സംഗീതപ്രേമികളെ ഞെട്ടിച്ചു കൊണ്ടാണ് അരിജിത് സിങ് താന് പിന്നണി ഗാന രംഗത്തു നിന്നും പിന്മാറുകയാണെന്ന് അറിയിച്ചത്. കഴിഞ്ഞ ഒരു പതിറ്റാണ്ടിലധികമായി ഇന്ത്യന് സംഗീത ലോകത്തെ മിന്നും താരമായിരുന്നു അരിജിത്. അദ്ദേഹത്തിന്റെ പാട്ടുകളില്ലാത്ത ഒരു ദിവസം പോലും കഴിഞ്ഞ കുറേക്കാലമായി കടന്നു പോയിട്ടില്ല. പിന്നണി ഗാന രംഗത്തു നിന്നും പിന്മാറിയെങ്കിലും സ്വതന്ത്ര്യമായി പാട്ടുകള് ഉണ്ടാക്കുകയും പാടുകയുമൊക്കെ ചെയ്യുമെന്നാണ് അരിജിത് സിങ് അറിയിച്ചിരിക്കുന്നത്.
അരിജിത്തിന്റെ തീരുമാനത്തിന് പിന്നില് പിന്നണി ഗാന രംഗത്തെക്കുറിച്ചുള്ള ഡൂംസ് ഡേ പ്രെഡിക്ഷനുണ്ടെന്നാണ് ഗായകന് ജി വേണുഗോപാല് പറയുന്നത്. ബോളിവുഡ് സംഗീത രംഗത്തെ നിയന്ത്രിക്കുന്നത് കോര്പ്പറേറ്റുകളാണെന്നും അദ്ദേഹം ഫെയ്സ്ബുക്ക് കുറിപ്പില് പറയുന്നു. ആ വാക്കുകളിലേക്ക്:
ഇന്ത്യന് സിനിമാ സംഗീതത്തിലെ എക്കാലത്തേയും പോപ്പുലറും സെയ്ലബിളുമായ ഗായകന് അരിജിത് സിങ്ങ് പിന്നണി ഗാനരംഗം ഉപേക്ഷിക്കുന്നു. ഇനി മുതല് സിനിമയില് പിന്നണി പാടില്ല എന്നതാണ് അദ്ദേഹത്തിന്റെ തീരുമാനം. വരും കാലങ്ങള് മാത്രമല്ല, ഇക്കാലവും സിനിമാ പിന്നണി ഗാനരംഗത്തെക്കുറിച്ചുള്ള ഒരു ' ഡൂംസ്ഡേ പ്രെഡിക്ഷന് ' (ഡൂംസ്ഡേ പ്രെഡിക്ഷന്) കൂടി ഇദ്ദേഹത്തിന്റെ തീരുമാനത്തില് ഉണ്ടെന്നാണ് വിശ്വാസം. സമാന്തരമായ സുഗമ സംഗീത മേഖലയുടെ ശക്തിയും കച്ചവട സാധ്യതയും അരിജിത്തിന്റെ തീരുമാനത്തിന് പിറകിലുണ്ട്.
മറ്റെല്ലാ ഗായകരെയും പോലെ അരിജിത്തിനെയും പ്രശസ്തിയുടെ നാള്വഴികളില് കൈപിടിച്ചാനയിച്ചത് ബോളിവുഡ് സിനിമാ സംഗീതം തന്നെയാണ്. അവിടെ നിയമാവലികള് കടുപ്പമാണ്. സംഗീത ലേബല്സ് ആണ് അവിടെ അനിഷേധ്യമായ നിയമങ്ങള് സൃഷ്ടിക്കുന്നത്. ടീ സീരീസ്, സീ മ്യൂസിക് , സോണി മ്യൂസിക്, സരേഗമ, ടിപ്സ്, യൂണിവേഴ്സല് മ്യൂസിക്, തുടങ്ങിയവരാണ് റിക്കാര്ഡിംഗ് ഇന്ഡസ്ട്രിയുടെ പരിപൂര്ണ്ണ നിയന്ത്രണം! Control Licensing, Digital Distribution, Licensing rights, ഇതെല്ലാം ഇവര് തീരുമാനിക്കും. ഗായകരുടെ പ്രതിഫലം മാത്രമല്ല, ഉദിച്ചുയരലും കെട്ടടങ്ങലും ഒട്ടുമിക്കവാറും അവരുടെ കൈകളിലാണു.
ISAMRA (Indian Singers and Musicians Rights Aossciation) രൂപം കൊണ്ട നാളുകളിലൊന്നില് ബോളിവുഡ് ഐക്കണ് ഗായകന് സോനു നിഗം അതി പ്രശസ്തമായ മൂന്ന് നാല് ഗാനങ്ങള്ക്ക് അദ്ദേഹത്തിന് കിട്ടിയ പ്രതിഫലം എത്രയാണെന്നൂഹിക്കാന് ഞങ്ങളോട് തമാശ രൂപേണ പറഞ്ഞു. അവയിലെ രണ്ട് ഗാനങ്ങള് പ്രതിഫലമില്ലാതെയും മറ്റ് രണ്ട് ഗാനങ്ങള്ക്ക് നിസ്സാരമായ പ്രതിഫലം നല്കുകയുമായിരുന്നു. മലയാളത്തില് ഇതില് നിന്നും ഭേദമാണല്ലോ എന്ന് ഞാന് പറഞ്ഞപ്പോള് അദ്ദേഹം പറഞ്ഞു - ' തെന്നിന്ത്യയിലെ ഭാഷകളില് പാടുമ്പോഴാണ് ഞാന് ബോളിവുഡിന്റെ പ്രതിഫലം വാങ്ങിക്കുന്നത്'
നമ്മള് ഇത് വരെ കാണുകയും കേള്ക്കുകയും ചെയ്ത സിനിമാ പിന്നണി ഗായകരെക്കാളൊക്കെ പല മടങ്ങ് വലുതാണു അരിജിത് സിങ്, സംഗീതത്തിന്റെ കമേഴ്സ്യല് ഇടങ്ങളില് . പ്രശസ്തരായ പല വെസ്റ്റേണ് ബാന്ഡുകള്ക്ക് പോലും പലപ്പോഴും അരിജിത്തിന്റെ ഗാനസദസ്സുകള്ക്ക് കിട്ടുന്ന പ്രതിഫലമോ, അദ്ദേഹത്തിന്റെ റിക്കാര്ഡഡ് ഗാനങ്ങള്ക്ക് കിട്ടുന്ന അന്താരാഷ്ട്ര പ്രശസ്തിയോ സ്ട്രീമിങ്ങോ കിട്ടാറില്ല. ഇത് ഒട്ടൊന്നുമല്ല ബോളിവുഡിലെ ലേബല്സിനെയും ചില ഖാന് നായക പ്രഭൃതികളേയും വിഷമഘട്ടത്തിലാക്കുന്നത്. മറ്റേത് ഇന്ഡസ്ട്രിയെക്കാളുമേറെ കൂട്ടം വിട്ട് ശക്തിയായ് ഉയര്ന്ന് പറക്കുന്ന ഈ പക്ഷിയെ കല്ലെറിഞ്ഞ് താഴെ വീഴ്ത്താനുള്ള ശ്രമങ്ങള് ആരംഭിക്കുകയായി.
അരിജിത് സിങ്ങും, ശങ്കര് മഹാദേവനും, സോനു നിഗമും സമാന്തര സംഗീത പ്ലാറ്റ്ഫോമുകളില് അവരുടെ ശക്തമായ സാന്നിദ്ധ്യം അറിയിച്ചവരാണ്. അവരെയൊന്നും ഇനി ബോളിവുഡ് സിനിമാ സംഗീതത്തിനാവശ്യമില്ല, അല്ലെങ്കില് അവര്ക്കിനി ബോളിവുഡ് സംഗീതത്തെ ആവശ്യമില്ല എന്നുള്ളതാണ് യാഥാര്ത്ഥ്യം! ചെറിയ ചെറിയ വളയങ്ങളില് കൂടി ചാടിച്ച് പരിശീലിപ്പിച്ച ഇവര് പലരും വളയങ്ങളില്ലാതെ ചാടിത്തുടങ്ങിയിരിക്കുന്നു.
ഇത് ബോളിവുഡില് മാത്രമല്ല, നാടെങ്ങും സംഭവിക്കുന്നു. കേരളത്തിലും! സിനിമാ പിന്നണി ഗായകരുടെ സംഗീത പരിപാടികളെക്കാളേറെ ആസ്വാദകര് നെഞ്ചേറ്റുന്ന ഗായകരും അവരുടെ ബാന്ഡുകളും എണ്ണം ഏറി വരികയാണ്. ' അഗം ' ബാന്ഡ് & ഹരീഷ് ശിവരാമകൃഷ്ണന്, റാപ്പ് രംഗത്ത് കളം നിറഞ്ഞ് നില്ക്കുന്ന വേടന്, ഹനുമാന് കൈന്ഡ്, ഡെഫ്സി, ഭക്തിഗാന സദസ്സുകളുടെ ഹരമായി മാറിക്കൊണ്ടിരിക്കുന്ന നന്ദ ഗോവിന്ദം ഭജന്സ്, ഇവരൊക്കെ സിനിമാ സംഗീതത്തിന്റെ അസ്തമയവും സമാന്തര പോപ്പുലര് സംഗീതത്തിന്റെ ഉദയത്തിന്റെ നാന്ദിയും കുറിക്കുകയാണ്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
