ബോക്‌സ് ഓഫീസില്‍ വന്‍ വിജയമാണ് ലോക ചാപ്റ്റര്‍ 1: ചന്ദ്ര. കല്യാണി പ്രിയദര്‍ശന്‍ ടൈറ്റില്‍ റോളിലെത്തിയ സിനിമ മലയാളത്തിലെ ഏറ്റവും വലിയ ഹിറ്റിലേക്കുള്ള കുതിപ്പിലാണെന്നാണ് വിലയിരുത്തലുകള്‍. ഇതിനോടകം തന്നെ 200 കോടി ക്ലബില്‍ ഇടം നേടിയിട്ടുണ്ട് ലോക. മലയാളത്തില്‍ നിന്നും 200 കോടി ക്ലബ്ബില്‍ ഇടം നേടുന്ന നാലാമത്തെ മാത്രം സിനിമയാണ് ലോക.
കേരളത്തിന് പുറത്തും വലിയ സ്വീകാര്യതയാണ് ലോക നേടുന്നത്. ലോകയുടെ തമിഴ്, ഹിന്ദി, തെലുങ്ക് പതിപ്പുകളും ബോക്‌സ് ഓഫീസിലേക്ക് ആളുകളെ ആകര്‍ഷിക്കുന്നുണ്ട്. സോഷ്യല്‍ മീഡിയയും താരങ്ങളുമൊക്കെ ലോകയെ പുകഴ്ത്താന്‍ മത്സരിക്കുകയാണ്. ബോളിവുഡിലെ സൂപ്പര്‍ താരങ്ങളടക്കം ലോകയെ പ്രശംസിച്ച് എത്തുകയുണ്ടായി.
ഇപ്പോഴിതാ മലയാളികളുടെ പ്രിയ താരം ജയറാം ലോകയെക്കുറിച്ച് പറഞ്ഞ വാക്കുകള്‍ ശ്രദ്ധ നേടുകയാണ്. മലയാളത്തിലെന്നത് പോലെ തെലുങ്കിലും തമിഴിലുമെല്ലാം നിറ സാന്നിധ്യമായ നടനാണ് ജയറാം. മറ്റ് ഭാഷകളില്‍ നൂറ് കോടി മുടക്കിയെടുക്കുന്ന സിനിമകളേക്കാളും വിഷ്വല്‍ എഫക്ട്‌സുണ്ട് ലോകയ്‌ക്കെന്നാണ് ജയറാം പറയുന്നത്. തന്റെ പുതിയ സിനിമയായ മിറൈയുടെ പ്രസ് മീറ്റില്‍ സംസാരിക്കുകയായിരുന്നു ജയറാം.
''പല സിനിമകളും 100 കോടി ബജറ്റില്‍ സിനിമ എടുത്തിട്ട് അതിനൊരു 25 കോടിയുടെ വിഷ്വല്‍ എഫക്ട്‌സ് കൊണ്ടുവരാന്‍ പറ്റുന്നതിലും ഭയങ്കരമല്ലേ ലോക പോലൊരു സിനിമയില്‍ കൊണ്ടു വന്നിരിക്കുന്നത്. അത് 30 കോടി ബജറ്റില്‍ എടുത്ത സിനിമയാണെന്നാണ് എന്റെ വിശ്വാസം. പക്ഷെ നൂറ് കോടിയുടെ എഫക്ടല്ലേ അവര്‍ കൊണ്ടു വരുന്നിരിക്കുന്നത്. അതിന് ടെക്‌നീഷ്യന്‍സിനാണ് നൂറ് ശതമാനം കയ്യടിയും കൊടുക്കേണ്ടത്. മറ്റ് ഭാഷകള്‍ മാത്രമല്ല ലോകം തന്നെ കണ്ടു പഠിക്കേണ്ടതാണ്.'' എന്നാണ് ജയറാം പറഞ്ഞത്.
ഡൊമിനിക് അരുണ്‍ സംവിധാനം ചെയ്ത ചിത്രമാണ് ലോക ചാപ്റ്റര്‍ 1: ചന്ദ്ര. അഞ്ച് ഭാഗങ്ങളുള്ള സീരീസിലെ ആദ്യ സിനിമയാണിത്. ടൊവിനോയായിരിക്കും രണ്ടാം ഭാഗത്തിലെ പ്രധാന താരമെന്നാണ് സൂചനകള്‍. ആദ്യ ഭാഗത്തില്‍ ടൊവിനോ തോമസ്, ദുല്‍ഖര്‍ സല്‍മാന്‍, മമ്മൂട്ടി തുടങ്ങിയ താരങ്ങള്‍ അതിഥി വേഷത്തിലെത്തിയിരുന്നു. നസ്ലന്‍, ചന്തു സലീംകുമാര്‍, അരുണ്‍ കുര്യന്‍ തുടങ്ങിയവരും പ്രധാന വേഷങ്ങള്‍ അവതരിപ്പിച്ച സിനിമയാണ് ലോക.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
