'ഞങ്ങള്‍ക്ക് ഒറ്റ സൂപ്പര്‍സ്റ്റാറെ ഉള്ളൂ. അത് രജനീകാന്താണ്'- കങ്കുവ പ്രമോഷനിടെ തന്നെ സൂപ്പര്‍സ്റ്റാര്‍ എന്ന് വിളിച്ച അവതാരകനെ തിരുത്തിക്കൊണ്ട് സൂര്യ പറഞ്ഞതാണിത്. 74 വയസിലും സ്റ്റൈലിനും അഴകിനും കുറവു വരാതെ സൂപ്പര്‍സ്റ്റാറായി നിറഞ്ഞു നില്‍ക്കുകയാണ് രജനീകാന്ത്. ആറ് പതിറ്റാണ്ട് നീണ്ടു നില്‍ക്കുന്ന കരിയറില്‍ നിരവധി സൂപ്പര്‍ഹിറ്റ് സിനിമകളാണ് രജനീകാന്ത് സമ്മാനിച്ചത്. തമിഴ് സിനിമയില്‍ തന്നെ ഏറ്റവും കൂടുതല്‍ കളക്ഷന്‍ നേടിയ ആദ്യ രണ്ട് ചിത്രങ്ങളും രജനീകാന്തിന്റെ പേരിലുള്ളതാണ്. താരത്തിന്റെ ഏറ്റവും പണം വാരിയ അഞ്ച് സിനിമകള്‍ ഇവയാണ്.
സൂപ്പര്‍ഹിറ്റായി മാറിയ എന്തിരന്റെ രണ്ടാം ഭാഗമായാണ് 2.0 എത്തുന്നത്. ശങ്കറാണ് ചിത്രം സംവിധാനം ചെയ്തത്. രജനീകാന്തിന്റെ കരിയറിലെ മാത്രമല്ല തമിഴ് സിനിമയിലെ തന്നെ ഏറ്റവും കളക്ഷന്‍ നേടിയ ചിത്രമാണ് ഇത്. 655 കോടിക്ക് മേലെയാണ് 2.0 കളക്റ്റ് ചെയ്തത്. 500 കോടിയില്‍ അധികമായിരുന്നു ചിത്രത്തിന്റെ ബജറ്റ്. റിലീസ് ചെയ്ത് വര്‍ഷം ആറ് കഴിഞ്ഞിട്ടും ഈ റെക്കോര്‍ഡ് തകര്‍ക്കാന്‍ ഒരു സിനിമയ്ക്കുമായിട്ടില്ല.
ബോക്‌സ് ഓഫിസില്‍ വന്‍ തരംഗം സൃഷ്ടിച്ച ചിത്രമാണ് രജനീകാന്തിന്റെ ജയിലര്‍. കഴിഞ്ഞ വര്‍ഷം റിലീസിന് എത്തിയ ചിത്രം 600 കോടി ക്ലബ്ബില്‍ കയറിയിരുന്നു. 200 കോടി ബജറ്റില്‍ ഒരുങ്ങിയ ചിത്രമാണ് വമ്പന്‍ കളക്ഷന്‍ നേടിയത്. തമിഴ് സിനിമയിലെ ഏറ്റവും കളക്ഷന്‍ നേടിയ രണ്ടാമത്തെ ചിത്രമാണ് ജയിലര്‍. നെല്‍സണ്‍ ദിലീപ്കുമാര്‍ സംവിധാനം ചെയ്ത ചിത്രത്തില്‍ വിനായകനാണ് വില്ലന്‍ കഥാപാത്രത്തെ അവതരിപ്പിച്ചത്. ചിത്രത്തിലെ മോഹന്‍ലാലിന്റെ അതിഥിവേഷവും ഏറെ ശ്രദ്ധിക്കപ്പെട്ടിരുന്നു.
തമിഴിലെ പകരം വെക്കാനില്ലാത്ത സിനിമകളില്‍ ഒന്നാണ് എന്തിരന്‍. എസ് ശങ്കര്‍ സംവിധാനം ചെയ്ത ചിത്രത്തില്‍ രജനീകാന്തിന്റെ നായികയായി എത്തിയത് ഐശ്വര്യ റായ് ആണ്. സയന്‍സ് ഫിക്ഷന്‍ മൂവി 2010ലാണ് റിലീസ് ചെയ്തത്. 132 കോടി മുതല്‍ മുടക്കില്‍ ഒരുക്കിയ ചിത്രം 320 കോടിയാണ് കളക്റ്റ് ചെയ്തത്. 2.0 റിലീസ് ചെയ്യുന്നതു വരെ തമിഴ് സിനിമയിലെ ഏറ്റവും പണം വാരിയ ചിത്രമായിരുന്നു എമ്പുരാന്‍.
രജനീകാന്തിനെ നായകനാക്കി പാ രഞ്ജിത്ത് സംവിധാനം ചെയ്ത ചിത്രമാണ് കബാലി. 2016ലാണ് ചിത്രം റിലീസ് ചെയ്തത്. കബാലി എന്നറിയപ്പെടുന്ന കബാലീശ്വരന്‍ എന്ന അധോലോക നായകന്റെ വേഷത്തിലാണ് രജനീകാന്ത് എത്തിയത്. 100 കോടി മുതല്‍ മുടക്കില്‍ ഒരുക്കിയ ചിത്രം 284 കോടിയില്‍ അധികമാണ് കളക്റ്റ് ചെയ്തത്.
രജനീകാന്തിനെ നായകനാക്കി കാര്‍ത്തിക് സുബ്ബരാജ് സംവിധാനം ചെയ്ത ചിത്രം. 2019 പൊങ്കല്‍ റിലീസായാണ് ചിത്രം പ്രേക്ഷകരിലേക്ക് എത്തിയത്. അജിത്തിന്റെ വിശ്വാസവുമായാണ് ചിത്രം ഏറ്റുമുട്ടിയത്. ആഗോള കളക്ഷനില്‍ വിശ്വാസത്തേക്കാള്‍ കളക്റ്റ് ചെയ്‌തെങ്കിലും തമിഴ്‌നാട്ടില്‍ അജിത് ചിത്രത്തിനായിരുന്നു മുന്‍തൂക്കം. 250 കോടിയോളം രൂപയാണ് ചിത്രം കളക്റ്റ് ചെയ്തത്. 160 കോടിയായിരു ബജറ്റ്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
