'എവിടെയും പോയി ഇനി പാടരുതെന്ന് ​ഗവർണർ പറഞ്ഞു, മന്ത്രിയായി പാടി കുളമായാൽ കൂടുതൽ പ്രശ്നമാണ്'; വിഷ്ണുനാഥിനൊപ്പം ഡ്യൂറ്റ് പാടി ശരത്

മന്ത്രി പി സി വിഷ്ണുനാഥിനൊപ്പം പാട്ട് പാടാൻ കഴിഞ്ഞതിന്റെ സന്തോഷം പങ്കുവച്ചിരിക്കുകയാണ് സം​ഗീത സംവിധായകൻ ശരത്. മന്ത്രിക്കൊപ്പം പാട്ട് പാടുന്നതിന്റെ വിഡിയോയും അദ്ദേഹം ഫെയ്സ്ബുക്കിൽ പങ്കുവച്ചിട്ടുണ്ട്. 'ഒരു മന്ത്രിയുടെ കൂടെ ഡ്യൂറ്റ് പാടണം എന്ന മോഹം പൂവണിഞ്ഞു.

സാംസ്‌കാരിക മന്ത്രി സഹോദര തുല്യനായ പ്രിയപ്പെട്ട വിഷ്ണുനാഥ്‌ ഒരു നല്ല ഗായകൻ കൂടിയാണെന്ന് തിരിച്ചറിഞ്ഞ നിമിഷം'- എന്നാണ് വിഡിയോയ്ക്കൊപ്പം ക്യാപ്ഷനായി ശരത് കുറിച്ചിരിക്കുന്നത്. "ശരിക്ക് പറഞ്ഞാൽ ഞാനങ്ങനെ പാട്ട് പാടുന്ന ഒരാളൊന്നുമല്ല.

നന്നായി പാടാൻ അറിയത്തുമില്ല. മന്ത്രിയായി പാടി കുളമായാൽ കൂടുതൽ പ്രശ്നമാണ്. മറ്റേത്, നാട്ടിലൊക്കെയാണെങ്കിൽ നമ്മളെ ഇഷ്ടമുള്ള അറിയാവുന്ന ആളുകളാണ്. അവരത് ക്ഷമിക്കും പൊറുക്കും. മന്ത്രിയുടെ ഭാ​ഗത്തു നിന്ന് ഒരു വീഴ്ചയുണ്ടാകാൻ പാടില്ല. ഇതിന് ശേഷം പലയാളുകളും എന്നോട് പാട്ട് പാടുമോ എന്ന് ചോദിച്ചു.

ഞാൻ ഒരു സ്ഥലത്തും പാടിയില്ല. സത്യപ്രതിജ്ഞ ചെയ്തിട്ട് ​ഗവർണർ പറഞ്ഞത് നിങ്ങൾ ശ്രദ്ധിച്ചായിരുന്നോ എന്ന് ഞാൻ അവരോട് ചോദിച്ചു. അവർ പറഞ്ഞു, ശ്രദ്ധിച്ചായിരുന്നു. എവിടെയും പോയി ഇനി പാടരുതെന്നാണ് പുള്ളി എന്നോട് പറഞ്ഞത്. ​ഗവർണർ പറഞ്ഞത് എനിക്ക് കേൾക്കാതിരിക്കാൻ കഴിയില്ലെന്നൊക്കെ പറഞ്ഞ് ഞാൻ ഒഴിഞ്ഞു മാറി.

ഇത് കുട്ടികളുടെ ക്യാംപ് ആയതുകൊണ്ട് ഞാൻ പാടാം. വേറെ എവിടെയും പോയി പറയരുത്. വെള്ളിയൊക്കെ വീഴുകയാണെങ്കിൽ അപ്പോഴേ വിഡിയോ ഡിലീറ്റ് ചെയ്തേക്കണം". - വിഷ്ണുനാഥ് പറഞ്ഞു.

ഇതിന് പിന്നാലെ ​മന്ത്രി ​ഗാനം ആലപിക്കുകയും ചെയ്തു. അസാധ്യമായിട്ട് പാടി. "ഞാൻ ആദ്യം വിചാരിച്ചത് ചുമ്മാ പറ്റിക്കാൻ പറഞ്ഞതാണെന്നാണ്. ഇത് നന്നായിട്ട് പാടി. ഇതിൽ കൂടുതൽ എന്ത് വേണം. ഒരു മന്ത്രിയുടെ കൂടെ ഡ്യൂറ്റ് പാടണം എന്ന മോഹം പൂവണിഞ്ഞു".- ശരത് പറഞ്ഞു.