മോശമായി സ്പർശിച്ചെന്ന് യുവതിയുടെ പരാതി; സ്ക്വിഡ് ​ഗെയിം താരത്തിനെതിരെ കേസ്

യുവതിയോട് മോശമായി പെരുമാറിയെന്ന കേസിൽ കൊറിയൻ നടൻ ഓ യൂങ് സൂവിനെതിരെ കേസ്. നെറ്റ്ഫ്ളിക്സ് സീരീസായ സ്ക്വിഡ് ​ഗെയ്മിലൂടെ ശ്രദ്ധേയനായ നടനാണ് ഓ യൂങ് സൂ. മോശം രീതിയിൽ സ്പർശിച്ചു എന്നാണ് യുവതിയുടെ പരാതി. താരത്തിനെതിരെ തെളിവുകൾ ലഭിച്ചതോടെയാണ് കേസെടുത്തത്. 

2017ലാണ് കേസിന് ആസ്പദമായ സംഭവം നടക്കുന്നത്. തുടർന്ന് 2021 ഡിസംബറിൽ യുവതി പരാതിയുമായി രം​ഗത്തെത്തി. പരാതി അന്വേഷിച്ച പൊലീസ് ഏപ്രിലിൽ നടനെതിരെ നടപടിയൊന്നുമെടുക്കാതെ കേസ് അവസാനിപ്പിച്ചിരുന്നു. തുടർന്ന് പരാതിക്കാരിയുടെ അഭ്യർത്ഥനയേത്തുടർന്ന് അധികൃതർ കേസ് പുനരന്വേഷിക്കുകയായിരുന്നെന്ന് ബിബിസി റിപ്പോർട്ട് ചെയ്തു. ഈ അന്വേഷണത്തിൽ സൂവിനെതിരെ തെളിവ് ലഭിച്ചിട്ടുണ്ടെന്നാണ് റിപ്പോർട്ട്.‍

എന്നാൽ ആരോപണങ്ങൾ ഓ യൂങ് സൂ നിഷേധിച്ചു. മോശമായി പെരുമാറിയിട്ടില്ലെന്നും സംഭവം നടന്ന ആ പ്രദേശത്തുണ്ടായിരുന്ന തടാകത്തിനരികിലൂടെ വഴികാണിക്കാൻ കൈ പിടിച്ചതേയുള്ളൂവെന്നുമാണ് അദ്ദേഹം പറഞ്ഞത്. സംഭവത്തിൽ താൻ മാപ്പു ചോദിച്ചിരുന്നെന്നും ഇതുമായി ബന്ധപ്പെട്ട് ബഹളമുണ്ടാക്കില്ലെന്നാണ് അവർ പറഞ്ഞിരുന്നതെന്നും സൂ വ്യക്തമാക്കി. പക്ഷേ താൻ കുറ്റം സമ്മതിക്കുന്നുവെന്നല്ല അതിനർത്ഥമെന്നും സൂ കൂട്ടിച്ചേർത്തു.

78കാരനായ സൂ സ്ക്വിഡ് ​ഗെയിമിൽ പ്ലേയർ-001 എന്ന വേഷമാണ് അവതരിപ്പിച്ചത്. അദ്ദേഹം ചെയ്ത ഏറ്റവും പ്രായമേറിയ മത്സരാർത്ഥിയുടെ വേഷം വലിയ രീതിയിൽ ശ്രദ്ധിക്കപ്പെട്ടിരുന്നു. 50 വർഷമായി അഭിനയരം​ഗത്തുണ്ടെങ്കിലും സ്ക്വിഡ് ​ഗെയിം പരമ്പരയിലൂടെയാണ് താരം ലോകശ്രദ്ധ നേടുന്നത്. 
 

ഈ വാര്‍ത്ത കൂടി വായിക്കൂ 

വിവാഹത്തിന് അംഗീകാരം വേണം, രജിസ്റ്റര്‍ ചെയ്യണം; സ്വവര്‍ഗ ദമ്പതികള്‍ സുപ്രീം കോടതിയില്‍

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ