എട്ടുവർഷം ഒരുമിച്ച് ജീവിച്ചിട്ടും മനസ്സിലാക്കാൻ പറ്റിയില്ല; മുകേഷ് നല്ല ഭർത്താവല്ലെന്ന് മേതിൽ ദേവിക 

നടനും എംഎൽഎയുമായ മുകേഷുമായുള്ള തന്റെ ദാമ്പത്യബന്ധം അവസാനിപ്പിക്കാൻ തീരുമാനിച്ചതായും വേർപിഞ്ഞാലും സുഹൃത്തുക്കളായി തുടരുമെന്നും നർത്തകി മേതിൽ ദേവിക. മുകേഷിനോട് തനിക്ക് ഒരു വ്യക്തിവൈരാഗ്യവുമില്ലെന്നും അദ്ദേഹം നല്ല മനുഷ്യനാണെന്നു ദേവിക പറഞ്ഞു. 

"തിരഞ്ഞെടുപ്പ് വരെ കാത്തു. അത് കഴിഞ്ഞ ഉടനെ അഭിഭാഷകനെ കണ്ടു", മനോരമ ന്യൂസിന് നൽകിയ അഭിമുഖത്തിലായിരുന്നു ദേവികയുടെ പ്രതികരണം. മുകേഷിൻറെ കുടുംബത്തോടും മുകേഷിനോടും തനിക്ക് പ്രശ്നമില്ലെന്നും പുറത്തു കേൾക്കുന്ന ഗോസിപ്പുകൾ ശരിയല്ല ദേവിക പറഞ്ഞു.  

"‌ഞാൻ മനസ്സിലാക്കിയടത്തോളം അദ്ദേഹം നല്ല മനുഷ്യനാണ്. സ്നേഹിക്കാനൊക്കെ അറിയാവുന്ന മനുഷ്യനാണ്. ജീവിതത്തിൽ അദ്ദേഹം നല്ല ഭർത്താവായിരുന്നില്ല. കുടുംബജീവിതം നല്ല രീതിയിൽ കൊണ്ടുപോകാനായില്ല. എട്ടുവർഷം ഒരുമിച്ച് ജീവിച്ചിട്ടും അദ്ദേഹത്തെ എനിക്ക് മനസ്സിലാക്കാൻ പറ്റിയില്ല. ഇനി മനസ്സിലാക്കാൻ പറ്റുമെന്നും തോന്നുന്നില്ല. അതുകൊണ്ടാണ് ഈ തീരുമാനം", ദേവിക പറഞ്ഞു. രണ്ട് പേരുടെ ആശയങ്ങൾ തമ്മിൽ യോജിച്ച് പോകുന്ന സാഹചര്യമല്ല എന്ന് തോന്നിയതിനാലാണ് വിവാഹബന്ധം പിരിയുന്നതെന്നും മേതിൽ ദേവിക പ്രതികരിച്ചു.