ഞങ്ങളൊക്കെ ഈ തലയുടെ ഫാൻസാ! ഓപ്പണിങ് ഡേയിൽ തന്നെ ഞെട്ടിച്ച് ഛോട്ടാ മുംബൈ റീ റിലീസ്; കളക്ഷൻ ഇങ്ങനെ

മോഹൻലാലിന്റെ റീ റിലീസ് ചിത്രങ്ങൾക്കെല്ലാം തിയറ്ററുകളിൽ നിന്ന് വൻ സ്വീകാര്യതയാണ് ലഭിക്കുന്നത്. കഴിഞ്ഞ ദിവസമാണ് ഛോട്ടാ മുംബൈ (Chotta Mumbai) റീ റിലീസിനെത്തിയത്. ഇപ്പോഴിതാ ഓപ്പണിങ് ദിവസം തന്നെ ഛോട്ടാ മുംബൈ വൻ കളക്ഷനാണ് നേടിയിരിക്കുന്നത്. ആദ്യ ദിനം 40 ലക്ഷം രൂപയാണ് ചിത്രം നേടിയത്. തിരഞ്ഞെടുക്കപ്പെട്ട തിയറ്ററുകളിൽ മാത്രമാണ് ചിത്രം പ്രദർശിപ്പിക്കുന്നത്. അവയിൽ നിന്നാണ് ഇത്രയും മികച്ച പ്രതികരണം ചിത്രം നേടിയത്.

ജൂൺ ആറിനാണ് ചിത്രം പ്രദർശനത്തിനെത്തിയത്. അഡ്വാൻസ് ബുക്കിങ്ങിന് നല്ല പ്രതികരണമാണ് പ്രേക്ഷകരിൽ നിന്നു ലഭിച്ചത്. പുത്തൻ സാങ്കേതിക വിദ്യയുടെ അകമ്പടിയോടെ റീ റിലീസ് ചെയ്ത ചിത്രം ഇപ്പോഴും പ്രദർശനം തുടരുകയാണ്. കൊച്ചിക്കാരെയും പാപ്പാഞ്ഞിയെയും ആഘോഷിച്ച ചിത്രത്തിന് തിരക്കഥ രചിച്ചത് ബെന്നി പി നായരമ്പലം ആയിരുന്നു.

ആക്ഷന്‍ കോമഡി ഗണത്തില്‍ പെടുന്ന ചിത്രം മണിയൻപിള്ള രാജു പ്രൊഡക്ഷൻസിന്റെ ബാനറിൽ മണിയൻപിള്ള രാജു, അജയചന്ദ്രൻ നായർ, രഘുചന്ദ്രൻ നായർ എന്നിവർ ചേർന്നാണ് നിർമിച്ചിരിക്കുന്നത്. ദേവദൂതന് ശേഷം ഹൈ സ്റ്റുഡിയോസ് ആണ് സിനിമ ഫോർ കെ ഡോൾബി അറ്റ്മോസിൽ റീമാസ്റ്ററിങ് ചെയ്യുന്നത്.

'വായ അടച്ചു വച്ച് കണ്ണ് തുറന്നു വയ്ക്കുകയാണ് ചില സമയങ്ങളിൽ ചെയ്യാവുന്ന ഏറ്റവും വലിയ കാര്യം'

മലയാളത്തിലെ ആദ്യ ഹൈ ഡെഫിനിഷൻ റസല്യൂഷൻ ഫോർമാറ്റിലുള്ള ചിത്രമാണിത്. ഭാവന, കലാഭവൻ മണി, വിനായകൻ, ജഗതി, രാജൻ പി ദേവ്, സിദ്ദിഖ്, ബിജുക്കുട്ടൻ, മണിക്കുട്ടൻ, സായ്കുമാർ തുടങ്ങിയവരും ഛോട്ടാ മുംബൈയിൽ പ്രധാന വേഷങ്ങളിലെത്തി. വയലാർ ശരത് ചന്ദ്ര വർമയുടെ വരികൾക്ക് രാഹുല്‍ രാജ് ആണ് സം​ഗീതമൊരുക്കിയത്.