുള്ള സിനിമ ഈ വര്‍ഷം ആരംഭിക്കാനിരിക്കുകയാണ് വിക്രം.

അതിനിടെയാണ് പുതിയ ചിത്രത്തിന്റെ വിവരം പുറത്ത് വന്നിരിക്കുന്നത്. അതേസമയം പ്രേംകുമാർ സംവിധാനം ചെയ്ത 96ന്റെ രണ്ടാം ഭാ​ഗവും അണിയറയിൽ ഒരുങ്ങുന്നുണ്ട്. വിജയ് സേതുപതിയും തൃഷയും മത്സരിച്ച് അഭിനയിച്ച 96 വൻ വിജയമായി മാറിയിരുന്നു.

ചിത്രത്തിന്റെ രണ്ടാം ഭാ​ഗത്തിന്റെ തിരക്കഥാ രചനയിലാണെന്ന് പ്രേംകുമാർ തന്നെ മുൻപൊരു അഭിമുഖത്തിൽ വെളിപ്പെടുത്തിയിരുന്നു. അതേസമയം അരുൺ കുമാർ സംവിധാനം ചെയ്ത വീര ധീര സൂരൻ ആണ് വിക്രമിന്റെതായി ഒടുവിൽ തിയറ്ററുകളിലെത്തിയ ചിത്രം.