'ശക്തമായ കഥാപാത്രത്തിലൂടെ അദ്ദേഹത്തെ ഞാൻ തിരിച്ചുകൊണ്ടുവരും'; സ‍ഞ്ജയ് ദത്തിന് മറുപടി നൽകി ലോകേഷ്

കഴിഞ്ഞ കുറച്ച് ദിവസങ്ങളായി തന്റെ പുതിയ സിനിമയുടെ പ്രോമഷന്റെ ഭാ​ഗമായ ഒരു ചടങ്ങിൽ ബോളിവുഡ് നടൻ സഞ്ജയ് ദത്ത് സംവിധായകൻ ലോകേഷ് കനകരാജിനെ കുറിച്ച് പറഞ്ഞവാക്കുകൾ ചർച്ചയായിരുന്നു. വിജയ് നായകനായ ലിയോ-യിലൂടെ തന്നെ വേണ്ട രീതിയിൽ ഉപയോ​ഗിക്കാൻ ലോകേഷിന് കഴിഞ്ഞില്ലെന്നതായിരുന്ന അദ്ദഹത്തിന്റെ പരാമര്‍ശം. എന്നാൽ സഞ്ജയ് ദത്തിന്റെ ഈ പ്രസ്താവന ലോകേഷ് ആരാധകർക്ക് അത്ര രസിച്ചിരുന്നില്ല. താരത്തിനെതിരെ സോഷ്യൽ മീഡിയയിൽ വൻ പ്രതിഷേധവും ഉയർന്നിരുന്നു. ഇപ്പോഴിതാ ഇതിൽ പ്രതികരിച്ചിരിക്കുകയാണ് ലോകേഷ് കനകരാജ്.

"ആ സിനിമയുടെ പ്രസ്മീറ്റിന് ശേഷം സഞ്ജയ് ദത്ത് സർ എന്നെ വിളിച്ചിരുന്നു. അദ്ദഹം അത് തമാശയ്ക്ക് പറഞ്ഞതാണെന്നു പറഞ്ഞു. മാധ്യമങ്ങൾ അത് മോശം രീതിയിൽ വളച്ചൊടിക്കുകയാണ് ചെയ്തത്" ലോകേഷ് വ്യക്തമാക്കി."എനിക്ക് അദ്ദേഹത്തോട് യാതൊരു പ്രശ്നങ്ങളും ഇല്ല. ഒരു ഓൺലൈൻ ഇന്റർവ്യൂവിലാണ് ലോകേഷ് ഇക്കാര്യം വ്യക്തമാക്കിയത്

"ഞാൻ ഒരു തികഞ്ഞ സംവിധായകൻ അല്ല. എന്റെ സിനിമയില്‍ എനിക്കും തെറ്റുകൾ ഉണ്ടാകാറുണ്ട്. ആ തെറ്റുകളിൽ നിന്നാണ് ഞാൻ ഓരോന്നും പഠിക്കുന്നത്. അദ്ദേഹത്തെ എന്റെ സിനിമയിലൂടെ ശക്തമായൊരു കഥപാത്രത്തിലൂടെ ഞാൻ തിരിച്ചുകൊണ്ടു വരും". ലോകേഷ് കൂട്ടിച്ചേർത്തു.

ധ്രുവ സർജ നായകനാകുന്ന 'കെഡി -ദി ഡവിൾ' എന്ന പാൻ ഇന്ത്യൻ സിനിമയുടെ പ്രൊമോഷൻ പരിപാടിയിലാണ് സഞ്ജയ് ലോകേഷിനെ കുറിച്ച് പറഞ്ഞത്. "ഞാൻ ദളപതി വിജയിയുടെ വലിയ ആരാധകനാണ്. എനിക്ക് അദ്ദേഹത്തിന്റെ കൂടെ അഭിനയിക്കാൻ വളരെ ഇഷ്ടമാണ്. എന്നാൽ ലിയോ സിനിമയിൽ എന്നെ അതികം ഉപയോ​ഗിക്കാൻ സിനിമയുടെ സംവിധായകനായ ലോകേഷ് കനകരാജിന് പറ്റിയില്ല.എനിക്കതിൽ അയാളോട് ദേഷ്യമുണ്ട്". എന്നായിരുന്നു സഞ്ജയ് ദത്തിന്റെ പ്രസ്താവന.

വിജയ്‌യെ നായകനാക്കി ലോകേഷ് കനകരാജ് സംവിധാനം ചെയ്ത ആക്ഷൻ ചിത്രമാണ് ലിയോ. ചിത്രത്തിൽ ആന്റണി ദാസ് എന്ന കഥാപാത്രത്തെയാണ് സഞ്ജയ് ദത്ത് അവതരിപ്പിച്ചത്.