സ്വന്തം ​ഗ്രാമത്തിലെ മുഴുവൻ പേർക്കും വാക്സിനെത്തിച്ച് മഹേഷ് ബാബു, ഏഴു ദിവസത്തെ വാക്സിൻ ഡ്രൈവ്

സ്വന്തം ​ഗ്രാമത്തിലുള്ളവർക്കായി സൗജന്യ കോവിഡ് വാക്സിൻ വിതരണം ചെയ്ത് തെലുങ്ക് സൂപ്പർതാരം മഹേഷ് ബാബു. ആന്ധ്രാ പ്രദേശിലെ ബുറുപലേ എന്ന ഗ്രാമത്തിലെ മുഴുവൻ ആളുകൾക്കുമായാണ് വാക്സിൻ നൽകിയത്. ഇതിനായി ഏഴ് ദിവസം നീണ്ടു നിൽക്കുന്ന വാക്സിനേഷൻ ഡ്രൈവും ​ഗ്രാമത്തിൽ നടത്തി. 

മഹേഷ് ബാബുവിന്റെ ഭാര്യയും നടിയുമായ നമ്രത ശിരോദ്കറാണ് വാക്സിനേഷൻ പൂർത്തിയാക്കിയ വിവരം അറിയിച്ചത്. ​ഗ്രാമവാസികൾ വാക്സിൻ എടുക്കുന്നതിന്റെ ഫോട്ടോയും നമ്രത  ഷെയര്‍ ചെയ്‍തിട്ടുണ്ട്. ആന്ധ്ര ഹോസ്പിറ്റൽസുമായി ചേർന്നാണ് വാക്സിൻ വിതരണം നടപ്പിക്കിയത്. വാക്സിൻ സ്വീകരിച്ച എല്ല ജനങ്ങള്‍ക്കും നമ്രത നന്ദി പറഞ്ഞു. 

കഴിഞ്ഞ മാസമാണ് ബുറുപലെ ​ഗ്രാമത്തിൽ വാക്സിൻ ലഭ്യമാക്കുമെന്ന് താരം പ്രഖ്യാപിച്ചത്. താരത്തിന്റെ അച്ഛനും നടനും സംവിധായകനുമായ കൃഷ്ണയുടെ ജന്മസ്ഥലമാണ് ബുറിപലേം. 2015 ൽ ​ഗ്രാമത്തെ മഹേഷ് ബാബു ഏറ്റെടുത്തിരുന്നു. ഗ്രാമത്തിന്റെ വികസനത്തിന് വേണ്ടി പ്രവര്‍ത്തിക്കുമെന്ന് മഹേഷ് ബാബു അറിയിച്ചിരുന്നു. തുടര്‍ന്ന് ഗ്രാമത്തില്‍ ക്ലാസ് മുറികള്‍ നിര്‍മിക്കുന്നതടക്കമുള്ള വികസനപ്രവര്‍ത്തനങ്ങള്‍ മഹേഷ് ബാബു നടത്തിയിരുന്നു.