'ഭയത്തിന്റെ നിഴലാട്ടം'! ഒടിടിയിലും അടിപതാറതെ 'ഡീയസ് ഈറെ'; മികച്ച പ്രതികരണം

പ്രണവ് മോഹൻലാലിനെ നായകനാക്കി രാഹുൽ സദാശിവൻ ഒരുക്കിയ ഡീയസ് ഈറെ ഒടിടിയിലെത്തിയിരിക്കുകയാണ്. മനോരമ മാക്സ്, ജിയോ ഹോട്ട്സ്റ്റാർ എന്നീ ഒടിടി പ്ലാറ്റ്ഫോമുകളിലായാണ് ചിത്രം സ്ട്രീം ചെയ്യുന്നത്. തിയറ്ററിലേതു പോലെ തന്നെ ഒടിടിയിലും മികച്ച പ്രേക്ഷക പ്രതികരണമാണ് ചിത്രം നേ‌ടുന്നത്.

ഗംഭീര സൗണ്ട് ഡിസൈൻ ആണ് സിനിമയുടേതെന്നും ചിത്രത്തിന്റെ വിഷ്വലുകൾ ഞെട്ടിച്ചെന്നുമാണ് പൊതുവേയുള്ള അഭിപ്രായങ്ങൾ. തമിഴ് പ്രേക്ഷകരിൽ നിന്ന് മികച്ച റെസ്പോൺസ് ആണ് സിനിമയ്ക്ക് ലഭിക്കുന്നത്. ഒടിടിയിലും സിനിമ ഭയപ്പെടുത്തുന്നു എന്നാണ് മറ്റൊരാൾ എക്സിൽ കുറിച്ചിരിക്കുന്നത്.

'ഡീയസ് ഈറെ രണ്ടാം ഭാ​ഗം വരണമെന്ന് ആ​ഗ്രഹിക്കുന്നവരുണ്ടോ ?' എന്ന് കുറിക്കുന്നവരും കുറവല്ല. മധുസൂദനൻ പോറ്റിയായെത്തിയ ജിബിൻ ​ഗോപിനാഥിന്റെ പ്രകടനത്തെ പുകഴ്ത്തുന്നവരും കുറവല്ല. എന്നാൽ ഡീയസ് ഈറെയേക്കാൾ ഞെട്ടിച്ചത് ഭൂതകാലമാണെന്നും ചിലർ അഭിപ്രായപ്പെടുന്നുണ്ട്.

37.68 കോടിയാണ് സിനിമ കേരള ബോക്സ് ഓഫീസിൽ നിന്നും നേടിയത്. ആഗോള ബോക്സ് ഓഫീസിൽ നിന്നും ചിത്രം 80 കോടിക്കും മുകളിൽ നേടിയെന്നാണ് റിപ്പോർട്ടുകൾ സൂചിപ്പിക്കുന്നത്. 'ക്രോധത്തിന്റെ ദിനം' എന്ന അര്‍ഥം വരുന്ന 'ദ് ഡേ ഓഫ് റാത്ത്' എന്നതാണ് ചിത്രത്തിന്റെ ടാഗ് ലൈന്‍.

നൈറ്റ് ഷിഫ്റ്റ് സ്റ്റുഡിയോസ്, വൈ നോട്ട് സ്റ്റുഡിയോസിന്റെ ബാനറിൽ ചക്രവർത്തി രാമചന്ദ്ര, എസ് ശശികാന്ത് എന്നിവർ ചേർന്ന് നിർമിച്ച ചിത്രത്തിന്റെ തിരക്കഥയും രാഹുൽ സദാശിവൻ തന്നെയാണ് ഒരുക്കിയിരിക്കുന്നത്.