ഈ ദീപാവലി 'ലോക'യ്ക്കൊപ്പം വൈബ് ആക്കാം! ഒടിടി റിലീസ് തീയതി പുറത്ത്; എവിടെ എപ്പോൾ, കാണാം

ബോക്സോഫീസിലെ സകല റെക്കോഡുകളും തകർത്ത് മുന്നേറി കൊണ്ടിരിക്കുകയാണ് ലോക ചാപ്റ്റർ 1 ചന്ദ്ര. ഓണം റിലീസായെത്തിയ ചിത്രം 300 കോടിയലധികം ഇതിനോടകം നേടിക്കഴിഞ്ഞു. തിയറ്ററിൽ കാണാൻ കഴിയാത്തവർക്കും വീണ്ടും കാണാൻ ആ​ഗ്രഹമുള്ളവർക്കും ഒരു സന്തോഷ വാർത്ത എത്തിയിരിക്കുകയാണ്. ലോകയുടെ ഒടിടിയിലേക്കുള്ള വരവ് ഔദ്യോ​ഗികമായി പ്രഖ്യാപിച്ചിരിക്കുകയാണ് അണിയറപ്രവർത്തകർ. ജിയോ ഹോട്ട്സ്റ്റാറിലാണ് ചിത്രം സ്ട്രീം ചെയ്യുക.

ചിത്രം 300 കോടി കളക്ഷന്‍ കടന്നതായി അണിയറപ്രവര്‍ത്തകര്‍ കഴിഞ്ഞദിവസമാണ് ഔദ്യോഗികമായി സ്ഥിരീകരിച്ചത്. മോഹന്‍ലാലിന്റെ 'എംപുരാനെ' പിന്നിട്ട് ചിത്രം പുതിയ ഇന്‍ഡസ്ട്രി ഹിറ്റായി മാറിയിരുന്നു. ഒക്ടോബർ 17 നായിരിക്കും ചിത്രം ഒടിടിയിൽ സ്ട്രീം ചെയ്ത് തുടങ്ങുക. നിലവിൽ തിയറ്ററുകളിൽ അഞ്ചാം വാരം പിന്നിട്ട ലോക ഇരുനൂറിലധികം സ്ക്രീനുകളിലായി വിജയകരമായി പ്രദർശനം തുടരുകയാണ്.

കേരളത്തിൽ നിന്ന് മാത്രം 120 കോടിയിലേറെയാണ് ചിത്രം ഇതിനോടകം കളക്ട് ചെയ്തിരിക്കുന്നത്. മലയാളത്തിന് പുറമേ തമിഴ്, തെലുങ്ക്, ഹിന്ദി, കന്നഡ പതിപ്പുകളും വൻ വിജയം കൊയ്തു. ഡൊമിനിക് അരുൺ സംവിധാനം ചെയ്ത ചിത്രം നിർമിച്ചത് വേഫെറർ ഫിലിംസിന്റെ ബാനറിൽ ദുൽഖർ സൽമാനാണ്.

കല്യാണി പ്രിയദര്‍ശനാണ് നായിക. നസ്ലിന്‍, സലിംകുമാര്‍, അരുണ്‍ കുര്യന്‍, ശരത് സഭ, നിഷാന്ത് സാഗര്‍, വിജയരാഘവന്‍ എന്നിവരും നിര്‍ണായക വേഷങ്ങള്‍ ചെയ്തു. അഞ്ചു ഭാഗങ്ങളുള്ള ഫാന്റസി സിനിമാറ്റിക് യൂണിവേഴ്‌സിലെ ആദ്യ ചിത്രമാണ് 'ലോക: ചാപ്റ്റര്‍ 1- ചന്ദ്ര'. രണ്ടാംഭാഗമായ 'ലോക: ചാപ്റ്റര്‍ 2' അടുത്തിടെ പ്രഖ്യാപിച്ചിരുന്നു. ടൊവിനോ തോമസ് ആണ് രണ്ടാം ഭാഗത്തിലെ നായകന്‍. ചിത്രത്തിന്റെ പ്രഖ്യാപന വി‍ഡിയോയും സോഷ്യൽ മീഡിയയിൽ വൻ തരം​ഗം തീർത്തു.