ഇനിയാണ് കളി തുടങ്ങുന്നത്! മോളിവുഡിലേക്ക് തിരിച്ചെത്തി ദുൽഖർ സൽമാൻ; 'ഐ ആം ​ഗെയിം' ടൈറ്റിൽ പോസ്റ്റർ

കിങ് ഓഫ് കൊത്തയ്ക്ക് ശേഷം നടൻ ദുൽഖർ സൽമാനോട് ആരാധകർ ഏറ്റവും കൂടുതൽ ചോദിച്ച ചോദ്യങ്ങളിലൊന്നായിരുന്നു 'എന്നാണ് ഇനി മലയാളത്തിലേക്ക്' എന്ന്. ഇപ്പോഴിതാ ആ ചോദ്യത്തിനുള്ള ഉത്തരമായിരിക്കുകയാണ്. ദുൽഖറിന്റെ പുതിയ മലയാള ചിത്രത്തിന്റെ ടൈറ്റിൽ പോസ്റ്റർ പുറത്തുവന്നിരിക്കുകയാണ്. ഐ ആം ​ഗെയിം എന്നാണ് ചിത്രത്തിന്റെ പേര്.

മുറിവേറ്റ ഒരു കൈയിൽ ബോളും മറു കൈയിൽ ചീട്ടും പിടിച്ചു നിൽക്കുന്ന ദുൽഖറിനെയാണ് പോസ്റ്ററിൽ കാണാനാവുക. നഹാസ് ഹിദായത്ത് ആണ് ചിത്രം സംവിധാനം ചെയ്യുന്നത്. ദുൽഖറിന്റെ കരിയറിലെ 40-ാമത്തെ ചിത്രം കൂടിയാണിത്. ദുൽഖറും ജോം വർ​ഗീസും ചേർന്നാണ് ചിത്രം നിർമിക്കുന്നത്.

മലയാളം, തമിഴ്, തെലുങ്ക്, കന്നഡ, ഹിന്ദി ഭാഷകളിലാണ് ചിത്രം റിലീസ് ചെയ്യുന്നത്. ദുല്‍ഖര്‍ സല്‍മാന്‍റെ ഉടമസ്ഥതയിലുള്ള വേഫെറര്‍ ഫിലിംസ് ആണ് ചിത്രം അവതരിപ്പിക്കുന്നത്. ആർഡിഎക്സ് എന്ന ചിത്രത്തിന് ശേഷം നഹാസ് ഹിദായത്ത് ഒരുക്കുന്ന ചിത്രം കൂടിയാണിത്. നഹാസിനൊപ്പം ദുൽഖർ കൂടി ചേരുമ്പോൾ പ്രേക്ഷകരും വലിയ പ്രതീക്ഷയിലാണ്.

'കാലിന്റെ പരിക്ക് ഭേദമായോ?' പുഷ്പ 2 വിജയത്തിന് ശേഷം സുകുമാറും രശ്മികയും ഒരു വേ​ദിയിൽ

സജീർ ബാബ, ബിലാൽ മൊയ്തു, ഇസ്മയിൽ അബൂബക്കർ എന്നിവർ ചേർന്നാണ് ചിത്രത്തിന് തിരക്കഥയൊരുക്കുന്നത്. വെങ്കി അറ്റ്‌ലൂരി സംവിധാനം ചെയ്ത ലക്കി ഭാസ്കര്‍ ആണ് ദുൽഖറിന്റേതായി ഒ‌ടുവിൽ പ്രേക്ഷകരിലേക്കെത്തിയ ചിത്രം.