'കങ്കുവയിലെ അലർച്ച കേട്ട് തലവേദന'; വിമർശനം കനത്തു, ശബ്ദം കുറയ്ക്കുമെന്ന് നിർമാതാവ്

വമ്പൻ പ്രതീക്ഷയോടെ തിയറ്ററിൽ എത്തിയ ചിത്രമാണ് സൂപ്പർതാരം സൂര്യ നായകനായി എത്തിയ കങ്കുവ. ശിവ സംവിധാനം ചെയ്ത ചിത്രത്തിന് പക്ഷേ ആരാധകരുടെ പ്രതീക്ഷയ്ക്കൊത്ത് ഉയരാനായില്ലെന്നാണ് റിപ്പോര്‍ട്ടുകള്‍. മാത്രമല്ല ചിത്രത്തിന്റെ ശബ്ദകോലാഹലത്തെ വിമർശിച്ചുകൊണ്ട് നിരവധി പേരാണ് രം​ഗത്തെത്തിയത്. ചിത്രത്തിൽ അലർച്ച സഹിക്കാനാവില്ലെന്നും തലവേദനയെടുക്കുന്നു എന്നുമായിരുന്നു വിമർശനം. ഇപ്പോൾ അതിൽ പരിഹാരം കണ്ടിരിക്കുകയാണ് നിർമാതാക്കൾ.

തിയേറ്ററുകളിൽ സിനിമയുടെ വോളിയം മൈനസ് രണ്ട് ആയി കുറയ്ക്കാനാണ് നിർമാതാവ് ജ്ഞാനവേൽ രാജ നിർദേശം നൽകിയിരിക്കുന്നത്. ശനിയാഴ്ച മുതൽ പുതിയ സൗണ്ട് ക്വാളിറ്റിയിലാകും സിനിമയെത്തുക. തെലുങ്ക് ഓൺലൈൻ മാധ്യമമായ ആകാശവാണിക്ക് നൽകിയ അഭിമുഖത്തിലാണ് അദ്ദേഹം ഇക്കാര്യം പറഞ്ഞത്.

'അവള്‍ ഒറ്റയ്ക്കാണ്'; വെള്ള ഷര്‍ട്ടില്‍ ബാത്ത്ടബ്ബില്‍, ഗ്ലാമര്‍ ഫോട്ടോഷൂട്ടുമായി അഭയ ഹിരണ്‍മയി

ഓസ്‌കര്‍ പുരസ്‌കാര ജേതാവായ സൗണ്ട് ഡിസൈനര്‍ റസൂല്‍ പൂക്കിട്ടിയും ചിത്രത്തിലെ ഉയര്‍ന്ന ശബ്ദത്തെക്കുറിച്ച് കുറിച്ചിരുന്നു. അവസാന നിമിഷത്തില്‍ വരുന്ന മാറ്റങ്ങളാണ് ശബ്ദത്തില്‍ പ്രശ്‌നങ്ങളുണ്ടാകാന്‍ കാരണമാകുന്നത് എന്നാണ് അദ്ദേഹം കുറിച്ചത്. ശബ്ദം കേട്ട് തലവേദനയുമായി പുറത്തിറങ്ങുന്ന പ്രേക്ഷകര്‍ ചിത്രം കാണാന്‍ വീണ്ടും എത്തില്ലെന്നും അദ്ദേഹം കുറിച്ചു.

അതിനിടെ കങ്കുവയുടെ രണ്ടാം ഭാഗവുമായി മുന്നോട്ടുപോവാനുള്ള തയാറെടുപ്പിലാണെന്ന് നിര്‍മാതാവ് വ്യക്തമാക്കി. അജിത്തുമായുള്ള ശിവയുടെ സിനിമയ്ക്ക് ശേഷം രണ്ടാം ഭാഗത്തിന് ജോലികള്‍ ആരംഭിക്കും എന്നാണ് അദ്ദേഹം പറഞ്ഞത്. രണ്ടാം ഭാഗത്തില്‍ കാര്‍ത്തിയാവും വില്ലനായി എത്തുക.