'ഇവർ ​ഗണേശ പൂജയ്ക്ക് അല്ലേ വന്നത്, അല്ലാതെ റാംപ് വാക്കിനല്ലല്ലോ ?'; വസ്ത്രധാരണത്തിന്റെ പേരിൽ ദിഷ പഠാനിക്ക് വിമർശനം

വസ്ത്രധാരണത്തിന്റെ പേരിൽ നടി ദിഷ പഠാനിക്ക് വിമർശനം. ​വിനായക ചതുർഥിയോടനുബന്ധിച്ച് മുകേഷ് അംബാനിയുടെ വസതിയിൽ സംഘടിപ്പിച്ച പൂജ ചടങ്ങുകളിൽ പങ്കെടുക്കാനെത്തിയതായിരുന്നു ദിഷ. ഡീപ് നെക്ക് ബ്ലൗസും ലെഹങ്കയും ധരിച്ചാണ് ദിഷ പരിപാടിക്കെത്തിയത്. ഇതാണ് ഒരു വിഭാ​ഗം ആളുകളെ ചൊടിപ്പിച്ചത്. ദിഷയുടെ വസ്ത്രം ​ഗ്ലാമറസ് ആണെന്നും ഭൂരിഭാ​ഗം പേരും പറയുന്നു.

'എല്ലാ ചടങ്ങുകളെയും ഗ്ലാമറസ് ആയി കാണാതെ, സാഹചര്യത്തിനനുസരിച്ചുള്ള വസ്ത്രധാരണമാണ് വേണ്ടതെന്നും' മറ്റു ചിലർ ചൂണ്ടിക്കാട്ടി. 'മതപരമായ ആഘോഷ വേളകളിൽ ഡ്രസ് കോഡ് വേണമെന്ന്' ഒരു വിഭാഗം ആളുകൾ അഭിപ്രായപ്പെട്ടു. 'ഇവരെന്താ പാർട്ടിക്ക് വന്നതാണോ അതോ പൂജയ്ക്ക് വന്നതാണോ ? ചടങ്ങിൽ പങ്കെടുത്ത മറ്റുള്ളവർ മാന്യവും ശരീരം മറയ്ക്കുന്നതുമായ വസ്ത്രങ്ങളാണ് ധരിച്ചിരുന്നതെന്നും' ചിലർ‌ പറയുന്നു.

'ഗണപതി ദർശനത്തിനും ഭക്തിനിർഭരമായ ചടങ്ങുകളിൽ പങ്കെടുക്കാനുമല്ലേ നിങ്ങൾ അവിടെ പോകുന്നത്, അല്ലാതെ റാംപ് വാക്കിനല്ലല്ലോ ??'- എന്നാണ് ഒരാൾ കുറിച്ചത്. 'ആദ്യം കൃതി സനോൺ, ഇപ്പോൾ ദിഷ - വിനായക ചതുർഥിക്ക് ഇത്തരമൊരു വേഷം അനുയോജ്യമാണോ ? ഹിന്ദു ഉത്സവങ്ങളുടെ പവിത്രതയോട് യാതൊരു ആദരവും ബഹുമാനവുമില്ലാത്തവരാണ് ഈ ബോളിവുഡ് താരങ്ങൾ'.- എന്നാണ് വേറൊരാളുടെ കമന്റ്.

എന്നാൽ ദിഷയെ പിന്തുണയ്ക്കുന്നവരും കുറവല്ല. വസ്ത്രധാരണം എന്നത് ഓരോരുത്തരുടെയും വ്യക്തിപരമായ ഇഷ്ടമാണെന്നെന്നും അവർ പറയുന്നു. അടുത്തിടെ രക്ഷാബന്ധനോടനുബന്ധിച്ച് ഒരു ജ്വലറി ബ്രാൻഡിന്റെ പരസ്യത്തിൽ പ്രത്യക്ഷപ്പെട്ട നടി കൃതി സനോണിനും വസ്ത്രധാരണത്തിന്റെ പേരിൽ വിമർശനങ്ങൾ‌ നേരിടേണ്ടി വന്നിരുന്നു. നാനാഭാ​ഗങ്ങളിൽ നിന്നും വിമർശനങ്ങൾ ശക്തമായതോടെ പരസ്യം ഒടുവിൽ പിൻവലിച്ചു.