'വന്തിട്ടേന്‍ സൊല്ല്...'; 'ഡ്യൂഡി'നെതിരെ കോപ്പിറൈറ്റുമായി ഇളയരാജ; എത്ര കിട്ടിയിട്ടും പഠിക്കാതെ നിര്‍മാതാക്കള്‍!

അനുമതിയില്ലാതെ തന്റെ പാട്ട് ഉപയോഗിച്ചതിന് ഡ്യൂഡ് സിനിമ നിര്‍മാതാക്കള്‍ക്കെതിരെ പരാതി നല്‍കി സംഗീത സംവിധായകന്‍ ഇളയരാജ. പ്രദീപ് രംഗനാഥന്‍ നായകനായ ചിത്രത്തില്‍ താന്‍ കംപോസ് ചെയ്ത കറുത്ത മച്ചാന്‍ എന്ന പാട്ട് ഉപയോഗിച്ചതിനെതിരെയാണ് ഇളയരാജ കോടതിയെ സമീപിച്ചിരിക്കുന്നത്. ചിത്രത്തില്‍ ഇളയരാജയുടെ പാട്ടിന് മമിത ബൈജു ഡാന്‍സ് കളിക്കുന്ന രംഗം സോഷ്യല്‍ മീഡിയയില്‍ വൈറലായിരുന്നു.

ദീപാവലി റിലീസായ തിയേറ്ററിലെത്തിയ ഡ്യൂഡ് മികച്ച വിജയമായി മാറിയതിന് പിന്നാലെയാണ് ഇളയരാജ കേസുമായി കോടതിയെ സമീപിച്ചിരിക്കുന്നത്. ഇളയരാജയുടെ പരാതിയോട് സിനിമയുടെ നിര്‍മാതാക്കളായ മൈത്രി മൂവീസ് ഇതുവരേയും പ്രതികരിച്ചിട്ടില്ല.

തന്റെ പാട്ടുകള്‍ അനുമതിയില്ലാതെ ഉപയോഗിക്കുന്നതിനെതിരെയുള്ള ഇളയരാജയുടെ നിയമപോരാട്ടം തുടര്‍ക്കഥയാവുകയാണ്. നേരത്തെ മലയാള ചിത്രം മഞ്ഞുമ്മല്‍ ബോയ്‌സില്‍ തന്റെ പാട്ട് ഉപയോഗച്ചതിനെതിരെ അദ്ദേഹം കേസ് നല്‍കിയിരുന്നു. തുടര്‍ന്ന് വലിയൊരു തുക നഷ്ടപരിഹാരമായി നിര്‍മാതാക്കള്‍ക്ക് നല്‍കേണ്ടി വന്നിരുന്നു.

അജിത് നായകനായ ഗുഡ് ബാഡ് അഗ്ലിയ്‌ക്കെതിരേയും ഇളയരാജ കോടതിയെ സമീപിച്ചിരുന്നു. മൈത്രി മൂവീസിന് തന്നെയായിരുന്നു ഈ സിനിമയുടെ നിര്‍മാണം. ഇളയരാജ നല്‍കിയ കേസിന് പിന്നാലെ ഗുഡ് ബാഡ് അഗ്ലി നെറ്റ്ഫ്‌ളിക്‌സില്‍ നിന്നും പിന്‍വലിച്ചിരുന്നു. ഈ അനുഭവത്തില്‍ നിന്നും പാഠം ഉള്‍ക്കൊള്ളാതെ മൈത്രി മൂവീസിന് വീണ്ടും നിയമക്കുരുക്കില്‍ പെട്ടിരിക്കുകയാണ്.