നടൻ ദുൽഖർ സൽമാൻ നിർമിക്കുന്ന പുതിയ ചിത്രത്തിന്റെ ഫസ്റ്റ് ലുക്ക് പുറത്ത്. ലോക- ചാപ്റ്റർ വൺ: ചന്ദ്ര (Lokah- Chapter One: Chandra) എന്നാണ് ചിത്രത്തിന്റെ പേര്. കല്യാണി പ്രിയദർശൻ, നസ്‌ലിൻ എന്നിവരാണ് ചിത്രത്തിൽ പ്രധാന വേഷത്തിലെത്തുന്നത്. ഒരു സൂപ്പർ ഹീറോ ചിത്രമായാണ് ലോക ഒരുങ്ങുന്നതെന്നാണ് പുറത്തുവരുന്ന വിവരം. കഴിഞ്ഞ വർഷം സെപ്റ്റംബറിലാണ് ചിത്രത്തിന്റെ പൂജ ചടങ്ങുകൾ നടന്നത്.
ഡൊമനിക് അരുൺ കഥയെഴുതി സംവിധാനം ചെയ്യുന്ന ചിത്രം വൻ ബജറ്റിലാണ് ഒരുങ്ങുന്നത്. ലോക എന്ന് പേരിട്ടിരിക്കുന്ന ഒരു സൂപ്പർ ഹീറോ സിനിമാറ്റിക് യൂണിവേഴ്സിലെ ആദ്യ ചിത്രമാണ് ചന്ദ്ര. ഒരു സൂപ്പർ വുമൺ ആയാണ് പോസ്റ്ററിൽ കല്യാണിയെ കാണാൻ കഴിയുക. 'വണ്ടർ വുമൺ റീമേക്ക്' ആണോ ഇതെന്നാണ് ദുൽഖറിന്റെ പോസ്റ്ററിന് താഴെ നിറയുന്ന കമന്റുകൾ.
'ചിത്രത്തിൽ ദുൽഖറിന്റെ കാമിയോ പ്രതീക്ഷിക്കാമോ?', 'അങ്ങനെ യൂണിവേഴ്‌സിൽ നമ്മുടെ മലയാളം ഇൻഡസ്ട്രിയും, ഇത് പൊളിക്കും'- എന്നൊക്കെയാണ് സോഷ്യൽ മീഡിയയിൽ ഭൂരിഭാഗം പേരും കുറിച്ചിരിക്കുന്നത്. ചന്തു സലിംകുമാർ, അരുൺ കുര്യൻ, ശാന്തി ബാലചന്ദ്രൻ എന്നിവരും ചിത്രത്തിൽ പ്രധാന വേഷങ്ങളിലെത്തുന്നുണ്ട്.
ദുൽഖർ സൽമാന്റെ വേഫെറർ ഫിലിംസിന്റെ ഏഴാമത്തെ ചിത്രമാണ് ലോക- ചാപ്റ്റർ വൺ ചന്ദ്ര. ജേക്സ് ബിജോയ് ആണ് ചിത്രത്തിന് സംഗീതമൊരുക്കുന്നത്. നിമിഷ് രവിയാണ് ഛായാഗ്രഹണം. ചമൻ ചാക്കോയാണ് എഡിറ്റിങ് നിർവഹിക്കുന്നത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
