'നടനെന്ന നിലയിൽ ഒരു നേട്ടവുമില്ല, പുഷ്പയിൽ അഭിനയിച്ചത് സംവിധായകനോടുള്ള സ്നേഹം കൊണ്ട്'; ഫഹദ് അന്ന് പറഞ്ഞത്

അല്ലു അർജുൻ നായകനായി എത്തിയ പുഷ്പ 2 ബോക്സ് ഓഫിസിൽ വൻ മുന്നേറ്റം നടത്തുകയാണ്. ചിത്രത്തിൽ ഫഹ​ദ് ഫാസിൽ ആണ് വില്ലൻ വേഷത്തിൽ എത്തിയത്. ഭൻവർ സിങ് ഷെഖാവത്ത് എന്ന കഥാപാത്രത്തെ ആണ് അവതരിപ്പിച്ചത്. ആദ്യ ഭാ​ഗത്ത് ക്രൂരനായ വില്ലനായാണ് ഈ കഥാപാത്രത്തെ അവതരിപ്പിച്ചത്. എന്നാൽ രണ്ടാ ഭാ​ഗത്തിലേക്ക് എത്തിയപ്പോൾ ഫഹദിന്റെ കഥാപാത്രത്തെ മോശമായാണ് ചിത്രീകരിച്ചത് എന്ന രീതിയിൽ വിമർശനം ഉയർന്നു. ഇപ്പോൾ സോഷ്യൽ മീഡിയയിൽ വൈറലാവുന്ന പുഷ്പയെക്കുറിച്ച് ഫഹദ് പറയുന്ന പഴയ വിഡിയോ ആണ്.

പുഷ്പ സിനിമയിൽ അഭിനയിച്ചതുകൊണ്ട് നടനെന്ന നിലയില്‍ തനിക്കൊരു നേട്ടവും ഉണ്ടായിട്ടില്ലെന്നാണ് ഫഹദ് ഫാസിൽ പറയുന്നത്. അനുപമ ചോപ്രയ്ക്കു നൽകിയ അഭിമുഖത്തിലാണ് പുഷ്പ സിനിമയെക്കുറിച്ച് താരം പറഞ്ഞത്. ‘പുഷ്പ’യിൽ തന്റെ മാജിക് ഒന്നും ആരാധകർ പ്രതീക്ഷിക്കുന്നില്ലെന്നും സംവിധായകനോടുള്ള സ്നേഹം കൊണ്ടുമാത്രം ചെയ്ത സിനിമയാണ് പുഷ്പയെന്നുമാണ് താരം പറഞ്ഞത്.

'ഈ വർഷം ഒരുപാട് പരീക്ഷിച്ചു...'; കുറിപ്പുമായി സാമന്ത

‘പുഷ്പ എന്ന സിനിമ കൊണ്ട് എനിക്ക് പ്രത്യേകിച്ച് ഒരു നേട്ടവും ഉണ്ടായെന്ന് തോന്നുന്നില്ല. ഞാനിത് സംവിധായകൻ സുകു സാറിനോടും പറഞ്ഞിട്ടുണ്ട്. ഞാനിത് തുറന്നു പറയേണ്ടതുണ്ട്. എനിക്കിത് മറച്ചു വക്കേണ്ട കാര്യമില്ല. ഞാൻ സത്യസന്ധമായി പറയുകയാണ്. ഇവിടെ ഞാൻ ആരോടും അനാദരവ് കാണിക്കുകയല്ല ചെയ്ത വർക്കിനെക്കുറിച്ച് സംസാരിക്കുകയാണ്. ഞാൻ എനിക്ക് ചെയ്യാനുള്ളതൊക്കെ ഇവിടെ ചെയ്യുന്നുണ്ട്. ആളുകൾ ‘പുഷ്പ’യിൽ എന്നിൽ നിന്ന് ഒരു മാജിക്ക് പ്രതീക്ഷിക്കുന്നുണ്ടെന്നു എനിക്ക് തോന്നുന്നില്ല. സുകു സാറിനൊപ്പം ഒരു സിനിമ ചെയ്യാനുള്ള താൽപര്യം കൊണ്ടും അദ്ദേഹത്തോടുള്ള സ്നേഹം കൊണ്ടും മാത്രം ചെയ്ത പടമാണ്, അത് അത്രയേ ഉള്ളൂ. എനിക്ക് ചെയ്യാനുള്ളതെല്ലാം ഇവിടെയാണ്, അത് വളരെ വ്യക്തമാണ്.’- ഫഹദ് ഫാസിൽ പറഞ്ഞു.