'കുടയല്ല വടി', മുത്തശ്ശിയുടെ ദേഷ്യം കണ്ട് പൊട്ടിച്ചിരിക്കുന്ന ജ​ഗതി; വിഡിയോ വൈറൽ

മലയാളികളുടെ പ്രിയ താരമാണ് ജ​ഗതി ശ്രീകുമാർ. വാഹനാപകടത്തിൽ പരുക്കേറ്റ് ഏറെ നാളായി സിനിമയിൽ നിന്ന് വിട്ടു നിൽക്കുകയാണ് അദ്ദേഹം. പതിയെ ജീവിതത്തിലേക്ക് തിരിച്ചുവരുന്ന ജ​ഗതി വീണ്ടും നമ്മെ ചിരിപ്പിക്കാൻ എത്തും എന്ന പ്രതീക്ഷയിലാണ് മലയാളികൾ. ഇപ്പോൾ ഇതാ ഹാസ്യസാമ്രാട്ടിന്റെ ഒരു പൊട്ടിച്ചിരി വിഡിയോ ആണ് സോഷ്യൽ മീഡിയയിൽ വൈറലാവുന്നത്. 

വയോധികരായ ദമ്പതികൾ വീട്ടിലെ ഉമ്മറത്തിരുന്ന്കുശലം പറയുന്നതിന്റെ വിഡിയോ ആണ് ജ​ഗതിയെ ചിരിപ്പിച്ചത്. താൻ പറഞ്ഞത് കേൾക്കാത്തതിന് അപ്പൂപ്പനോട് ദേഷ്യപ്പെടുന്ന അമ്മൂമ്മയാണ്  വിഡിയോയിൽ.  സോഷ്യൽ മീഡിയയിൽ വൈറലായ വിഡിയോ കണ്ടാണ് ജ​ഗതി കുടുകൂടാ ചിരിക്കുന്നത്. 

തെങ്ങോലൊരു ചുവട് കാ ഇല്ല, വളം മേടിച്ചു തരാനേ, എന്നാണ് അമ്മൂമ്മ പറയുന്നത്.  എന്നാന്നാ കുടയോ ? എന്നായിരുന്നു ഇത് കേട്ട് അപ്പൂപ്പന്റെ മറുചോദ്യം. ഇതിന് കുടയല്ല വടി ! എന്നായിരുന്നു അമ്മൂമ്മയുടെ മറുപടി. 

മകൾ പാർവതിയാണ് ഫോണിലൂടെ ഈ വിഡിയോ ജഗതിക്കു കാണിച്ചുകൊടുക്കുന്നത്. ജ​ഗതി ശ്രീകുമാറിന്റെ പേരിലുള്ള ഫേയ്സ്ബുക്ക് അക്കൗണ്ടിലൂടെയാണ് വിഡിയോ പുറത്തുവിട്ടത്. പാറുവിനൊപ്പം അൽപ്പം ചിരി മധുരം എന്നാണ് ‌വിഡിയോക്ക് അടിക്കുറിപ്പായി നൽകിയിരിക്കുന്നത്.