'ഹെവൻലി ഹമ്മിങ്...', ട്രെൻഡിങ്ങായി 'ഒരു മാലൈ ബെ​ഗിൻ' ഫ്യൂഷൻ; കെ എസ് ചിത്രയ്ക്ക് കയ്യടി

'ഗജിനി' സിനിമയിലെ സൂപ്പർ ഹിറ്റ് പാട്ട് 'ഒരു മാലൈ...' ഇപ്പോൾ വീണ്ടും സോഷ്യൽ മീഡിയയിൽ ട്രെൻഡിങ് ആയിരിക്കുകയാണ്. ഈ പാട്ടിനൊപ്പം ഇറ്റാലിയൻ റോക്ക് ബാൻഡ് മാനെസ്കിന്റെ ബെ​ഗിനും ചേർന്ന 'ഒരു മാലൈ ബെ​ഗിൻ' ഫ്യൂഷനാണ് സോഷ്യൽ മീഡിയയും സം​ഗീത പ്രേമികളും ഏറ്റെടുത്തിരിക്കുന്നത്.

റീലുകളില്‍ നിരന്തരം റീഷെയര്‍ ചെയ്യപ്പെടുന്ന ഈ ട്രാക്ക് പുറത്തിറക്കിയത് ‘സിംഫണി’ എന്ന യൂട്യൂബ് ചാനലാണ്. ഇതിനോടകം ലക്ഷക്കണക്കിന് ആളുകളാണ് ഈ വിഡിയോ കണ്ടത്. പക്ഷേ ഈ ഫ്യൂഷന്‍റെ യഥാര്‍ഥ ഹൈലൈറ്റ് മറ്റൊന്നാണ്. പാട്ടിനിടയില്‍ അപ്രതീക്ഷിതമായി എത്തുന്ന കെ എസ് ചിത്രയുടെ ഹമ്മിങ് ആണ് എല്ലാവരെയും അമ്പരപ്പെടുത്തിയിരിക്കുന്നത്.

അതുവരെ ഹൈ-എനര്‍ജി ബീറ്റില്‍ പോയിരുന്ന ട്രാക്ക്, ചിത്രയുടെ ശബ്ദം എത്തുന്നതോടെ പെട്ടെന്ന് ഒരു മെലഡി ഫീലിലേക്ക് മാറുന്നു. ’ഈ ഹമ്മിങ് ഏത് പാട്ടിലേതാണ്?’ എന്ന ചോദ്യമാണ് റീലുകളുടെ കമന്റ് ബോക്സുകളില്‍ നിറയുന്നത്. അതിനുള്ള ഉത്തരവും ഇപ്പോള്‍ വൈറലാകുകയാണ്.

’കറുത്തമ്മ’ എന്ന ചിത്രത്തിനായി എ ആര്‍ റഹ്മാന്‍ സംഗീതം നല്‍കിയ ‘തെന്‍മാര്‍ക്ക് പരുവ കാട്ര്’ എന്ന ഗാനത്തിന്‍റെ ഒടുവില്‍ വരുന്ന ചിത്രയുടെ ഹമ്മിങ്ങാണ് ഈ ഫ്യൂഷനില്‍ ഉപയോഗിച്ചിരിക്കുന്നത്.

ഹമ്മിങ് തിരിച്ചറിഞ്ഞ സംഗീതാസ്വാദകര്‍ ഇപ്പോള്‍ കമന്‍റ് സെക്ഷനില്‍ അത് പങ്കുവച്ചും ചര്‍ച്ചയാക്കിയും രംഗത്തുണ്ട്. കെ എസ് ചിത്രയുടെ മനോഹരമായ ​ആലാപനത്തിൽ ആരുടെയായാലും ഹൃദയം അലിഞ്ഞു പോകുമെന്നും ചിലർ കുറിക്കുന്നുണ്ട്.