മുണ്ടുമടക്കിക്കുത്തി കൃഷിചെയ്യാനിറങ്ങി മോഹൻലാൽ, വീട്ടിലെ പച്ചക്കറി തോട്ടത്തിൽ നിന്ന് വിളവെടുത്ത് താരം; വിഡിയോ

ലോക്ക്ഡൗൺ സമയത്താണ് നടൻ മോഹൻലാൽ തന്റെ കൊച്ചിയിലെ വീട്ടിൽ പച്ചക്കൃഷി ആരംഭിക്കുന്നത്. തക്കാളിയും പച്ചമുളകും പാവയ്ക്കയും ഉൾപ്പടെയുള്ളവ നട്ടുവളർത്തിയ കൃഷിത്തോട്ടം താരം നേരത്തെ ആരാധകരെ പരിചയപ്പെടുത്തിയിരുന്നു. ഇപ്പോൾ ഇതാ വീണ്ടും പച്ചക്കറി വിളവെടുത്തിരിക്കുകയാണ് താരം. സോഷ്യൽ മീഡിയയിൽ പങ്കുവെച്ച വിഡിയോയിലൂടെയാണ് താരം തന്റെ കൃഷിയിടത്തിന്റെ വിശേഷങ്ങൾ പങ്കുവെച്ചത്. 

നീല ഷർട്ടും കറുത്ത മുണ്ടും ഉടുത്ത് കൃഷിയിടത്തിലേക്ക് ഇറങ്ങുകയാണ് താരം. ആദ്യം ചെടികൾക്ക് വെള്ളമൊഴിച്ച് പരിപാലിച്ച ശേഷം വിളവെടുക്കാൻ ഇറങ്ങി. തക്കാളി, ചൊരയ്ക്ക, പടവലങ്ങ, പാവയ്ക്ക, പീച്ചിങ്ങ തുടങ്ങിയ പച്ചക്കറികൾ  പറിച്ച് കൊട്ടയിലാക്കുകയാണ് താരം. താരത്തിന്റെ പച്ചക്കറി തോട്ടത്തിന്റെ സംരക്ഷകനായ ദാസിനെയും ഒപ്പം കാണാം. 

താൻ വീട്ടിൽ വരുമ്പോൾ എല്ലാം ഇവിടെ നിന്നുള്ള പച്ചക്കറികളാണ് കഴിക്കുന്നത് എന്നാണ് താരം പറയുന്നത്. കൂടാതെ പുതിയ പച്ചക്കറികൾ കൃഷിചെയ്യാനുള്ള തയാറെടുപ്പിലാണ്. എല്ലാവർക്കും ഇതുപോലെ പച്ചക്കറി കൃഷി ചെയ്യാനാകുമെന്നും വീട്ടിൽ സ്ഥലമില്ലെങ്കിൽ ടെറസിൽ കൃഷി ചെയ്യണമെന്നും താരം ആരാധകരോട് താരം പറഞ്ഞു.