'റീച്ചിന് വേണ്ടി വിഡിയോ കീറിമുറിച്ച് പ്രചരിപ്പിക്കുന്നു, പറഞ്ഞതില്‍ തെറ്റുണ്ടെന്ന് തോന്നിയിട്ടില്ല'; പ്രതികരണവുമായി കൃഷ്ണ പ്രഭ

വിഷാദരോഗത്തെക്കുറിച്ചും മാനസികാരോഗ്യത്തെക്കുറിച്ചും നടി കൃഷ്ണ പ്രഭ പറഞ്ഞ വാക്കുകള്‍ വിവാദമായി മാറിയിരുന്നു. വിഷാദരോഗത്തെ നിസാരവത്കരിക്കുകയും കളിയാക്കുകയും ചെയ്തു എന്നായിരുന്നു താരത്തിനെതിരെ ഉയര്‍ന്ന വിമര്‍ശനം. ഒരു യൂട്യൂബ് ചാനലിന് നല്‍കിയ അഭിമുഖത്തില്‍ കൃഷ്ണ പ്രഭ നടത്തിയ പരാമര്‍ശമാണ് വിവാദമായി മാറിയത്.

പണ്ട് കാലത്ത് വട്ട് എന്ന് പറഞ്ഞിരുന്നത് തന്നെയാണ് ഇന്ന് ഡിപ്രഷന്‍ എന്ന് പേരിട്ട് വിളിക്കുന്നത്. ഒരു പണിയുമില്ലാതെ ഇരിക്കുന്നവര്‍ക്കാണ് ഡിപ്രഷനും ഓവര്‍ തിങ്കിങുമൊക്കെ വരുന്നത് എന്നുമാണ് കൃഷ്ണ പ്രഭ പറഞ്ഞത്. സംഭവത്തില്‍ താരത്തിനെതിരെ താരങ്ങളായ സാനിയ അയ്യപ്പന്‍, അഞ്ജു ജോസഫ് തുടങ്ങിയവരും രംഗത്തെത്തിയിരുന്നു. ഈ സാഹചര്യത്തില്‍ പ്രതികരണവുമായി എത്തുകയാണ് കൃഷ്ണ പ്രഭ.

തന്റെ അഭിമുഖം ആരും മുഴുവനായി കണ്ടിട്ടില്ല. താന്‍ പറഞ്ഞത് ആളുകള്‍ മനസിലാക്കിയിട്ടില്ല. ചിലര്‍ റീച്ചിന് വേണ്ടി വിഡിയോ കീറിമുറിച്ച് പ്രചരിപ്പിക്കുകയാണെന്നുമാണ് കൃഷ്ണ പ്രഭ പറഞ്ഞത്. റിപ്പോര്‍ട്ടറിനോടായിരുന്നു കൃഷ്ണ പ്രഭയുടെ പ്രതികരണം.

''പറഞ്ഞ കാര്യങ്ങള്‍ എല്ലാം ആളുകള്‍ മനസിലാക്കിയിട്ടില്ല, ഇപ്പോള്‍ ഈ കോലാഹലം ഉണ്ടാക്കുന്നവര്‍ അഭിമുഖം മുഴുവന്‍ കണ്ടിട്ടില്ല. ആരും വെറുതെ ഇരിക്കരുതെന്നാണ് ഞാന്‍ പറഞ്ഞത്. മനുഷ്യന്റെ മനസ്സല്ലേ അത് പിന്നീട് ഓവര്‍ തിങ്കിങ്ങും മൂഡ് സ്വിങ്ങ്‌സും ആകും'' എന്നാണ് കൃഷ്ണ പ്രഭ പറയുന്നത്.

''ഡിപ്രഷന്‍, ഓവര്‍ തിങ്കിങ്, മൂഡ് സ്വിങ്‌സ് എന്നീ വാക്കുകള്‍ കേള്‍ക്കാന്‍ തുടങ്ങിയിട്ട് കുറച്ച് വര്‍ഷങ്ങളെ ആയുള്ളൂ. ഞാന്‍ ശാസ്ത്രത്തെ ഒന്നും തള്ളിപറഞ്ഞിട്ടില്ല, പല കാര്യങ്ങളിലും ഓവര്‍ അഡിക്ഷന്‍ ആയതുകൊണ്ടാണ് ഇത്തരം പ്രശ്‌നങ്ങള്‍ ഉണ്ടാകുന്നത്. പ്രശ്‌നങ്ങളെ ഊതി പെരുപ്പിച്ച് വലുതാക്കരുത്. ചിലര്‍ റീച്ചിന് വേണ്ടി ആ വിഡിയോ കീറിമുറിച്ച് പ്രചരിപ്പിക്കുന്നുണ്ട്. പറഞ്ഞ കാര്യത്തില്‍ തെറ്റുണ്ടെന്ന് തോന്നിയിട്ടില്ല' എന്നും കൃഷ്ണ പ്രഭ പറയുന്നുണ്ട്.