"യഥാർത്ഥ നായകന്മാർ എപ്പോഴും ഒറ്റയ്ക്കാണ്"; മോഹൻലാൽ-ഷാജി കൈലാസ് ചിത്രം 'എലോൺ' 

മോഹൻലാൽ നായകനാകുന്ന ഷാജി കൈലാസ് ചിത്രത്തിന്റെ പേര് പ്രഖ്യാപിച്ചു. ‘എലോൺ’ എന്നാണ് ചിത്രത്തിന് പേര് നൽകിയിരിക്കുന്നത്. മോഹൻലാൽ തന്നെയാണ് ചിത്രത്തിന്റെ പേര് പ്രഖ്യാപിച്ചത്. "യഥാർത്ഥ നായകന്മാർ എപ്പോഴും ഒറ്റയ്ക്കാണ്" എന്നാണ് ചിത്രത്തിന്റെ ടാ​ഗ്ലൈൻ.

രാജേഷ് ജയറാം തിരക്കഥയെഴുതുന്ന ചിത്രം ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമ്മിക്കും. 12 വർഷത്തിന് ശേഷമാണ് മോഹൻലാലും സംവിധായകൻ ഷാജി കൈലാസും ഒന്നിക്കുന്നത്. 2009ൽ പുറത്തിറങ്ങിയ റെഡ് ചില്ലീസിലാണ് ഇരുവരും അവസാനമായി ഒന്നിച്ചത്. 

ആശീർവാദ് സിനിമാസ് നിർമ്മിക്കുന്ന 30-ാമത്തെ ചിത്രമെന്ന പ്രത്യേകതയും ഈ സിനിമയ്ക്കുണ്ട്. 2000 ൽ പുറത്തിറങ്ങിയ നരസിംഹമാണ് ആശീർവാദ് സിനിമാസിന്റെ ബാനറിൽ ആദ്യമായി നിർമ്മിച്ച ചിത്രം. ഈ സിനിമയും ഷാജി കൈലാസാണ് സംവിധാനം ചെയ്തത്. 1997ൽ പുറത്തിറങ്ങിയ ആറാം തമ്പുരാനിലാണ് മോഹൻലാലും ഷാജി കൈലാസും ആദ്യമായി ഒന്നിച്ചത്.